التكييف عطلان .. والمشكلة من الكمبروسور

السلام عليكم

تحيتي لجميع أعضاء المنتدى الكرام :S_thum1[1]:

المشكلة أن التكييف عطلان من أول ما جبت العربية من 9 شهور .. كان مشحون أول ما استلمتها وتمام التمام .. وكلها 3 أسابيع والفريون هرب

ومن ساعتها وأنا متجاهل المشكلة دي لحد النهاردة قولت اكشف وأشوف المشكلة منين .. والنتيجة أن الكمبروسور نفسة بيسرب من كذا مكان .. والكلام ده من مكانين مختلفين ضغطوا الدايره هوا .. و بيقولوا غير الكمبروسور بواحد استيراد مستعمل (400 - 500 جنيه) .. لأن طقم الاصلاح نتائجه مش مضمونة و هيسرب برده بعد فترة

ايه راي أساتذتنا الكرام في الكلام ده

فعلاً أوفر لك غيّر الكمبريسور
مّريت بالتجربة المريرة دي من 7 سنين كان معايا ماتيز من و هي زيرو و الكمبريسور باظ
بعد ما دوخت بيه و صرفت محاولات إصلاح و شحن فريون , في الأخر جبت واحد إستيراد و كان الفرق بين السماء و الأرض (إستهلاك بنزين , سحب العربية).
بالتوفيق إن شاء الله.

توكل علي الله وغيره افضل من التعب كل شويه

لان الصراحه حتي لو العيب او العطل يمكن اصلاحه لكن الذهاب كل شويه للميكانيكي بيزهق

فانت خدها من قصيرها وغيره افضل وان شاء الله خير

عن تجربة مريت بيها فى سيارة لانوس من فترة وغرمت فيها كتير الحل الصح اذا كان الامكانات تسمح هات جديد واذا كنت عايز تلم الموضوع الاستيراد مش وحش هيشتغل كويس بس خده على التجربة واشرط على البائع بانه على التجربة
وسيبك من حكاية طقم الاصلاح لانك هتغرم ومش هتلاقى نتيجة
واعمل الكلام ده عند فنى فاهم
لاننى فى السيارة اللانوس هذه حظى وقعنى مع واحد بتاع تكييف باين كان لسة بيتعلم كنت رحت لكذا واحد وحددولى العيب فى الكمبروسر ولما وقعت مع ده قال نفس السبب العيب فى الكمبروسر فقلت له ما هو الحل قال نجيب واحد استيراد من عند ابوهاشم وراح معى وجبنا الكمبروسر وقبل مايركبه عمل شوية حاجات وقاللى بانضف الدايرة قلت له نضف براحتك وبعدين ركبه وشحن وشغل العربية وعشان التكييف يقول حاجة بعد دقيقة واتنين وعشرة مفيش حاجة قاللى ده الكمبروسور كبسه ضعيف ؟؟؟
قلت ماالحل قاال هافكه وارجعه لابوهاشم ونجيب غيره ورحنا وتكرر نفس اللى حصل مع الكمبروسور الاولانى قلت له ايه ياعم هو كل الكمبروسورات بايظة قال ماهو الاستيراد مش مضمون قلت له ايه الحل قال نرجعه قلت له وبعدين قال نشترى جديد من المنير قلت انا معاك
ورحنا للراجل ابوهاشم ورجعنا الكباس زى ماقاله والراجل كان مستغرب ( ابوهاشم) وقال ان الكباس سليم ومع ذلك خدوا الفلوس واخدت الفلوس وساعتها كان 750جم وكان اليوم خلص الساعة كانت وصلت 11مساء وانا كنت تعبت وبعدين قلت له خلاص هجيلك الصبح انت عايز فلوس قال انا شحنت مرتين ب300 جم قلت خد 100 وبعدين نتحاسب
ورحت الصبح على الورشة عشان اخلص من الحوار ده اخدته ورحنا على المنير زى ما قال وجبنا واحد جديد بكرتونته 1150جم وراح الورشة وركب الجديد وكانت المفاجاة بعد ماشحن ؟؟؟؟؟؟؟؟؟؟؟
نفس اللى حصل مع الكباسين السابقين
قلت له ايه ياعم هو الجديد كمان بايظ قال ايوه كبسه وحش وهى دى الحاجات الجديدة مش اصلية وبتبقى مضروبه ؟؟؟
قلت له انت حيرتنى نعمل ايه قال هفك التابلوه واكشف على الكويل وعلى الاكسبنشن يمكن يكون فيهم حاجة ؟
وانت ليك فى فك التابلوه قال هاجيب كهربائى بس انت تحاسبه طيب ياعم والكهربائى هياخد كام قال بياخد 70جم قلت له وهايعرف يرجع التابلوه مكانه قال دى اضمنها
وفعلا حضر البيه الكهربائى على الموتسيكل امام الورشة وفك التابلوه وهو بيفكه قلبى وقع وقلت يعوض عليا ربنا المنظر بعد الفك ربنا مايوريه لحد منظر يخض وقلت ازاى هيرجع السلوك دى كلها مكتنها تانى ولا الفيش دى بتاع التابلوه حاجة تخض
وبعد ماخلص الكهربائى بدا عمنا الاسطى بتاع التكييف يمارس هوايته فى الاختبارات وتوصل الى ان الاكسبنشن بايظ قلت له اشترى واحد جديد واشتريت واحد جديد ب250 من المنير ؟؟؟
وركب وشحن وشغل والنتيجة صفر ؟؟؟؟؟؟؟؟؟؟؟؟؟؟
ياههههههه ايه اليوم ده قطع التكييف واللى اخترعه وبعدين قال كده انا اتأكدت ان الكمبروسر بايظ هفكه وارجعه للمنير وتعالى معى قلت هاتقله ايه قال هاقله كباسك بايظ ؟؟
ورحنا لاحمد المنير وقاله الكباس ده وحش فرد عليه المنير وحش ازاى قاله مابيسقعش قاله وطلباتك ايه قاله غيره لينا قاله المنير انا اغيره لو كان فعلا بايظ ولكن الكباسات اللى عندى زى الفل
اللى بايظ هو انت واللى علمك التكييف ظلمك لانك مش صنايعى ماعندكش فكرة ووجه لى المنير الكلام وقال انا هابعتك لواحد ممتاز بالكباس ولو طلع وحش المصاريف كلها عليا وماتحسبوش الا لما التكييف يشتغل ومشى الحمار اللى عامل فيها صنايعى وسيبك منه
وفعلا رحت للراجل اللى قال عليه المنير وفى خلال ساعة الراجل خلى التكييف بقى تلاجة لدرجة لاتتحملها وبقى زى الفل ورجعت للمنير وقلت له شكرا على ذوقك
اردت من خلال ذلك واسف على التطويل النصيحه لك ولكل الاخوه
والظاهر حظى دايما بانشن على صنايعية نصف كم الدنيا حظوظ

