مقارنة بين الكيا نيو سيراتو 2009 sx ولا الدايهاتسو ماتيريا 2009 اوتوماتيك كاملة

**Eng_A_Fahmy** · 27-04-2009 07:44 AM

يا جماعة انا عارف ان ناس كتير هاتقول ان مافيش مقارنة بين الاتنين و ان دي سيدان و دي هاتشباك و ان دي 1600 و ان دي 1500 و دي شكل و التانية مافيش شكل لكن اقولكم ليه انا باقارن بين الاتنين دول,

أولا: انا طويل (195سم) و كمان حجمي كبير و في الاساس بدور على عربية واسعة تريحني و لما ارجع الكرسي بتاعي على الاخر اللي ورايا ما يتزنقش, و لقيت الناس بيقولوا على الماتيريا انها واسعة جداً

ثانياً: انا اصلا كنت مختار السيراتو بس كنت خايف من حكاية الوسع و لما قريت الكلام الللي مكتوب عن الماتيريا بدأت دماغي تزأزأ و قلت لنفسي يا واد بلاش تخللي الشكل الحلو ينسيك حاجة مهمة جداً و هي اتساع العربية الداخلي لانه مهم جداً بالنسبة لي

ثالثاً: مش عايز برضو ميزة اتساع العربية تخليني اخد عربية مافيهاش مميزات زي باقي العربيات و عشان كده عايزكم تشاركوني الرأي

رابعاً: انا بامشي جوه المدينة بشكل عادي, و باحتاج اسافر بس مش كتير و لا قليل, يعني متوسط مرتين تالاتة كل شهر

خامساً: من الاشياء التي ابهرتني في السيراتو, كثرة الامكانيات و الكماليات و التي لا اجدها في سيارة اخرى من نفس فئتها

سادساً: بالنسبة للسعر مش مشكلة الفرق اللي بين الاتنين سواء الاغلى او الارخص بس المهم الل يتريحني (السيراتو اللي انا اقصدها 116 لف و الماتيريا اللي انا اقصدها 109 ألف)

سايعاً: انا عايز اللي يقارن يقارن من حيث التكييف و الاداء و الكفاءة و الثبات و الاتزان و الامن و السلامة و اسعار قطع الغيار و سعر اعادة البيع

أخيراً: أنا اسف طولت عليكم و لكن ليطمئن قلبي, شكراً لجميع من سيشارك

**sswalid** · 27-04-2009 08:34 AM

لو حضرتك عايز نصيحتي طالما السعر مشفارق معاك
يبقي سيييييييييبك من الكلام ده بلا سيراتو بلا ماتيريا
وفي حاجات كتيرررر احسن 100 مره وواسعه باردو
وخصوصا ان حضرتك عايز حاجه امان وثبات وكفاءه واتزان
وتكييف قوي واعاده بيع ...والكيا طبعا برا الحوار ده
خش علي الالماني علي طول

**Hosam_Optrawy** · 27-04-2009 08:48 AM

كيا سيراتو اكيد
بس انت اتفرج عليها واركب جواها واتأكد انها مريحه بالنسبه لك

**Eng_A_Fahmy** · 27-04-2009 06:07 PM

المشاركة الأصلية كتبت بواسطة sswalid

لو حضرتك عايز نصيحتي طالما السعر مشفارق معاك
يبقي سيييييييييبك من الكلام ده بلا سيراتو بلا ماتيريا
وفي حاجات كتيرررر احسن 100 مره وواسعه باردو
وخصوصا ان حضرتك عايز حاجه امان وثبات وكفاءه واتزان
وتكييف قوي واعاده بيع ...والكيا طبعا برا الحوار ده
خش علي الالماني علي طول

انا اقصد ان فرق السعر بين الاتنين مش فارق معايا و لكن اكتر من سعر السيراتو انا ماستحملش

و هل انت تقصد ان الكيا تفتقد لتكييف قوي و عوامل الامان و الثبات و الكفاءة و الاتزان ..... مش عارف ليه حاسس انك متحامل عليها شوية
و لكن اقول ان احسن واحد ممكن يفيدنا في الموضوع ده هو المهندس غازي اللي نور المقارنة بتاعتنا دي

