الموضوع: حصر أسباب حوادث السيارات التي تعرض لها أعضاء المنتدي.

حأبدأ بنفسي :
انا عملن 4 حوادث.

1- سرعه متهوره : في طريق زراعي ضيق كنت ماشي 130 كم/س وفوجئت بملف... والعربيه كانت فيات 132 وبتخطف شمال مع الفرمله. العربيه نزلت علي التراب وماعرفتش أتحكم فيها لفت 4 لفات علي الطريق واتقلبت علي جنبها. والحمد لله ماكنش في اصابات والفضل لله اولا واخيرآ. بس طبعآ العربيه اتبهدلت.
سبب اني كنت باجري. لني كنت متأخر علي ميعاد هام جدآ (ولكني برده مارحتش )
سبب الحادثه (خطأ مني - خلل في السياره (الخطفه الشمال وعلبة الدركسيون) - السرعه المتهوره )

2- خطأ من السائق: أول حادثه عملتها وكانت بفيات 128 في مخرج القاهره والدنيا مطره والطرق زحمه... كنت باسمع اغنيه لاصاله وحبيت ارجع الاغنيه. ويادوب رفعت عيني من علي السي دي لاقيت عربيه 125 قدامي بيضرب فرامل. طبعآ عقبال ما ضربت فرامل. العربيه زحفت وخبطت في ال 125 واتبهدلت جدآ. مع اني كنت ماشي 40 كم/س.

3- خطأ من الغير وخلل في السيارة.
بال 128 والكلاكس كان عطلان وكنت راجع من القاهره والدنيا مطره وماشي 70/80.
كان قدامي تكتك وانا شايفه من بعيد اديت له نور وباعديه من الشمال (لكنه كان عايش مع طقم الصوت ومش باصص في المرايه وقام كاسر شمال علشان يلف.
المهم ماقدرتش افاديه مع السرعه وهو بيلف من الثبات وكان بيني وبينه مافيش 5 متر.
كسرت شمال في يمين لكن المسافه ما سعفتنيش وخبطته من قدام.
والحمد لله جت سليمه ومافيش اصابات. بس التكتك ما بقاش يسوي فلوس لف زي الفريره وقام زاحف علي الرصيف.

4- خلل في السياره:
العربيه ماكنش فيها فرامل : 132 وخبطت طفل صغير (مع انه هو اللي جري قدام العربيه... .بس برده لو العربيه كان فيها فرامل. يللا الحمد لله جت سليمه ورنا ستر.



الخلاصه:
- حزام الامان بالنسبة لي واللي معايا بقي مهم جدآ.
- لابد من فحص السياره كويس قبل السفر ولو فيها خلل بامسك اليمين وامشي براحتي جدآ.
- معايا لانوس دلوقتي والحمد لله مافيهاش غلطه ومع ذلك استحاله بعدي ال 100 الا مره واحد (بعد ما اشتريتها كنت باجرب سحبها وجبت 135 ونزلت تاني لل 100 ) ومتوسط المشي 80/90

الحادثه الى عملتها تندرج فى بند سادس
غباء الاخرين

انا فيه سبب حادثة عايز اضيفه منفردا

اسمه الميكروبااااااااااااااااا اصااااااات
او كما يطلق البعض عليها الميكرو باظظظظظظظظظظظظظظظظ
تحياتي علي الموضوع الممتاز
متابع باهتمام

يا جماعه الموضوع استطلاعي وارشادي في نفس الوقت...

ياريت كل اللي يشارك في الاستطلاع يقول لنا موجز لحادثه عملها وخلاصة تجربته واللي استفاده ( ولا بترجع ريما لعادتها القديمه )...

كانت حاجة غريبة
كنت راجع من مرسى مطروح للمنصورة وفاضل 10 كيلو بس وأوصل يعني مشيت حوالي 450 كيلو
رباط الحذاء عمل عقدة عجيبة ولف بطريقة غريبة على دواسة البنزين
بشيل رجلي من البنزين عشان اهدي بالفرامل عند مطب معرفتش ولقيت رجلي لازقة في دواسة البنزين ورحت خابط اللي قدامي بس الحمد لله كانت بسيطة
صدقوني مستحيل تتكرر غير زي مابيقولوا بتوع الإحصاء غير واحد في المئة مليون

وفي واحد اعرفه عمل حدثة بسبب زجاجة مياه معدنبة اتزحلقت ورا الفرامل

الحمد لله على كل حاجة

السلام عليكم ورحمة الله وبركاته
اولا احب اشكر المهندس محمود على فتح الموضوع الشيق ده
اللى اكيد كلنا هنستفيد منه لانه كله عباره عن تجارب مرت بها الاعضاء
واحنا على قد مانقدر ناخد الحزر من التجارب دى
لان فى الاخر الحزر لايمنع قدر وقدر الله وماشاء فعل
بالنسبه ليا مرت عليا كام حادثه وكانت من اخطاء الغير