-
اللون الأسود للعربيات
سؤال دائما محيرني ما هي سبب حب الناس في مصر للعربيات السوداء رغم إننا دول حارة صيفا و مليئة بالأتربة و التلوث , هل السبب إنتماء للعلم حيث إن جزء منه أسود , أم هل رغبة منا في تقليد عربيات الناس المهمة و موروث المرسيدس الأسود بتاعة الوزراء أم لأن حياتنا أصبحت كئيبة و سوداء , أم مجرد عملية ذوق مع العلم إن مصر فيها أعلي نسبة سيارات سوداء في العالم :36_7_4[1]:
-
معروف ان اللون الاسود هو اشيك لون فى اغلب العربيات
حتى لو العربيه مش جامده اللون الاسود بيغيرها خالص بيخليها جامده
انا لما جيت اشترى كانت كل الالوان موجوده كتير والاسود دايما بيخلص بسرعه وتقعد تدور عليه
عيوبه زى ما انت قلت فى الحر بيمتص الحراره وبيبان فيه التراب بسهوله
-
هى مسالة ازواق بس
الاسود شيك
فخم
رغم العيوب سالفة الزكر
-
احلى لون في العربيات الكبيره نسبيا بلا منازع
بس عايز أهتمام وغسيل مستمر
أنا شخصيا بفضله الا اذا كانت العربيه صغيره اصلا
هتبقى حسنه على رأي "أحمد حلمي" :k48: !!
-
مش بيبان فية الخبطات الصغيرة زى أى لون تانى
-
انا بحب الاسود فى العربيات بشوفها اشيك
بس ده مايمنعش ان فى عربيات بتليق عليها الوان تانية يعنى لو فرارى اكيد هختارها حمرا مش سودا
-
انا كمان عربيتى سوداء مع انى عمرى تقريبا مشفتها من غير تراب اكتر من 10 دقايق على بعض بس اللون الاسود بيدى شياكة وبيخلى شكل العربية احسن وفخم
-
الاوكتافيا الى معانا سمراء ...
و الاسترا رصاصى
مش بحس بحوار الحراره ده
بس عيب الاسود التراب و الخرابيش !!!
-
الأسود ملك الألوان
الموضوع مجرد منظر اللون بالنسبة لطراز معين. فمثلا لما رحت التوكيل أجيب عربيتى (جيتا) كان فى منها عدد من الالوان فى صالة العرض, و خارج التوكيل كان هناك العديد من العربيات اللى جاية تعمل الصيانة قتقريبا شفت جميع الألوان الحقيقة الأسود كان تحفة و كان أستحالة بعد ما شوفته أجيب أى لون تانى حتى لو انتظرت فترة اطول. كذلك اخى عند شراء عربيته راح ثلاث مرات التوكيل (هوندا سيفيك) لأنه كان شايف ان اللون الأسود هو أفضل لون نزل من هذه العربية و أضطر بعد انتظار 3 شهور و كل مرة يروح أول يوم فى الحجز يقولوا له الأسود خلص ابقى تعال بدرى و تانى مرة راح 11 الصبح لقاه خلص و تالت مرة 9 برضه لقاه خلص و أضطر للبجث عن واسطة داخل التوكيل و وصل و خد اللون الأسود فى الدفعة اللى بعدها بعد انتظار حوالى 5 شهور. مثلا المرسيدس فرق السود فيها رهيب عن باقى الألوان. معظم العربيات الجديدة على الزيرو اللى ماشى فيها دلوقتى اللون السود لاحظ الشارع واضحة قوى.
و لكن ده مش كل الموديلات فى عربيات الأسود لا يليق عليها مطلقا.
و فى الأخر دى اذواق و لولا تعددها لبارت السلع. و الواحد لما يحب لون يهون عليه أنها بتجمع التراب و محتاجة عناية شوية، أما بالنسبة لأمتصاصها الحرارة فاعتقد أن التكييف دلوقتى فى العديد من العربيات الجديدة ما بقاش أوبشن ده بقى استاندرد فمابقتش تفرق. آسفة للأطالة
-
عندكم حق الاسود له جاذبية خاصة ، يمكن انا اللى شدنى لشراء عربيتى انى شفتها فى التوكيل وسط العديد من الالوان ورغم ان الالوان التانية بتدى احساس بكبر الحجم للعربية الا ان الاسود له انبهاره ويمكن الملاحظ ان معظم النوبيرا موديل 2009 هى سوداء رغم قلة اللون ده فى الموديلات السابقة
-
الموضوع مش في مصر بس العالم كله وفي استفتائات العالم كله اشيك لون هوة الاسود مش عشان حكاية علم مصر ولا حاجة يعني انا عن نفسي عربيتي بيضة بس الفرش اسود واحمر يعني علم مصر رسمي هههههه
-
بص هو خليط زي ما ذكرت بين فكرة علقت في أذهان الناس عن السيارات الكبيرة والفخمة سوداء اللون الخاصة بالملوك و الرؤساء وبين الخوف من ركوب سيارات بيضاء اللون التي تشبة لون الميكروباصات وبعض وسائل النقل العامة والشعب المصري شعب يحب المظاهر ويحب التميز وحتى لو دفع في سبيل ذلك الكثير بينما لو بصينا للموضوع من زاوية مختلفة هنلاقي أن اللون الأبيض له ميزة مفيدة ومهمة جداً وهيا أنه بيعكس أشعة الشمس وبالتالي لو ركنت عربيتك السوداء في فصل الصيف في الشمس لمدة 15 دقيقة ورجعت ركبتها هتلاقي كأنك ركبت فرن نووي حراري - عن تجربة - وهتحتاج الي 5 دقائق تكييف أو فتح للنافذة على الأقل لتغيير الجو داخل السيارة بينما لو ركنت عربيتك بيضاء اللون في الشمس نفس المدة يكفي فقط فتح الشباك أو التكييف لدقيقة واحدة حتى يتغير الجو داخل السيارة الي البارد مع الحفاظ على دهان السيارة وفرش السيارة وأسلاك السيارة وتابلوة السيارة وموتور السيارة وتكييف السيارة وبالتالي في نظري الألوان الفاتحة هي الأفضل وعن نفسي مش هشتري سيارة باللون الأسود مرة أخرى وهشتري لون فاتح ومش شرط الفاتح يكون أبيض في فضي في ذهبي في كريمي في أختيارات كثير .
Content Relevant URLs by
vBSEO 3.6.0 PL2