**Eng_A_Fahmy** · 27-04-2009 06:17 PM

المشاركة الأصلية كتبت بواسطة ghazy12

شوف يا باشا, السيراتو مش ديقة من جوه بس على كلامك و ان الموضوع ده مهم قوي بالنسبة ليك, انا ارشحلك النيسان التيدا الأوتو بلس

كمالياتها كتيير بردو و واسعة جدااااااااااا من جوه و تقدر تسأل و تاخد فكره عنها في منتدى نيسان... اعتقد انها الأنسب لاحتياجاتك و أولوياتك

و أخيرا ربنا يوفقك للخير ان شاء الله...

أولا: انا احب احييك على مشاركتك معانا في المقارنة دي, لاني عارف انك من الناس اللي مشاركتهم فعالة جداً و يوم ما بيكون ليك مشاركة في اي موضوع الموضوع بيسخن

ثانياً: ااسمحلي اعتذرلك عشان انا كنت واخد عنك فكرة انك متحيز اوي للسيراتو عشان انت معاك سيراتو الجديدة, و كنت باقول انك بتشكر فيها زيادة عن اللزوم, و لكن لقيت ان تعليقك على الموضوع بيتميز بكل حيادية و موضوعية, فمعلش الاعتذار واجب

ثالثاً: عشان اجيب تيدا بنفس مواصفات السيراتو هادفع 11500 جنيه زيادة و ده انا ماقدرش عليه, بالاضافة اني سمعت عن توكيل نيسان بعض الكلام الغير طيب

رابعاً: انا اصلا عشقت السيراتو و لو هتحققلي وسع كافي انا مش هافكر في غيرها

خامساً: لو تقدر تصورلنا الكنبة الامامية و الخلفية في السيراتو بعد ما تكون رجعت الكرس الامامي للآخر يبقى لك جزيل الشكر

**ghazy12** · 27-04-2009 07:44 PM

المشاركة الأصلية كتبت بواسطة datalinez

أولا: انا احب احييك على مشاركتك معانا في المقارنة دي, لاني عارف انك من الناس اللي مشاركتهم فعالة جداً و يوم ما بيكون ليك مشاركة في اي موضوع الموضوع بيسخن

ثانياً: ااسمحلي اعتذرلك عشان انا كنت واخد عنك فكرة انك متحيز اوي للسيراتو عشان انت معاك سيراتو الجديدة, و كنت باقول انك بتشكر فيها زيادة عن اللزوم, و لكن لقيت ان تعليقك على الموضوع بيتميز بكل حيادية و موضوعية, فمعلش الاعتذار واجب

ثالثاً: عشان اجيب تيدا بنفس مواصفات السيراتو هادفع 11500 جنيه زيادة و ده انا ماقدرش عليه, بالاضافة اني سمعت عن توكيل نيسان بعض الكلام الغير طيب

رابعاً: انا اصلا عشقت السيراتو و لو هتحققلي وسع كافي انا مش هافكر في غيرها

خامساً: لو تقدر تصورلنا الكنبة الامامية و الخلفية في السيراتو بعد ما تكون رجعت الكرس الامامي للآخر يبقى لك جزيل الشكر

أولا: أحب أشكرك على كلامك الرائع و ربنا يخليك

ثانيا: يا سيدي ولا يهمك, في ناس كتير متخيلة اني عشان جبت سيراتو او بعشق العربية دي فعلا يبقى كل كلامي مع كل الناس سيراتو و ده طبعا مش صحيح, لازم اعرف احتياجاتك و عليه اقولك رأي الشخصي

ثالثا: السيراتو يا باشا مش واسعة جداا من ورا, بس كويسة, يعني انا مثلا طولي 186سم, اعدتي على الكرسي طبعا راجع للاخر و الدهر راجع بس مش قوي, لو انا لفيت اعدت ورا مش هقدر اخللي رجلي في نص الكرسي, لازم تبقى زي سبعة كده بس مرتاح..

و عموما انا هصور العربية كلها ان شاء الله في الموضوع اللي جاي ان شاء الله و ممكن تشوف العربية كلها... انت تأمر يا باشا و ربنا يوفقك...