مجموعة مشاكل فجأه حصلت

**msobhy** · 23-04-2009 02:52 PM

الى كل اخوانى فى المنتدى ارجو المساعدة
الموضوع بدء [ان العربية أداءها بقى زى الزفت - صوت الموتور عالى - سحب زى الزفت - استهلاك بنزين عالى من الاخر بقيت قرفان انى اركبها
المهم بدأت الصيانات - تنظيف البوابة - تنظيف المينفوالد - عمل ليرنينج اكتر من مره للتأكد من فعاليتة وديه المشاكل اللى حصلت واكتشفتها
1- البوجيه رقم 3 (على اعتبار اللى جنب الموبينه رقم 1) معرق زيت
2- وانا بافك البوابه علشان تنظيف المينفولد لقيد الماسورة الصغيره بتاعت الميه(يوجد ماسوره على شكل حرف U مقلوب للمياه داخل وخارج) متأكله جدا وبعد التنظيف بقت بتسرب ميه بشكل مقرف
3- سحب العربية سيئ للغاية وببشاعة واقصى سرعة عرفت اجيبها كانت 140 بالعافية
4- صوت الموتور بقى عالى جدا بشكل مقرف حتى بعد التنظيف
5-التكييف هو كمان بقى بيستهبل - بيشتغل مدة 10 دقائق لغاية لما يبدأ يسقع وبعد كده بيفصل خاااااااااااااالص ولازم اطفيه واسيبه 10 ثوانى واشغله تانى
بجد انا زهقاااااااان موووووووووووووووووووووووو ووووووت

**nasroo** · 23-04-2009 03:49 PM

طب ده كله حصل فجأة كده بعد ما نضفت البوابة؟؟؟

**samirayad** · 23-04-2009 03:56 PM

المشاركة الأصلية كتبت بواسطة moudy88

مفيش حاجه هقدر اضيفها لك واستنى شويه لحد لما البشمهندس سمير يرد عليك وربنا يصلح احوالك إن شاء الله

شكرا أخى الفاضل : المهندس مودى......وعلى فكره أنا رديت عليك الأول ....طبعا لأشكرك على زوقك قبل التفكير فى الموضوع والتفكير مع أخونا / محمد صبحى (أبو مروان )

**piezo** · 23-04-2009 03:58 PM

العربيه نوعها ايه الاول ده اول حاجه
تاني حاجه حكاية البوجيه الي بيعرق زيت ديه لازم تروح لمكانيكي يشوف ايه سببه و هل العربيه في دخنه من وراي ولا لا لان ممكن تعريق الزيت ده سببه حاجه من تلاته يا كوتش الصبابات يا اما طقم الشنبر يا اما جوان غطا التيكهات وجوان غطا التكيهات ده انا مستبعده
انا رائي تقيس كبس الماتور في الاول لو طلع تمام و مفهوش اي مشاكل يبقي كده نستبعد طقم شنبر وهنا المشكله ممكن في وش السلندر
وعندي سؤال كده في النص معلش العربيه ديه سخنت منك والي خلاني اقول كده الخرطوم الي بيسرب ميه ؟
ده بالنسبه للبوجيه الي عليه زيت

بالنسبه لخرطوم المايه الي بيسرب حاجه من الاتنين يا الخرطوم ده بذات نفسه مشروخ شرخ ليسه صغير يا اما الافيذ الي مربوط بيه الخرطوم عايز يتغير فالحل انك لو عرفت تفك الخرطوم ده بره و تكشف عليه كويس لو لقيته تمام و كل حاجه نضف المكانين الي بيركب فيهم الخرطوم و حط سيلكون و غير الافيزين الي هاتربط بيهم و إن شاء الله مايكونش فيه تسريب و لو عرفت تغير الخطوم بواحد تاني نفس المقاس و نفس الشكل يكون احسن و اريحلك

التكيف بقي ده مش عارف ايه مشكلته ؟؟؟؟؟؟؟؟؟؟؟؟؟؟؟
وبرده شوف راي المهندس الكبير محمد ممدوح برده

**samirayad** · 23-04-2009 04:17 PM

1- البوجيه رقم 3 (على اعتبار اللى جنب الموبينه رقم 1) معرق زيت

_ فى البدايه ....كان الله فى العون وربنا يصلح لك ولنا الأحوال....آمين يارب

_ موضوع تعريق زيت على أى بوجيه بيكون سببه تلف سيلات الصبابات (لأن الزيت بينزل عليه من عند حوض التاكيهات )

2- وانا بافك البوابه علشان تنظيف المينفولد لقيد الماسورة الصغيره بتاعت الميه(يوجد ماسوره على شكل حرف U مقلوب للمياه داخل وخارج) متأكله جدا وبعد التنظيف بقت بتسرب ميه بشكل مقرف

أعتقد الماسوره دى بتاعت ذهاب جزء من مية التبريد بعد الخروج من رأس السلندر الى مسارها فى سربنتينة التكييف (اللى وراء التابلوه )....دا اللى قدرت أتخيله من وصفك (لأن عندى فى النوبيرا ....خرج رأس السلندر بتأخد منه فرع رفيع الى سربنتينة التكييف )......وأعتقد ممكن تغيرها .0......أو تصنع بديل بنفس القطر ...وأعتقد دى مش مشكله كبيره أوى ...............

3- سحب العربية سيئ للغاية وببشاعة واقصى سرعة عرفت اجيبها كانت 140 بالعافية

ماهو سحب العربيه وحش بسبب سيلات أو كاوتش الصباب عاوز يتغير .....وممكن تكون محتاج روديه كمان لتحسين كفاءة حبك غرف الحريق من فوق (عند الصبابات )

4- صوت الموتور بقى عالى جدا بشكل مقرف حتى بعد التنظيف

صوت الموتور العالى حاليا ممكن يكون بسبب تسرب جزء من الحريق الى منطقة التاكيهات (على أساس ممكن تكون البلوف عاوزه روديه أو تتغير ....وده أنا متوقعه )....

_ على أساس لما بيهرب حريق لمنطقة التاكيهات فى نهايه شوط الأنضغاط وبداية شوط التمدد .
....ممكن يكون بيحل الزيت اللى فوق شويه وبكده بتقل كفاءة الكستبانات ....وهنا الصوت حيزيد....._ وكشفك على رأس السلندر مع عمل الروديه وتغيير كاوتش الصباب حيحللك كل المشاكل بأذن الله..........

_ وخلينا فى الموضوع ده الأول ......وخللى تفكيرنا فى التكييف بعدين......وأعتقد لو غيرت كتاوت كلاتش التكييف ببتاع الفوجات لو كان زيه ....ممكن آداءه ينظبط ( على أساس ممكن يكون الكتاوت بيفصل بعد فتره ....علشان ملفه بدأ يتعب مثلا )

**ehab4367** · 23-04-2009 06:41 PM

هى العربية موديل كام يا باشا؟؟؟

**msobhy** · 24-04-2009 01:37 AM

المشاركة الأصلية كتبت بواسطة ehab4367

هى العربية موديل كام يا باشا؟؟؟

حضرتك انا عربيتى لانوس 1 - موديل 2000 - والكلام ده مكتوب فى البروفيل بتاعى - اضيف ان العربية عاملة 98000 كيلو

المشاركة الأصلية كتبت بواسطة nasroo

طب ده كله حصل فجأة كده بعد ما نضفت البوابة؟؟؟

طبعا لأ حضرتك لكن انا كان عندى مشاكل وعليها انا حاولت اعمل الصيانات ديه لأنقاذ ما يمكن انقاذه