الموضوع: تقييم كيا نيوسيراتو (الجزء الأول)

أولا أحب أعتذر لكل الأعضاء و الناس اللي كانت منتظرة التقييم و ده لأسباب خارجة عن ارادتي تماما و اسألكم الدعوة لي.... بحمد الله و فضله استلمت النيوسيراتو و ده الجزء الأول من التقييم قبل 1000 كيلومتر...

قبل التقييم, اول ما استلمت العربية و بعد ما رجعت البيت, حسيت ان الباور ستييرنج تقييل و التكييف مش بيطلع هواء ساقع بسرعة..!!! والله انا كنت في حالة صعبة جداا.. عربيتي الزيرو فيها مشكلة.. روحت التوكيل يوم السبت الصبح و لاقيت كل اللي هناك مستغربين جداا..!!! قولتلهم الباور تقيل جداا!! و ده مستحيييل يكون طبيعي, قاللي ممكن نجربيه؟؟ قولتله ماشي.
طلع بره و جربه و قاللي مافيهوش حاجة هو الباور الهيدروليك كده, قولتلة انا جربت عربية في التوكيل و كانت اخف من كده!!! (بصراحة كانت خليجي و طلع الباور بتاعها كهرباء) بس انا مقولتلوش, قاللي حاضر هنشيك عليها. و كان فيه قبلي عربيتين سيراتو الشيب القديم بيعملو صيانة, راح منزلها قبلهم (انا لسة مستلم من يومين), قعدت في الاستراحة طبعا و قمت اجيب شاي و مكملتش نص الكباية و لقيتهم بيندهو على اسمي (10 دقايق بالظبط)... طلعت و قاللي اتفضل الريبورت و حضرتك متدفعش حاجة في الخزنة, ختم بس... و طلعت استلمها و لقيتها هي هي, قولتلة المشكة موجوده؟؟؟ قالي احنا ظبطنا ضغط الكوتش و الباور دي طبيعته, قولتلة مش مصدق و عايز اجرب عربية من الموجودين في المعرض, جابلي مفتاح عربية اوتوماتيك بس جنط 16 EX و دورت و جربت لقيته هوهو, قولتله مش مقتنع برده.. لاقيت اسطوول سيراتو لسة جاي من المينا و داخل و كان منهم نفس الفئة بتاعتي قولتله هجرب واحدة من دوول قاللي اتفضل.. (اركب جنب العميل يا أحمد و خليه يجرب العربية) و فعلا جربت و هوهو بردو, هتجنن... قاللي والله يا فندم انا معايا سيراتو و الباور القديم اتقل شوية من ده كمان و متنساش ان الجنط 17... سكت و قولتله انا هجرب العربية اللي هناك دي و كانت نسخة من بتاعتي في كل حاجة لون و فئة, جربتها و كانت هي هي برده و بصراحة الراجل كان ذووق جداا و محترم قاللي انت هتاخد ايام و هتتعود عليه و هو هيفك شوية بعد 10 ايام كده... و فعلا اسبوع و خدت عليه و حسييت انه ناعم جداا فعلا (مش زي الكهربا طبعا) بس من وجهة نظري ممتع في سواقته عن الكهربا... و هو ده اول مطب مع التوكيل و عدى بسلام و كانو على قد الثقة اللي وثقتها فيهم بجد...

المواصفات الفنية:-

الموتور
1.6 لتر 4 سلندر 16 صباب ثنائي الكامة بيولد قوة قدرها 124 حصان وعزم دوران قدره 156 نيوتن/م عند 4200 لفة فى الدقيقة.

