الطريق الدائري بالمنصورة ... كفاية حرااااااااام عليكم ... التهريج دا اخرته اية ؟؟؟

**M.Osman** · 21-04-2009 11:13 PM

السلام عليكم ....

بصراحة مش عارف اقول اية ...

بس بجد اللي بيحصل ده قمة في التهريج و التسيب و عدم الإنضباط و اللي في رأيي بيكون نتيجته ارواح و ممتلكات ناس...

رسالة الى وضع قوانين المرور الجديدة ... بجد انا عايزك تيجي تتفرج على اللي بيحصل في الطريق الدائري في المنصورة ... (( نكـــــــــــــــــــــت بصراحة )) !!

و من مظاهر التسيب و التهريج الآتي :

- طبعاً الطريق اصبح مفيش فيه مطبات غير عند اكاديمية السلاب ... غير كدا الطريق سريع و البقاء للأقوى ( او الأسرع !! )

-طبعاً لو لقيت يوتيرن (u turn) لازم تقف في الحارة السريعة عشان تلف ... و طبعا العربيات النقل بتكون ماشية على 90 كم كأقل تقدير... و يا سلام لو عربية واقفة عشان تلف اليوتيرن ... تلاقى العربية النقل خدت غرزة كأن اللي سايق سايق توك توك مثلاً ....

-عربيات واقفة على يمين الطريق في الملفات ( مهما كان السبب في ده تهريج ..) خاصة ان الطريق اساساً حارتين فقط !!

-عربيات كارروا ماشية عكس الإتجاه و في الإتجاه و اخرى واقفة عشان تلف اليوتيرن !!!!!

-عربيات بتمشي في عكس الإتجاه .. و اصبح الموضوع شئ عادي ... لأن مكان اليوتيرن هناك مناسب انه يختصر .. فأصبح عادييييي جدا انك تلاقيي واحد ماشي عكس الإتجاه في المنطقة دي ( طبعا شباب المنصورة الصورة واضحة عندهم .. )

-اعمدة النور: و أنا جاي من الكلية النهاردة ( الساعة 4.30 عصرا ) الأعمدة كلها منورة !! و لسة من يومين مروح من عالطريق المتخلف دا بالليل و الأعمدة كلها مطفية و الطريق دا بصراحة من غير أنوار متسوقش عليه ... ( مفيش حاجة في نص الطريق تمنع ضوء اللي جاي في الإتجاه الآخر )

- آخر حاجة كانت النهاردة ... و هي دي اللي خلتنى افتح التوبيك دا.. توك توك على الطريق الدائري ... طبعاً في طريق سريع زي ده اصبح الموضوع مألوف ... لكن لما يكون شايل انبوبة بوتاجاز كمان يبقى كدا كتييييييييييييير اوي اوي ...

((((( نفسي بس المسؤلين عن المرور قبل ما يحاسبوا الناس و يشوفوا التهريج و التسيب اللي هما مش عارفين يضبطوه )))))

**ابوهاشم** · 22-04-2009 01:26 AM

ربنا يكون فى عونك

**Samah AbdAllah** · 22-04-2009 01:50 AM

هو الطريق الدائرى بس اللى فى المنصورة وطرق تانية كتير محتاجة تتظبط وتضاء ويبقا عليها شوية رقابة زى الطريق اللى بيوصل لدكرنس رغم كثرة الحوادث اللى بتحصل فيها وشباب كتير وطلبة راحوا ضحيته الا انه لحد الان مفيش اى اهتمام

**zAzU** · 22-04-2009 04:30 AM

معاكوا حق والله الطريق ده فعلا مينفعش كده ابدا و الاوحش منه طريق المنصوره القاهره و التوكتوك ده كارثه والله انا اخر مره كنت على الطريق شفت موقف مسخره الطريق حارتين و مقطورتين ماشين جنب بعض و انا وراهم مستنى يفتحوا الطريق لقيت توكتوك داخل من بينهم عادى جدا و مكمل ولا فى دماغه اى حاجه وبيزمر و مشغل طقم الصوت و احلى كلام ههههههههههه

**ehabbasha30** · 22-04-2009 01:42 PM

انا كنت عامل موضوع برضو عن الطريق الدائرى بتاع المنصورة دة
الصراحة اللى خطط الطريق دة عبأرى عبأرى بعنى مش اى كلام

