المشاركة الأصلية كتبت بواسطة ahit
السلام عليكم و رحمة الله و بركاته
ربنا إن شاء الله هايديك عربية ممتاز بس المهم الصبر و عدم التسرع
و أنا فى رأى المتواضع إنك تشوف العربية اللى أساسياتها سليمة و تكون مريحاك نفسياً و ماتصرفش عليها كتير لأن شراء العبد ولا تربيته (صدقنى ) لأن للأسف غالبية الصنايعية بيفتوا و بس و هاتغلب معاهم و هايقرفوك و هاتصرف كتير لأنهم مش بيحلوا المشاكل من جذورها .
و فرامل اليد مهمه جداً طبعاً و كمان العدادات و نور الصالون و نور العدادات و نظافة الصالون و العربية بصفة عامة.
و بالنسبة لتقويس العجل فهو فى كل العربيات البيتلز 1300 و الموضوع مختلف شوية بالنسبة لموديلات 1302 و 1303 , و على فكرة لو كان التقويس زيادة عن اللزوم فده هياكل الكاوتش الخلفى بسرعة لأن فيه نسب معينة لإرتفاع العربية لو إتغيرت بتبوظ و تبرجل حاجات كتير و عن تجربة لأنى رفعت عربيتى شوية من ورا شمال بس فده خلا قدام يمين أوطى من قدام شمال و ده عشان الميكانيكى كان زبالة بجد !!!
و ربنا يقدملك اللى فيه الخير و ماتتسرعش و أصبر و كمان الأسعار اليومين دول فى النازل و ممكن تجيب حالة ممتازة و بسعر ممتاز إن شاء الله.
و طبعاً مع كل الإحترام و التقدير لكل الآراء السابقة و لأصحابها
أخوكم أحمد حسن