تقرير عن التيدا بعد إستلامها

السلام عليكم ورحمة الله
من حوالي إسبوعين كنت عملت موضوع عن إني هستلم نيسان تيدا 2009 سيدان أول فئة في الأوتوماتيك والحمد لله إستلمتها وكنت وعدت إني هعمل تقرير عنها بعد ماستعملها شوية.
بس الحقيقة أنا قررت إني أخلي التقرير ده عن عيوب التيدا فقط ومش هتكلم عن أي مميزات فيها لأن في مواضيع تانية كتيرة إتكلمت عن مميزات التيدا (اللي هي بصراحة كتيرة قوي).
أنا حاولت أتلكك لأي عيب في العربية علشان أوضح أي حاجة ممكن تأثر على قرار أي حد لما ييجي يشتري فممكن حد يشوف إن اللي هكتبه ده ممكن ميعتبرش عيوب بس أنا كتبته علشان كل حاجة تبقى واضحة.
العربية ليها معايا دلوقتي حوالي اسبوعين ودي العيوب اللي شفتها لحد دلوقتي ولو ظهر حاجة جديده هبقى ازودها إن شاء الله وياريت لو حد ظهر عنده عيوب أخرى يبقى يقولها علشان الفائده العامه بس ياريت يكون موديل 2009 علشان يبقى الموضوع كله عن موديل 2009
1- أول حاجة صدمتني في العربية إنهم مش عاملين مكان لتثبيت النمر في ضهر العربية وبالتالي كان لازم أخرم في الشنطة علشان أعلق النمر :_Alshmokh11:
2- مكان ولاعة السجائر مزنوق جنب فرامل اليد وبالتالي لو عايز تركب شاحن موبايل أو (FM Modulator) ممكن يبقى مزنوق على حسب حجمه
3- مكان زراير ظبط المرايات موجود في التابلوه بعيد عن إيد السواق لو حب يظبط المرايات وهو سايق
4- بحس إن العربية ناشفة قوي في المطبات
5- بسمع صوت تزييقه في الكرسي لما بمشي في مطب
6- ساعات بسمع صوت في التابلوه في المطبات
7- إستهلاك البنزين حوالي لتر لكل 10 كيلو (مش عارف ده كتير ولا لأ)
8- مستوى دواسة الفرامل أعلى من مستوى دواسة البنزين فلما تيجي تنقل رجلك من البنزين للفرامل بتضطر ترفع مشط رجلك شويه وده بيوجع الرجل مع الوقت

بشكر حضرتك جدا علي موضوعك
و فعلا دي العيوب اللي انا حاسيتها مع التيدا 2006 هاتشباك
شكرا مرة تانية و ياريت الناس كلها تبقي موضوعية زي حضرتك

1-2-3-8
فى صميم تصميم السيارة
واللى مصممها رينو وديه محدش يقدر يعلق عليها

4
السيارة مصممة للخدمة الشاقة بس عمرى ما حسيت انها ناشفة رغم كده

5-6
مش عارف يمكن عيب فى الكرسى بتاعك وفيه كراكيب داخل درج التابلوه

7
معتمدة بشكل مطلق على ساقة حضرتك ومستوى الزحام والتكييف

أنا بأه هارد عليك وبكل موضوعية وعلى كل نقطة ذكرتها نبتدى .....

1- بالنسبة لمكان النمر انا اتفاجئت زيك باردو بس مش للدرجة اللى هيه لأنها مش عيب قوى بس اللى ريحنى بعد كده ان الراجل اللى ركب النمر ركبها تمام وظبطها صح ( وبكده المشكلة دى عدت )

2- مكان الولاعة خنيئ لأقصى حد انا مش عارف اللى عملها فى المكان ده كان بيفكر ازاى ( مكانها غبى فعلاً )بس حليت الموضوع ده وركنت الولاعة نفسها فى الدرج عشان مابشربش سجاير الحمد لله وجيبت شاحن صغير السلك يتاعه بكر وخليته محطوط على طول ( وبكده اتخلصت من المشكلة التانية )

