حستلم النيو سيراتو يوم الاربعاء ان شاء الله و ارجو المساعده

**mexxxxxx** · 20-04-2009 03:49 AM

الحمد لله حستلم النيو سيراتوex يوم الاربعاء ان شاء الله و ارجو المساعده:

- اهم الحاجات اللي اركز فيها وانا بستلم العربيه
- الاوراق اللي المفروض استلمها مع العربيه
- خطوات ترخيص العربيه
- احسن محلات لبيع الاكسسوار ( دواسات - غطاء ) و لو امكن بالمعادي
- احسن شركة تامين

**Eman80** · 23-04-2009 11:12 AM

اولا 1000 مبروك على العربيه و ربنا يباركلك فيها و يكفيك شرها.
1- اهم الحجات اللي تركز عليها انو كل حاجه في العربيه تكون شغاله زي الكاسيت(يعني تاخد معاك CD) الانوار برا و جوا, المساحات الطفايه بتاعت السجاير,الفرش تمام و مفهوش اي حاجه و كمان خلي بالك من العربيه من بر ميكنش فيها خدش او اي حاجه. وطبعا الاستبن موجود + العده بتاعته بس عاوزه اقولك انو لما جيت استلم كان في مفتاح ناقص وقلولي ان كل العربيات نزله من غيروز

2- بالنسبه للاوراق ورق التخليص الجمركي بتاع العربيه و يكون مختوم بختم النسر وورق بتاع التوكيل و برضه مختوم بختم النسر. وياريت تسال على الضمان اهم حاجه اصلي انا نسيت اخده و مش عارفه اعمل ايه بس حكلم التوكيل.

3- ياريت تعمل نسخه من كل الورق بتاعك حتى البطاقه والرخصه صورهم 3 نسخ مسلا + ورق المعرض كمان و ياريت تشتري طفايه حريق من بره و تكون اصلي مش مستبدل واحطياتي يكون معاك الوصل و في المرور يدوب حيختموها عشان لو جبتها من المرور حتكون اغلى 30 او40 جنيه انا جاتلي من وسط البلد ب 100 جنيه بس مش عارفه المحل.

4- بالنسبه للاكسسوارات انا لسه مجبتش اي حاجه للعربيه.

5- انا امنت مع AIGاللي في عمارات العبورقدام هيونداي ب 4.25 من ثمن العربيه تامين اسمه فاملي جارد ده بيامن عليك و على 3 كمان من الركاب اللي معاك في العربيه لو حصل حادث لاقدر الله غير بقى لو العربيه عملت حادث تتصل بيهم يبعتولك ونش و عربيه توصلك للمكان اللي انت عاوزه ولو خبطت حد وانت اللي غلطان تعمل محضر و يصلحو العربيه لحد 10,000 جنيه ولو عملت حادث حتدفع 150 جنيه و ههما يصلحوا العربيه ولو انت عاوز صلحها في المكان اللي انت عاوزه و جبلهم الفواتير وهما يدوك الفلوس بعدها بمده وحاول تقلل في قيمق العربيه يعني مس لازم تقول السعر الحقيقي عشان تقلل الفلوس شويه.
في تامين عادي ب 3.75 على العربيه فقط لاغير يعني مفيش ونش والكلام ده.

واتمنى المعلومات البسيطه تكون مفيده

**mexxxxxx** · 23-04-2009 01:35 PM

شكرا و مبروك عليكي عربيتك

**ghazy12** · 23-04-2009 02:59 PM

المشاركة الأصلية كتبت بواسطة mexxxxxx

الحمد لله حستلم النيو سيراتوex يوم الاربعاء ان شاء الله و ارجو المساعده:

- اهم الحاجات اللي اركز فيها وانا بستلم العربيه

1- شوف العربية عاملة كام كيلو, و بص كويس على الصاج بتاع العربية لو فيه خدش او خلافه
2- اتأكد من كفاءة عمل كل من (الكاسيت و التكيف, الزجاج و الزراير,....)
3- افتح الكابوت و بص على العزل راكب كويس, شيك على زيت الباور بالنظر كده..
4- شيك على الكوتش و الجنط و الاستبن (جنط برده) و عدة العربية (كوريك, مفك, مفتاح.....)
5- شيك على الأبواب و الأكر بره و جوه

- الاوراق اللي المفروض استلمها مع العربيه

بتستلم الافراج الجمركي و معاه جواب المرور, و طبعا وصولات الدفع و كتيب الضمان و لو بتستلم من المعرض هتاخد كتيب الضمان مع أول صيانة بعد التليين (صيانة الـ1000 كم)

- خطوات ترخيص العربيه

1- الفحص الفني, و اشتري قبل ما تروح الطفاية عشان تتسجل مع العربية
2- بتسحب الورق من الشباك على حسب عدد سنين الترخيص و بتملاه
3- بتقدم الورق لشباك الترخيص و بيديك ورقة تدفع بيها في الخزينة و بيطلب منك تعمل التأمين الاجباري
4- بتروح على شبابيك التأمين الاجباري و تختار من مجموعة الشركات اللي موجوده (مصر, الأهلي,...........) و بتدفع و بتاخد الوثيقة و على حسب عدد سنسي الترخيص
5- بتروح شباك النمر و بتطلب نمره و بيكتبهالك في الورق و بترجع للشباك تاني بتاع الترخيص و بتستنى يندهو على اسمك
6- تستلم الرخصة و النمر

- احسن محلات لبيع الاكسسوار ( دواسات - غطاء ) و لو امكن بالمعادي

همة كتييير قوي, بس ممكن سبير كار...... هسأل على غيره و لو فيه في المعادي و هقولك

- احسن شركة تامين

شوف يا سيدي... من وجهة نظري أحسن 3 شركات في مصر بالترتيب
1- اليانز مصر (4.1% من ثمن العربية)
2- AIG (أليكو) (3.75% من ثمن العربية)
3- كونتاكت (3.75% من ثمن العربية) أو (4% من ثمن العربية) VIP

انا عن نفسي امنت في كونتاكت...

و الف مبروووك و ربنا يباركلك فيها ان شاء الله...