التجهيزات:-

فرامل ABS و EBD
2 ايرباج
كمبيوتر كامل للسائق و يعرض (تريبA, تريبB, درجة حرارةالسيارة ديجيتال, البنزين المتبقي يكفي لكام كيلو متر, متوسط استهلاك البنزين, متوسط السرعة, الاستهلاك اللحظي للبنزين, عند وصول البنزين الى الاحتياطي يتم التنبيه بشاشة يكتب فيها LOW FUEL و اللمبة بتنور برضو, تحديد اي باب مفتوح مع الانذار بصوت)
امكانية التحكم في الزجاج و اي شئ كهربي في السيارة بعد اطفاء الموتور لمدة 60 ثانية (يعني لو في زجاج نسيت تقفلة و قفلت العربية مش لازم تدور تاني, تقدر تقفلة على طول و العربية مطفية)
حساسات للظلام (تشغل الاضاءة العالية او الواطية تبعا لشدة انارة الطريق)
حساسات ركن (بشاشة في التابلوه اسفل العداد)
مصابيح ضباب
سنتر لوك مع غلق مركزي للأبواب عند بلوغ السيارة سرعة 40 كم/ساعة
مرايات كهرباء باشارات جانبية
نور التابلوه و الكاسيت أحمر و شكله بالليل وهمييييي (شيييك جداا مع العدادات و الفتيس)
زجاج كهرباء ومطلى بطبقة لعكس الاشعة الفوق البنفسجية
تكييف اتوماتيك بشاشة (ممتاز جدا ) وقوى
دريكسون مكسي بالجلد و مطلي بطلاء معدني
فتيس اتوماتيك ستيبترونيك بيد مكسية بالجلد و مطلي بطلاء معدني
راديو - سي دي ام بي ثري بشاشة (اوريجينال) 6 سماعات (صوت نقي و رائع و مجهز بامكانيات عديدة منها التحكم اوتوماتيكيا في الصوت بناء على سرعة السيارة, 3 مستوايات للباس بيس, اكيولايزر 3 باند.....)
وصلة AUX و USB و IPOD
وجود مصابيح فى الشمسيات
قياس درجة الحرارة الخارجية
مقدمة رياضية
جنوط 17 بوصة (215, 45) كومو (5 جنط)
الدريكسون قابل للتعديل
مالتي فانكشن ستيرنج (دركسيون متعدد الوظائف)
مسند يد امامي مكسي بالجلد و خلفي بحامل أكواب
شنطة خلفية واسعة جداا
جيوب للتخزين خلف الكرسيين الأماميين

الشكل الخارجى:-
رائع و رياضي و ايروديناميكي و جذاب جداا و لافت للأنظار بشكل ملحوظ...
ناس كتيير كانو بيوقفوني في الشارع يسألوني عن العربية (معاهم لانسر بومة و النترا و صني و اوبترا و سيراتو الشكل القديم.....) و في واحد معاه جولف 5 و كانت عاجباه العربية جداا بس اكيد مش هيبيعها طبعا بس ده كان رأي واحد راكب جولف 5 في العربية...!!

الشكل الداخلي:-
شييييك جداا و رياضي و العدادات لونها أبيض و لها اضاءة علوية حمراء و مريحة جداا للعين, الكراسي مريحة جداا, الخامات الداخلية من البلاستيك المقوى.....

الموتور:-
هادي جداا و معزول تماما عن المقصورة الداخلية و سحبة أكثر من رائع و الكابوت به عازل حراري...
استهلاك البنزين استهلاك جيد جداا

المميزات:
ثبات ممتاز و رائع و بالأخص على الملفات (جربتها في ملفات المقطم على سرعة 80كم/س) و لا اكني كنت في ملف خطر ولا حاجة, ثبات و اتزان ممتازيييين جدااا
فرامل قوية
تكييف قوى
سحب ممتاز ولا يتاثر كثيرا فى حالة تحميل السيارة بكامل حمولتها من الاشخاص
رؤية داخلية ممتازة
عزل الكابينة جيد جدا وايضا عزل الموتور
عفشتها ناشفة بس مش قوي (بسبب الجنط. 45مم) بس متحسش بالمطبات او عيون القطة
يمكن طى الكنبة الخلفية بالكامل
صندوق الامتعه (الشنطة) حجمها كبير
الكراسي مريحه فى القعدة جداا و اللي قاعد ورا مش حاسس بأي حاجة
ممتعه فى قيادتها و ثقة متناهية بتديهالك العربية

العيوب:-
الضيق النسبي للكنبة الخلفيه (بالنسبة ليه مش مشكلة عشان مش بركب ناس كتير)
العفشة ناشفة بس مش قوي و ده بسبب الجنط 17 (215,45) بس في المقابل ثبات منقطع النظير
صوت أحتكاك الأسفلت بالكوتش انا ملاحظ انه عالي شوية, بس ده ليه حل عند تغيير الكوتش بنجيب الكوتش السيلنس و ده موجود منه نوع ممتاز بريدجستون بس مش فاكر الكود بتاعه, و هسأل لو كان فيه منه كومو او هانكوك, بصراحة دول انضف 3 انواع في مصر من وجهة نظري...

ملخص التقييم
1- الشكل الخارجى 10
2- الشكل الداخلى 9
3- سحب الموتور 9
4- الثبات 10
5- التكييف 9
6- العزل 9
7- نعومة العفشة 8
8- الرؤية الداخلية 10
9- استهلاك البنزين 9
10- الفرامل 10

الاجمالى 93/100

التقييم مقتبس من تقييم الأستاذ أحمد للمازدا 3 مع التعديلات...

بالنسبة للتأمين.... الحمد لله أمنت في كونتاكت (الكارت البرتقالي بنسبة 3.75% من اجمالي ثمن السيارة) و الناس كلها نصحتني بيهم و بأليانز (4.1%) بصراحة.. و ربنا يجعلنا في غنى عنهم ان شاء الله...