3- تمام بس موضع مكان ظبط المرايا ده بالتعود بس المشكلة يتاخد فترة طويلة ممكن تاخد 6 شهور كده عشان تتعود على الموضوع ده

4- العربية لسه جديدة والعفشة يتكون ناشفة شوية وعلى فكرة عفشة التيدا رياضية ( بس العافشة مش ناشفة بالدرجة الكبيرة دى )

5- التزييق ده عيب عندك انت وده تروح تظبطو فى التوكيل و دى بسيطة

6- نيجى بأه للتابلو( اجمع الكثير من ملاك التيدا ان التابلو فعلاً فى المطبات بيتهز شوية وهذا عيب فى التيدا كلها لأن التابلو عبارة عن كذا قطعة مجمعة بكلبسات يعنى مش حتة واحدة عشان كده بتحس ان التابلو مافهوش ثبات ) اما تروح التوكيل خليهم يأرطولك عليه عشان هوه مثبت من الاسفل بمسامير

7- عن تجربة ومن رأيي لو رجلك بتكبس جامد على دواسة البنزين هاتسحب منك بنزين و لو رجلك خفيفة شوية وبتاخد النقلة بسلاسة مش هاتسحب منك ( يعنى انا مثلا بحط ب 50 ج فى الاسبوع بس لو رجلى داست جامد على البنزين فى كل مشوار ال 50 ج دول بياخدو 4 ايام )

8- لأ خالص الموضوع ده ان مش حاسو ومتهايألى ان دواسة الفرامل وضعها طبيعى مافيهاش مشاكل

والف الف مبروك على العربية وربنا يباركلك فيها ويكفيك شرها
اسف على الاطالة

بص إحنا طبعا مش بنعيب في عربية أكتر من الممتازة بحتتين
إنما الكمال لله وحده أنا بقه عيوبها بالنسبة لي كالتالي

1- مكان ظبط المرايات , البعد نفسه مش هو المشكلة , المشكلة إنك علشان تظبطها لازم تتقدم لقدام , يعني ظهرك يسيب الكرسي يعني مش حتعرف تظبطها على قعدتك وأنت سايق إلا بالتقدير
بس دي مش مشكلة خالص علشان المرايا بتتظبط مرة وحدة في العمر (إلا لو في كذا شخص بيشوق)

2- موضوع الولاعة مكانه غريب شوية بس في متناول الإيد و بعدين أنت مش محتاج موديولاتور علشان الكاسيت mp3 أساساً !
بس في شيئ عبقري مش موجود في أي عربية تانية خاص بالولاعة
لما بتشيل الولاعة علشان تحط شاحن الموبيل , متبقاش عارف تحط الولاعة فين ؟ دول بقه عاملين مكان جانب الولاعة تشيل فيه الولاعة لحد ما ترجعها مكانها !! فكونهم فكروا في كده فده شيئ جميل :biggrin2:

3- المسند الأمام رفيع قوي فبياخد كوع واحد بس , فأنا بأحتله و المدام مش بتعرف تحط كوعها معايا ! :I_angr1[1]:
ده غير إن الدرج اللي جواه رفيع ومايخدش حاجة بس طلع على مقاس الإليكترك تشوك بالمقاس :S_thum1[1]:

4- درج التابلوه كبير قوي قوي , أنا كنت فرحان بيه وأنا بشتري لأنه حياخد كراكيب كتير , بس عملياً بقه لازم أغطس جواه علشان أجيب نظارة الشمس اللي جوه قوي !
فلا الصغير عاجب ولا الكبير عاجب الإنسان ده ميملاش عنه غير التراب :dontudear:

5- جراب النظارة صغير طحن ومياخدتش النظارات الكبيرة زي نظارات الشمس , عاوز نظارة قراءة , بس الواحد حيحط نظارة قراءة في العربية ليه بالعقل كده ؟

6- موضوع التابلوه عندي بس مش زي ما بتحكوه سعات بسمع تكتكة خفيفة خالص تكاد لا تسمع


