هل فيه كتير مننا بيلتزم بالقاعده دى وهو سايق سيارته ؟؟؟

**dr_timo** · 30-04-2009 04:13 AM

انا الحمد لله انا لسة متعلم سواقة قريب وكان نفسي احترم كل قواعد المورو ر اللي قريتها بس للاسف صعب يعني مثلا القاعدة دي صعب جدا تحصل حاولت كتير اعملها لاني قريتها من مدة في كتاب قوانين السواقة والمورور بس مين بقي لو مشيت وسبت قدامي كل المسافة دي الاقي اللي بيب بيب بيب عشان اقدم والزق في اللي قدامي ولو نفضتله هيجيبلي صداع لحد ماعمل حادثة من الصداع مش من المسافة القريبة دة بالاضافة بقي اني لقيت اني لما بسيب مسافة قدامي كبيرة يقوم واحد معديني والتاني وداخلين فيها وبكدة ميبقاش في مسافة بيي وبين اللي قدامي الناس همجية جدااااااااا في سواقتهم كتير بيبقو فاكرين نفسهم في فيلم فاست اند فيريوس

**dodi2** · 30-04-2009 10:30 AM

صحيح موضوع البيب دا و ترعيش النور باليل , و الحق ادخل قبل ما غيرك يدخل ليه يعنى حاخد الجايزة , و الا لما تلاقى اتوبيس مهول واقف فى زورك .
بس انا كنت من الناس اللى وقفت فجاة بس السرعة كانت 30 كده و لا حاجة , و اللى ورا ورايا دخل فيه بس بجد الشارع كان ضيق و الناس ملياه و بعدين طفل صغير ساب يد والدته اللى حتى مندتهوش و رايح لخلته الناحية التانيةة من الشارع .

**mrghost** · 01-05-2009 09:20 PM

والله لو الواحد ساب 20 سم بس هيلاقى واحد دخل ببوز عربيته علطول علشان يعدى قدامه فمعظمنا مبيسبش مسافه بسبب الموضوع ده والا مش هاوصل المكان اللى انا رايحه بقى لما كله يكسر عليا ويدخل قدامى مع انى عارف ان كده غلط وعندى فانوسين اتكسروا بسبب الحكايه دى بس خلاص اتعودت على كده (البلد دى لازم تسوق فيها كده )

**falcon191** · 02-05-2009 12:14 AM

المشاركة الأصلية كتبت بواسطة BASKOTA

المشكلة ان لو واحد التزم بالقاعدة ى هيلاقى واحد بيزنق عليه وعاوز يدخل فى المسافة اللى قدامه فبيضطر يقرب هو قبل ما حد تانى يدخل وتبقا برده مفيش مسافة

والله بحاول تطبيق القاعدة دي قدر المستطاع ومش بيهمني اللي بيحاول يستعجلني طالما ماشي صح

**amrico** · 02-05-2009 12:28 PM

المشاركة الأصلية كتبت بواسطة sab3aawy

ده كان رد لى على احدى الرسائل فى موضوع مماثل اسمحول لى بنقلها هنا

"مترين ايه بس يا صديقى، مترين دول معناها ان اللى قدامك لو فكر يدوس فرامل هتكون عربيتك تحت عربيته قبل ما رجله توصل لدواسة الفرامل

مسافة الأمان المعترف بها عالميا تساوى سرعتك محسوبة بالأمتار، يعنى لو ماشى بسرعة 100 كيلومتر فى الساعة تسيب 100متر بينك وبين اللى قدامك ، وحسابها سهل جدا حيث انك بسرعة 100 كيلومتر فىالساعة تقطع ال 100 متر فى 1 على 1000 من الساعة اى 3.6 ثانية ، وبالتالى فال 100 متر يمكن حسابها بأن اللى قدامك لما يعدى من جنب اى علامة من علامات الطريق مفروض انت تعدى من جنب نفس العلامة بعد 4 ثوانى تقريبا، لو خدنا مثال اخر علشان نوصل لنتيجة مبسطة فهنلاقى انك لو ماشى بسرعة 50 كم/س فانت هتسيب 50 متر ودول على سرعة 50 كم/س هتقطعهم برضه فى 1 على 1000 من الساعة اى 3.6 ثانية، يبقى برضه هتسيب 4 ثوانى بينك وبين اللى قدامك ، يبقى مسافة الأمان على اى سرعة هى انك تسيب 4 ثوانى بينك وبين اللى قدامك ، يعنى هو لما يعدى من جنب اى علامة من علامات الطريق انت تعدى جنبها بعد 4 ثوانى ،

صحيح ان ده كتير بيكون صعب فى بلدنا لكن فى هذة الحالة ال 3 ثوانى تنزل الى 3 ، 2.5 لكن مش مترين، المترين دول على سرعة 100 كم/ س انت بتقطعهم فى 76 مللى ثانية، يعنى اقل من 1 من عشرة من الثانية ، وهذا ال 1 من عشرة من الثانية هى اقل فترة استجابة لحواس الانسان، يعنى اللى قدامك لو داس فرامل انت محتاج اصلا 1 من عشرة من الثانية علشان تدرك ان لمبة الفرامل نورت ، ناهيك عن انك تاخد رد فعل بأنك تضغط الفرامل والفرامل دى تبتدى تعمل حاجة، فيما معنا بصورة اخرى انك لو سايب مترين بينك وبين اللى قدامك على سرعة 100 ، هو لو داس فرامل فجائية انت وهو هتكونوا كتلة واحدة قبل ما تدرك ان هو اصلا داس فرامل اصلا"
__________________
سبعاوى

هو ده الكلام الصح يا باشمهندس سبعاوي
عندنا في الشغل بنسوق بالقاعدة دي
واصبحت دي القاعدة المتبعة في حياتي اليومية
وعشان نقربها للناس الفكرة كلها انك تخلي بينك وبين اللي قدامك مسافة 4 ثواني
إزاي
تشوف حاجة ثابتة
عمود كهرباء، شجرة، إعلان اي حاجة ثابتة
ومجرد شنطة العربية اللي قدامك توصل للحاجة الثابتة دي تبدأ تعد في سرك
1001
1002
1003
1004
وكده يكون الأربع ثواني
لو وصلت للمكان الثابت ده قبل ماتخلص عد يبقى المسافة بينك وبين اللي قدامك قريبة ولازم تزودها

وممكن بدل ماتعد بالأرقام ممكن في طريقة تانية تعد بيها وتكسب حسنات

(تقول سبحان الله وبحمده سبحان الله العظيم) مرتين وشوفهم على الساعة هاتلاقيهم اربع ثواني برضه

* ملحوظة الأربع ثواني بتصبح 8 ثواني في حالة المطر والظروف الجوية السيئة