**أبو عبدالله** · 22-04-2009 02:08 PM

المنصورة محافظة ليس بها مرور من اساسه
بجد والله مفيش مرور فعلا في المنصورة
حاجه تقرف بجد

**ainshouka** · 22-04-2009 03:54 PM

هو بص هو مفيش فايده حاليا دلوقتى ان الحال يتصلح فى مصر لان بصراحه هى البلد كلها بترجع لورا فالذى تراه فى الشوارع دا جزء من كل البوظان اللى مالى البلد
بس زى مابيقولولى دايما خليك باااااااااااااااااااااااا ااااااااارد جدا فى السواقه متحاولش تحاسب الناس على اخطاءهم وهى بتسوق لان حضرتك مش حتخلص وحتلاقى نفسك بتتنرفز وبتضايق وياسلام لو انت متجوز مثلا متلقيش غير المسكينه اللى قاعده فى البيت عشان تطلع فيها غضبك (أنا مش ميت مره قلت بلاش مكرونه -دى سبانخ ياحبيبى- تانى سبانخ تانى سبانخ)
هو صحيح انك تكون بارد وانت بتسوق مش حاجه سهله بس حاول دايما انك تكون اهدى من اليوم اللى قبله
انا كنت عصبى جامد جدا على سواقين الميكروباص ولقيت نفسى مش حخلص قمت مكبر واللى عاوزين يعملوه يعملوه وبحااول امشى مظبوط على قد مبقدر علشان حياتى تعرف تستمر

لانك حتلاقى كمان بتوع المرور فيه كتير منهم متقبضين يعنى حتى لو جم فى الدائرى اللى عندكوا دا هما اول اسبوعين لغايه ميتعرفوا على السواقين عندكوا وحتلاقيه انيل من الاول

وفى النهايه خليك انت الصح يمكن حد منهم من مبيفهموش فى السواقه يشوفك وانت سايق محترم فى سواقتك يمكن يتعدى منك

**mandoxxt** · 22-04-2009 03:59 PM

المشكلة انهم لما جم يصلحوا الطريق دا موسعهوش وسابوه ضيق مع انهم كان ممكن يوسعوه قبل ما يتبنى فى الاراضى اللى لسة فاضية. وبعدين شالوا ليه المطبات ولغوا كل اليوتيرنات مسابوش الا واحد يعنى اللى طالع مثلا من شارع أحمد ماهر عشان يلف لازم يمشى لحد كوبرى الجامعة ويروح يلف من هناك... الطريق دا لو اتوسع واتنظم هيخف الزحمة جوة المنصورة بس مين المحافظ الجديد اشتغل له شهرين وبعدين سكت خالص خاص كفاية شارع اداب اللى لسة الناس بتمشى فيه على راحتها مع ان المفروض يشيلوا الحارة اللى لسة فى النص

**mandoxxt** · 22-04-2009 04:07 PM

المشاركة الأصلية كتبت بواسطة BASKOTA

هو الطريق الدائرى بس اللى فى المنصورة وطرق تانية كتير محتاجة تتظبط وتضاء ويبقا عليها شوية رقابة زى الطريق اللى بيوصل لدكرنس رغم كثرة الحوادث اللى بتحصل فيها وشباب كتير وطلبة راحوا ضحيته الا انه لحد الان مفيش اى اهتمام

الطريق دا لو مايكل شوماخر ساق عليه هيتبهدل كفاية ان الواحد يبقى ماشى يلاقى 3 ميكروباصات بيعدوا بعض

-

الموضوع: الطريق الدائري بالمنصورة ... كفاية حرااااااااام عليكم ... التهريج دا اخرته اية ؟؟؟

LinkBack

أدوات الموضوع

عرض

-

-

-

-

-

المواضيع المتشابهه

لعنة الطريق الدائري مازالت تطاردنا ، حادث جديد على الدائري.القطامية

انا مشيت عكس علي الدائري في نص الطريق

احذروا الطريق الدائرى بالمنصورة ؟

الطريق الدائري

تحذير من الطريق الدائري بالمنصورة (هام جداً جداً)

الكلمات الدلالية لهذا الموضوع

المفضلات

المفضلات

ضوابط المشاركة