و اخيرا و بما اني اعتبر اول واحد تقريبا حجزت العربية في مصر و من اوائل الناس اللي استلموها, انا مقتنع باختياري جدااا و كل يوم بيزيد اعجابي بالعربية أكتر و مش نادم على اختياري ابدا للسيراتو او كيا عموما, و بجد مبحسش ان العربية أقل من اي عربية من اللي الناس بتضرب بيهم المثل (بسم الله ما شاء الله العربية فيها كل اللي تتمناه) بل بحس ان اللي راكبين العربيات دي بتعجب بالعربية جداا و مفيش حد شافها الا و والله اعجب جداا بيها و ده بيدي اي حد احساس بالتميز و طبعا بالرضى و القناعة على الاختيار و اللي قسم بيه ربنا.... و طبعا الحمد لله أولا و أخيرا على كل شئ...

المشاركة الأصلية كتبت بواسطة marawansabry

حمد لله على السلامة .. ومبروك على الاستلام .. وربنا يرزقك خيرها ويكفيك شرها.
انت فين من زمان .. انت وقعت قلب الناس في رجليها .. اللي قال انك بتتخانق في التوكيل .. واللي قال انك استلمت وعايش حياتك .. واللي قال ان التوكيل طلع نصبين وباعوا العربية للموزعين وادوا الناس بمبة..
ما علينا ميش هطول عليك .. الف مبروك .. بس انت قلي بجد العربية الصاج بتعها عامل اية لحسن الناس معظمها بيقول علية ضعيف وميش محمل .. وانت عملت اية مع التوكيل كانوا جدعان معاك ولا كان فية لف ودوران .. وانت استلمت العربية اللون اللي انت عايزة ولا لا (متهيالي التيتانيوم) .. حاجة بقي اخيرة .. ميش انت المفروض في الدفعة التانية اللي المفروض هيبدأ توزيعها الاسبوع اللي جي ولا اية ..
معليش بقي طولت عليك .. وبجد بجد الف مبروك وربنا يبركلك في العروسة (العربية يعني)

اولا الله يبارك فيك يا باشا..

ثانيا لازم الناس تفترض حسن النية الأول لحد ما يثبت العكس... انا كان عندي ظرووف اقوى مني بس الحمد لله الامور احسن دلوقتي و النت عندي بايظ تماما من 15 يوم و بحاول اتابع معاكو من نت كافيه و جت مشكلة اللي اتوهمت بيها بتاعة الباور دي كملت عليه بس الحمد لله كله تمام دلوقتي و طلع موضوع الباور مفيهوش اي مشاكل. و اتمنى ان الناس متزعلش و كمان كنت احب ان العلاقة بنا كلنا متكنش عربية و حلوة و وحشة و بس...

التوكيل والله العظيم اكتر من محترميييين... والله جربت العربية اللي كنت بشاور بس عليها و الناس كانت صبورة جداا و بيتكلمو بكل احترام و ادب و بيديك تقرير عن العربية واللي اتعمل فيها و بتاخده و انت ماشي و بتحطه في الملف بتاع العربية عندك عشان تبقى فاهم كل مسمار في عربيتك في ايه باليوم و الساعة...

العربية صاجها والله ممتاز, اصلا انا جايب الكيا عشان صاجها ناشف جداا و العربية صاجها ناشف بجد و انشف من صاج الهيونداي و محدش يسألني ازاي, لو مش مصدق عات اي عربية كيا و وقفها جنب الهيونداي و شوف بنفسك و سيبك من كلامي خاالص, عايز اقولكو ان اغلبية اللي سألوني على سعر العربية و حلوة ولا لأ معاهم النترا..!!!

انا استلمت في الدفعة الأولى مش التانية و هي جت كده, كلموني قلولي لو تحب تستلم عربيتك جاهزة و اللون اللي طلبته (تيتانيوم سيلفر) SX... اكيد قولت على بركة الله

التوكيل كانو معايا في غاية الصراحة ولا كان فيه لف ولا دوران خااالص... حتى في موضوع الباور, الناس مكدبتش او قالو اي كلام, واللي يرضيني الناس عملته و أكتر... طيب ايه تاني؟؟؟؟ التوكيل طلع عند حسن ظني فيه جداا بصراحة من وجهة نظري و العربية طلعت (بسم الله ما شاء الله ولا قوة الا بالله) عند حسن ظني و زي ما توقعت و حسبتها قبل ما اشتري و يمكن اكتر...

و هحاول اتابع معاكو عشان ارد على كل الأسئلة او الاستفسارات, او اي سوء تفاهم...