الموضوع: بدور على فيكترا موديل 2000 و ما فوق

المشاركة الأصلية كتبت بواسطة M.Mokhtar

اسف يا وليد
عربيتى لم تعد للبيع
تم تظبيط شوية حاجات كده عشان هتستمر معايا سنه او اتنين
انتظروا موضوعى الجديد

حرام ابيعها بسعر السوق الحالى
انا كده بشجع نزول اسعار اوبل ودى حاجة لا ارضى بيها مطلقا:10D5C8~1107:
تويوتا ايه اللى سعرها يبقى اعلى من الاوبل
والله حرام

أحييك يا أ. محمد على غيرتك على عربيتك و فعلا زى ما بتقول تيوتا بقت اعلى من اوبل بسبب التهاون فى سعر البيع

المشاركة الأصلية كتبت بواسطة me3mary

تم بحمد الله الحمد لله اشتريت عربية 2002
العربية اللى كنت رايح اشوفها انهاردة صاحبها ادانى بومبة و مجاش كنا متفقين نتقابل قدام مركز الصيانة اللى قدام رابعة العدوية ( كانت2003 مانيوالعاملة 130 ألف كيلو و كانت لسة رشة برة بالكامل و حالتها من جوه كويسة و كان طالب 65 ألف قلتله لو التوكيل قال انها سليمة هوافق على السعر )المهم مجاش و انا كنت مسخير الصبح قبل ما انزل فقلت جت من عند ربنا .
المهم كلمت واحد تانى كان عارض عربيته فى السوق و كانت برضوه عجبانى و كان طالب فيها 62 ألف جنيه(2002 مانيوال 1600 عاملة 131 ألف كيلو - فابريكة يرة و جوه - رشت اكصدامات بس) و جالى ولكن التوكيل رفض يستقبل عربيات تانية علشان الوقت .
المهم حد وصفلى مركز صيانة تانى و كشفنا عليها
لقينا فيها حاجات محتاجة تتعمل تكلفتها اربعة الاف جنيه وهى كالأتى :
التكييف مفصول - المراية الشمال مكسورة - Abs عايز يتغير

اشتريتها فى الأخر بــــ 57 ألف جنيه
انصحونى اعمل الحاجات دى فين
المركز اللى روحته ده بتاع واحد اسمه صابر خلف مبنى الرقابة الإدارية اللى فى تقاطع طريق النصر مع شارع الطيران
ولا اعملها فى التوكيل
فى المركز ده ممكن اركب حاجات استيراد سعرها هيبى قليل لكن فى التوكيل هيركب حاجات جديدة سعرها اغلى طبعا

افيدونى :
- هل انا غلطان انى اشتريت عربية فيها شوية الشغل اللى قلت عليه ده
- اصلح الحاجات دى فى التوكيل ولا فى مركز الصيانة اللى وديتهاله يكشف عليها

الف مبروكي ا باشا علي العربية.. و السعر ده كويس جدا جدا جدا..
بالنسبة للتكييف اللي مفصول ده الله اعلم فيه ايه.. هتاخدها و تطلع بيها علي شركة ديافيا في كوبري القبة.. دول احسن ناس تشتغل ف تكييف العربيات الالماني.. يكشفوا و يقولك المشكلة اللي فيه فين و تتكلف كام.. ناس متخصصين و توكيل.. و انصحك تعملها هناك..
عشان في ناس كتير بتعمل شغل برة.. بيتكلف فلوس اقل صحيح.. بس بعد شوية وقت الشغل اللي عملته راح و التكييف ضعف تاني و كله رجع زي الاول..

بالنسبة لموضوع الABS عايز يتغير.. فدي حاجة شائعة ف الموديل ده.. و لسة سائل عليها واحد قريبي امبارح هو مهندس و كان شغال في توكيل اوبل..
انت و نصيبك.. حسب الكود بتاع المشكلة اللي ف الجهاز.. ممكن يكون حاجة بسيطة و محتاج يتصلح فيه حاجات سهلة.. و ممكن المشكلة الكبيرة.. يكون بيخرف.. و مينفعش يتغير.. لأنك عشان تغيره لازم تغير الكونترول يونيت بتاعت العربية كلها. و دي حاجة مكلفة قوي.. و مالهاش لازمة..

الموراية المكسورة دي طبعا استيراد. و ان شاء اله مش هتبقي غالية..
و السعر اللي اشتريت بيه ده ما شاء الله كويس جد ا جدا.. و مش مشكلة ابدا انك اشتريت بسعر قليل شوية بس العبرية فيها شوية شغل..
الحمد لله الشغل بسيط.. و دي حاجات مش معضلة يعني.. العربية تمشي من غيرهم.. مش مضطر انك تعلمهم دلوقتي..علي مهلك يعني.