اقتباس:

---

المشكلة أن التكييف عطلان من أول ما جبت العربية من 9 شهور .. كان مشحون أول ما استلمتها وتمام التمام .. وكلها 3 أسابيع والفريون هرب

---

طيب كده كويس ...بمعنى أن الكمبروسور كان شغال وكويس وقت شرائك للسياره وكبسه تمام لمدة ثلاث أسابيع كامله.......وبعد كده هرب الفريون ( وحنشوف باقى الكلام اللى جاى )

اقتباس:

---

والنتيجة أن الكمبروسور نفسة بيسرب من كذا مكان .. والكلام ده من مكانين مختلفين ضغطوا الدايره هوا .. و بيقولوا غير الكمبروسور بواحد استيراد مستعمل (400 - 500 جنيه) .. لأن طقم الاصلاح نتائجه مش مضمونة و هيسرب برده بعد فترة

---

على الرغم أنك شيكت على التسريب فى الدايره فى مكانين مختلفين .....ومش عارف ليه أنا مش مقتنع بحتة أن الكمبروسور نفسه بيهرب من مكانين زى مابتقول.......والى أعرفه أن الكمبروسور عندنا من النوع الدوار ( قلب لامحورى راكب جوه شميز وبيلف ونتيجة الامحوريه بيكون فيه مكان لسحب الفريون اللى فى صورة غازضغطه ضعيف وجاى من السربنتيه ...اللى بيقولوا عليها الثلاجه.......والطرد بيكون رايح فى صورة غاز ضغطه عالى للمكثف ....اللى أمام ردياتير المحرك )

_ والمفروض الفريون مايتسربش من الدايره من خلال الكمبروسور ......لو حتى كان الكبس ضعيف بسبب تفويت داخلى فى الكمبروسور نفسه......وده اللى ممكن يحصل للكمبروسور (وهو ضعف الكبس )

_ أما التسريب بيحصل من ماسوره مخرومه فى ثلاجة التكييف أوماسورة فى المكثف أو منطقه أخرى وهكذا......

