الموضوع: اخيرا لقيت حد بينضف رشاشات كويس وقريب

السلام عليكم ورحمة الله وبركاته

اخيرا وبعد طول تدوير لقيت واحد فى المعادى بينضف الرشاشات بجهاز الالتراسونيك والحمد لله كل مشاكلى انتهت بعد التنضيف.

اليكم الاحداث بالتفصيل الملل اولا هابدأ بالمشاكل الى كنت باعانى منها كانت العربية بتبرجل مع انى ظابط كل حاجة كهربا وهوا الموتور ومغير الفلاتر والبوجيهات وسلوك البوجيهات والموبينة والمشط وكانت فيه نتشات بين النقلات (الفتيس اوتوماتيك) والنتشات كانت جامدة جدا وبتعمل خبط لدرجة انى حسيت ان الفتيس فيه حاجة بايظة بس الى كان بيأكدلى ان ده مش صح انى لما باحط منظف الرشاشات بتاع موبيل الاعراض دى كانت بتروح تماما لمدة اسبوع وترجع تانى وبعدين كانت العربية بتاكل بنزين بغباوة (27 لتر فى 200 كيلو بس انا طريقى زحمة شويتين والموتور 1800 - فيصل كل يوم رايح جاى بس برضه الاستهلاك مش كدة) وكمان كنت لما بادوس فرامل العربية بتبرجل خالص وال rpm بينزل تحت الواحد بكتير لدرجة ان العربية كانت بتتخنق وتبطل احيانا لما بادوس فرامل

قعدت ادور على حد بينضف رشاشات مافيش حد يغير رشاشات مالقيتش غير استيراد وحسيت انهم مش هايفرقوا كتير عن الى عندى فهايبقى خسارة فيهم الفلوس رحت لبتاع البى ام الى بعد المريوطية قاللى الاربعة ب 300 جنيه ومش متأكد انهم هايركبوا عندى ولا لأ ( وده سؤال للاساتذة هنا فى المنتدى الرشاشات الى عندى زى بتاعت الالنترا القديمة يركب عليهم بتوع البى ام (M40) ولا لأ ؟؟؟)

المهم رحت سألت على الراجل الى فى التعاون الى بينضف رشاشات كانى بادور على شبح ماحدش يعرف هو فين بس كل الميكانيكية سمعوا عنه بس مايعرفوش طريقه.

المهم كنت فى المعادى يوم السبت الى فات ومعدى على ميكانيكى معرفه قلت اسأله مش هاخسر حاجة تعرفش حد يا عم شادى بينضف رشاشات ؟؟ ايوة ياباشا الاسطى مدحت فى الشارع الى ورانا .... يا كرم الله فى الشارع الى ورانا وانا ماعرفش والله لاروحله دلوقتى...

المهم الاسطى مدحت طلع عنده جهاز الالترا سونيك ده :







وبيقوم بعمل قياس للرشاشات الاربعة فى البداية ويحدد ازا ما كانت حالتها تصلح للتنظيف ولا لأ ( حسب مافهمت منه ان الرشاش السايب خالص يعنى زى الحنفية كدة والرشاش المقفول خالص ماينفعوش يتصلحو الى ممكن يتصلح لو فيه سدد جزئى او لو بيرش اقل او اكتر من المعدل الطبيعى) المهم بيتعمل لهم اختبارات للتأكد من سلامتهم وفى نفس الوقت بيعرف منن فاتح او قافل اكتر من الباقيين وبيمشى فيهم سائل للتنضيف والجهاز بيضخه بسرعات مختلفة وبشكل عكسى بطريقة ما انا طبعا مافهمتهاش قوى وبعد كدة بيدخل على مرحلة الالترا سونيك ودى بيحط فيها الرشاشات فى سائل فى حوض خاص



وبيوصلهم وبيمرر فى السائل ده موجات الالتراسونيك لمدة طويلة تتغير حسب قذارة الرشاش (انا رشاشاتى قعدت ساعة ونص) وبعدين بيدخلها مرحلة الاصلاح علشان يظبط الرش الخارج من كل واحد منهم مع الباقيين ويركبهم تانى فى المكان الاول ويديهم نفس السائل ويتاكد من ان الكميات الى طالعة منهم متظبطة مع بعض والمخروط بتاع الرش سليم وكلهم زى بعض وبعد كدة يتوكل على الله ويركب الرشاشات وتطلع تجرب وتبقى تدعيلى لانى عرفتك على الراجل ده.

الرشاشات بعد التنضيف







نسيت اقولكوا عنوان الورشة 15 شارع التعاون خلف مكتب صحة المعادى
وموبايل الاسطى مدحت 0109712688
(بالمناسبة الموضوع اتكلف 100 جنيه بالتمام والكمال بس كانى اشتريت عربية جديدة بال 100 جنيه دول فرق رهيب بين قبل وبعد)

المهم طبعا بعد التجربة 4 ايام عملت فيهم 250 كيلو الاستهلاك بقى 24 لتر يعنى تقريبا استهلاك مثالى وتليفونى اهو لو حد حب يستفسر عن اى حاجة 0103996099

الموضوع كلة من اولة لآخرة اخد كام ساعة
وياترى هو زحمة ولا مش اوى... ويبنفع يشتغل فى اكتر من عربية فى نفس الوقت؟
يعنى الواحد لو راح يوم جمعة مثلا ولقى كام عربية هيستنى الدور ولا اية النظام؟؟
وشكرا على الافادة
جزاك الله خير