و عموما.. الف مبروك.. و في انتظار متابعتك لينا بقي و تبقي عضو نشيط ف العصابة..

المشاركة الأصلية كتبت بواسطة me3mary

الله يبارك فيك
و متشكر على ردك
بالنسبة للتكييف اوصفلى بس اروح ازاى اروح ديافيا بالظبط
وبالنسبة للabs مركز الصيانة بتاع صابر اللى قلت عليه قالى هيجيبوه استيراد و يكلف 1300 جنيه بتركيبه
المرايات قالى هيركب استيراد المعدلة اللى بتقفل مع السنتر و تكلفتهم حوالى 600 جنيه
جوان الكرتيرة برضوه قال مش هيكلف و هيعمل شوية صيانة - بوجيهات و حاجات كده
قالى كمان محتاجة طقم جلب للمساعدين تكلفتهم 500 جنيه

عندى كمان استفسار
العربية لو مشيت بيها م غير Abs تبقى مشكلة ولا لأ
لأن صابر قاللى الموديلت دى وزنها تقيل و الفرامل العادية مش بتقدر توقفها كويس و ممكن العربية تحدف منى و انا بفرمل

نصيحة كمان
العربية فبريكة من برة بالكامل ما عدا الإكصدامات
بفكر لو هسيبها معايا فترة كبيرة ارشها نضافة من برة و اهى بردوا الواحد يحس بالعربية
اما لو هبيعها بعد فترة قريبة اسيبها علشان تعلى سعرها اهو اسمها فبريكة بردوا

ادي ديافيا يا باشا.. طلع ليهم فرع تاني في الدقي.. انا اول مرة اعرفه..
الظاهر انه لسة جديد..
25 El Zahraa St.
Dokki, Giza
Tel:
02 33374739
Fax: 02 33374739

و ده الاصل بتاع كوبري القبة

17 Ismael Bey St.
Kobry El Koba, Cairo
Tel:
02 22570850
Fax: 02 22570850


بالنسبة للـ ABS هو ادري بقي رقم المشكلة كان بيقول ايه.. لكن لو علي كده و هيشتغل تاني مظبوط.. يبقي خلاص.. تمام..
العربيةتمشي عادي من غيره مش ازمة.. بس هو طبعا بيه افضل..
الامان احسن طبعا..

المرايات.. الضم احسن و اشيك.. و سعرهم كويس..

الجلب و الحاجات دي عادية.. و الصيانة برضه.. طبيعي..
كل السيور.. و الزيوت و غسيل دورة التبريد و يفضل تحط مية تبريد محترمة
و تيل فرامل وفلاتر و تيل و الحركات دي كلها..

و بالنسبة بقي لموضوع الرش.. هل العربية مجرحة و مبهدلة يعني؟ ولا ف النعقول؟
انا شايف انها طبعا تسيبها كده و مترشهاش..ممكن تلمعها بوليش وواكس.. و هتبقي زي الفل..
انت شايف اهو ان العربيات دي سعرها بيقع لوحدها.. من غير حاجة.. يبقي حافظ عليها كده افضل..

و ربنا يباركلك و يكرمك فيها ان شاء الله..

المشاركة الأصلية كتبت بواسطة me3mary

متشكر يا أحمد باشا والله يبارك فيك
إن شاء الله هستلم العربية بكرة على ما يخلص المخالفات و نسجل العقد و كده
هطلع على ديافيا اول حاجة اظبط التكييف
و بعد كده على صابر يغير Abs ( كان مطلع اكتر من خطأ على الكمبيوتر و لازم يتغير و تكلفته 1300 جنيه ان شاء الله)
و يعمل بقى الصيانة المعتادة للسيور و الفلاتر و التبريد و التيل وكده
اما شكلها من بره فهى كويسة لكن السقف و الكبوت لونهم محروق زى موديلات الأوبل ( كنت قريت مرة ان دهانات الأوبل مش ثابتة )
لكن انا كنت بقول هرشها بعد فترة لما احس ان حالتها كويسة و تستاهل الواحد يحافظ عليها فترة كبيرة ( ناوى ان شاءالله احتفظ بالعربية خمسة سنوات على الأقل) اللى قبلها كانت لانسر كريستالة و فضلت معايا سنتين .

بالنسبة لموضوع البوية ده..
فده سببه انا لعربية تجميع مصري.. و ده فخر الصناعة المصرية.. و البوية المصرية زبالة..
و ده مش محتاج رش علي فكرة..
الحرق ده عبارة عن ايه؟
الورنيش اللي فوق البوية قشر و لسع..من الشمس و المية و كده..
و الحل ايه؟ سمكري يسحقها كويس قوي..
وييها وش بوليش محترم.. و بعده وش واكس عنيف.. و هتبقي زي الفل..
و تفضل فبريكة زي ما هي..

و ربنا يوفقك ان شاء الله..