اقتباس:

---

وفعلا رحت للراجل اللى قال عليه المنير وفى خلال ساعة الراجل خلى التكييف بقى تلاجة لدرجة لاتتحملها وبقى زى الفل ورجعت للمنير وقلت له شكرا على ذوقك

---

ياريت تروح تشيك مره ثالثه عند الراجل ده اللى قال عليه أخونا الفاضل

اقتباس:

---

toshipa

---

وياريت تبقى تنقلنا الصوره .......وتسريب الفريون بيكون منين بالنسبه للكمبروسور .........._ ده اللى قدرت أعلق بيه حاليا .....علشان الواحد عاوز يقتنع بسبب منطقى أو كلام صح ......وممكن أكون مش واخد بالى كويس من الحته دى ...........

** وبينى وبينك هو ده عيبى ......مابخليش حاجه فى بطنى ....حتى لو كنت غلطان ...وساعات كتير بيكون شكى فى محله ......

** وياسيدى علشان دى تكلفة كشف ثالثه .....خليها عليا المره الثالثه دى.........وعذرا بس لازم الواحد يقول اللى جواه......ولو مكنش واخد باله ...فاى زميل أمامه الفرصه لتصحيح المعلومه... وأيضاح الوضع للآخرين ( ودايما أنا بحب أكون أول من ينعلم .....ومش عيب ).....أشكرك.
........

شكراً للأعضاء على مشاركتهم خبراتهم و نصائحهم

اقتباس:

---

ومش عارف ليه أنا مش مقتنع بحتة أن الكمبروسور نفسه بيهرب من مكانين زى مابتقول

---

اقتباس:

---

والمفروض الفريون مايتسربش من الدايره من خلال الكمبروسور ......لو حتى كان الكبس ضعيف بسبب تفويت داخلى فى الكمبروسور نفسه......وده اللى ممكن يحصل للكمبروسور (وهو ضعف الكبس )

---

كلامك منطقي ياباشمهندس/سمير .. ولكن أنا شوفت فقاقيع هواء تخرج من جسم الضاغط نفسه (خط رفيع في المنتصف أشبه بمنطقة تجميع جزئين على بعض) ومن مكان اخر عند خطوط الدخول و الخروج

اقتباس:

---

ياريت تروح تشيك مره ثالثه عند الراجل ده اللى قال عليه أخونا الفاضل

---

أنا من بورسعيد يا باشا

اقتباس:

---

كلامك منطقي ياباشمهندس/سمير

---

الله يخليك

اقتباس:

---

ولكن أنا شوفت فقاقيع هواء تخرج من جسم الضاغط نفسه

---

غريبه قوى الحته دى ......يعنى فيه شرخ بسيط فى جسم الكمبروسور .....ومسمع لبره ( يبقى كده الكمبروسور بالسلامه )

اقتباس:

---

ومن مكان اخر عند خطوط الدخول و الخروج

---

دى اللى فعلا منطقيه

اقتباس:

---

أنا من بورسعيد يا باشا

---

ياباشا : أتشرفنا بمعرفتك (وأنا سكنت 12 سنه فى بورسعيد بالفعل قبل سكنى الحالى بالأسماعيليه ).......

_ طيب ماتشوفلك واحد كويس فى بنك الأسكان وفاصل معاهم (حيكون تمنه بسيط أن شاء الله ).......وخده عن تجربه......وخد معاك واحد وأنت بتشتريه ........أنا ياما أشتريت قطع غيار ممتازه من بنك الأسكان قبل كده

اقتباس:

---

أتشرفنا بمعرفتك (وأنا سكنت 12 سنه فى بورسعيد بالفعل قبل سكنى الحالى بالأسماعيليه )

---

معرفة سيادتك شرف لي

اقتباس:

---

غريبه قوى الحته دى ......يعنى فيه شرخ بسيط فى جسم الكمبروسور .....ومسمع لبره ( يبقى كده الكمبروسور بالسلامه )

---

المكان اللي كان خارج منه فقاقيع موضح في الصورة

http://www9.picfront.org/picture/8Hm...g/DSC00027.JPG

اقتباس:

---

طيب ماتشوفلك واحد كويس فى بنك الأسكان وفاصل معاهم (حيكون تمنه بسيط أن شاء الله ).......

---

ان شاء الله .. ولكن لو الموضوع محتاج 600 جنيه يبقى هأجله شويه لحد ماظبط حاجات أهم .. زي مشكلة حرق الزيت في بداية الدوارة وشوية مواضيع تانية

اقتباس:

---

معرفة سيادتك شرف لي

---

الله يخليك................

اقتباس:

---

المكان اللي كان خارج منه فقاقيع موضح في الصورة

---

مش عارف ليه حاسس أن التسريب من المناطق دى ممكن يتعالج ويتصلح.......أصل التسريب مش بسبب شرخ ولا حاجه.......

_ أول منطقه (مآخذ سحب وطرد الفريون )......السحب دايما بيكون عندى الطرف التخين (اللى فوق )........والطرد عند الأقل قطرا (اللى تحت ).....وفى الغالب حتلاقى جوان أو جاسكت اللى عاوز يتغير وحتلاقيه أن شاء الله وبملاليم.........

_ المنطقه اللى عند الجسم دى بين سطحين متقابلين (يعنى مش شرخ ولا حاجه )...وممكن تعالج برضه بجوان أو جاسكت مستدير .....ويمكن تيجىء بأعادة الرباط مثلا .....

_ والصراحه أنا مستخسر أنك ترمى الكمبروسور ده ......علشان واضح من بداية كلامك أن كبسه كويس أساسا.......بس هو عيب التسريب ده.......

_وأعتقد لو دورت كويس على واحد بتاع صيانه كويس ....حيعالج العمليه يمكن بأقل من 50 جنيه مثلا .......علشان كده ياريت تحاول فى الأتجاه ده الأول

_ عاوز برضه أقولك أن معظم الصنايعيه بيستخسر يعالج الحاجه علشان ميتعبش نفسه.....أصل كده كده (حيأخد فلوس وخلاص )......وليه يفكر ويتعب نفسه.....واللى حيدفع تمن الحاجه هو الزبون

اقتباس:

---

علشان واضح من بداية كلامك أن كبسه كويس أساسا

---

معنى الكلام ده ان طالما التكييف كان اشتغل في الأول كويس وخرج هواء بارد بكفاءة ولو لمدة أيام .. ان هو اساساً كبسه كويس .. ومعنى ان كبسه كويس ان مفيش تهريب داخلي محتاج ما يسمى طقم اصلاح

اقتباس:

---

المنطقه اللى عند الجسم دى بين سطحين متقابلين (يعنى مش شرخ ولا حاجه )

---

هل في علاقة بين وجود تسريب داخلي من أويسلات مثلاً وبين التسريب من المنطقة دي

ولو تاكد انه سليم داخلياً .. ينفع يستخدم لعلاج المنطقة دي Epoxy أو ديفيكون .. ولا انا كده روحت بعيد

اقتباس:

---

كان مشحون أول ما استلمتها وتمام التمام .. وكلها 3 أسابيع والفريون هرب

---

أنا كملت بناء على الحته دى من البدايه.........وواضح أن الكبس كويس ومفيش تفويت داخلى ولا حاجه ........وأنت مش محتاج طقم أصلاح ولا غيره ........وكل اللى أنت محتاجه .....التخلص من التهريب ده ....لأن ده هو السبب فى هروب الفريون .........

_ وحقولك على محاوله كويسه برضه.......فيه أنبوبتين أيبوكسى بيتخلطوا على بعض....وبيستخدموا للحام المعادن ........ماتنظف الأماكن دى كويس وأديها لحام وسيب العربيه يوم بدون تشغيل بعد اللحام.......وجرب تختبر التسريب تانى بالهواء ( من غير حل ولا غيره ).......ومعلش حتتعب شويه.......بس أهى محاوله

اقتباس:

---

ولو تاكد انه سليم داخلياً .. ينفع يستخدم لعلاج المنطقة دي Epoxy أو ديفيكون .. ولا انا كده روحت بعيد

---

كده التفكير عشره على عشره ومش حتخسر حاجه ....يادوب عشره جنيه

اقتباس:

---

كان مشحون أول ما استلمتها وتمام التمام .. وكلها 3 أسابيع والفريون هرب

---

أوضح حاجة .. عند معاينة العربية أثناء الشراء التكييف كان مش شغال .. واللي بيبيع قال ده عاوز يتشحن .. واتفقنا ان الشحن عليه وفعلاً شحن التكييف وكانت تمام زي ما قولت لحضرتك ولكن خلال 3 أسابيع كان اتسرب

وان شاء الله هأعمل محاولة .. ومتشكر جداً على وقت حضرتك و متابعتك

اقتباس:

---

وان شاء الله هأعمل محاولة .. ومتشكر جداً على وقت حضرتك و متابعتك

---

بالتوفيق أن شاء الله........وأرجو نجاح التجربه.......وفى أنتظار ردك بعد التجربه للأطمئنان ....وأنا متعشم خيرا......بس أهم شىء التطبيق الجيد لما أتفقنا عليه ( حتة النظافه والدقه فى سد الخلوصات فى أماكن التسريب )