بيتهيائلي عيوب التيدا عبيطة وتحس إننا بنتلككلها علشان نتكلم عليها
في ناس راكبة عربيات تانية كوري وصيني وبتقول مافيش في عربيتنا عيوب وتركب معاهم تطلع في أول 10 دقايق عيوب فظيعة إستحالة تدفع في العربيات دي فلوس

يا إخوانا أنا قلت بتلكك للعيوب يعني هي أصلا عيوب عبيطة إنما العربية ماشاء الله حلوة قوي بس انا حبيت أطلع فيها القطط الفاطسة علشان قبل ما حد يشتري يبقى عارف هيلاقي إيه
وبالنسبة للتزييقة اللي في الكرسي راحت لما نزلت الكرسي علشان أنا كنت رافعه على الآخر ومفرقتش كتير في مدى الرؤية
إنما موضوع دواسة الفرامل ده مضايقني قوي بيوجع رجلي كنت بسوق قبلها هيونداي i10 ومكانش فيها المشكله دي بس متهيألي هتروح مع التعود

الله ينور عليك يامعلم
شكرا لموضوعيتك
دا الطبيعى ان اى عربيه تنتجها شركه عريقه زى نيسان تكون عربيه ممتازه بس اكيد بيكون فيها بعض التعليقات ودا الى كلنا نفسنا نعرفه ايه هيه العيوب مدى ضررها وازعاجها وكيف تم طريقة حلها لكن ان كل انسان يركب عربيه ويقول ثبات خرافى وعزل اسطورى وعزم جبار تحس انك هاتركب فانتوم مش عربيه
جزاك الله خيرا وبارك الله لك فيها

احب اضيف عيب خطير كمان للاسف اتأكدت منه امبارح بس
ان العربية خفيفة جدا
امبارح كان في عاصفة ترابية صغيرة كدا في الرياض و ده بيحصل كتير الايام دي
المهم ...... الهوا كان بيطوح العربية و الله
صاجها خفيف جدا العربية دي ... اعتقد ان كان لازم وزنها يزيد في الصاج حوالي 300 كيلو كمان عشان تبقي تقيلة علي الارض اكتر من كده
انا عارف ان كلامي هيزعل ناس كتير بس دي حقيقة

اقتباس:

---

المشاركة الأصلية كتبت بواسطة for_ever

احب اضيف عيب خطير كمان للاسف اتأكدت منه امبارح بس
ان العربية خفيفة جدا
امبارح كان في عاصفة ترابية صغيرة كدا في الرياض و ده بيحصل كتير الايام دي
المهم ...... الهوا كان بيطوح العربية و الله
صاجها خفيف جدا العربية دي ... اعتقد ان كان لازم وزنها يزيد في الصاج حوالي 300 كيلو كمان عشان تبقي تقيلة علي الارض اكتر من كده
انا عارف ان كلامي هيزعل ناس كتير بس دي حقيقة

---

كلامك مظبوط وعن تجربه:S_thum1[1]:

السلام عليكم،

فعلاً الموضوع حلو جداً وأحسن حاجة إن كل واحد بيتكلم باسلوب محترم جداً وفي هدوء في الحوار عشان تبينو الحاجات اللي ممكن متعجبشي أي حد. بس بردو بحب العربية دي جداً.

اقتباس:

---

المشاركة الأصلية كتبت بواسطة Moustafa_Farouk

السلام عليكم،

فعلاً الموضوع حلو جداً وأحسن حاجة إن كل واحد بيتكلم باسلوب محترم جداً وفي هدوء في الحوار عشان تبينو الحاجات اللي ممكن متعجبشي أي حد. بس بردو بحب العربية دي جداً.

---

معلش بأه انا بحب العربية دى اكتر منك:S_thum1[1]:

اقتباس:

---

المشاركة الأصلية كتبت بواسطة karaktar

معلش بأه انا بحب العربية دى اكتر منك:S_thum1[1]:

---

أنا اكتر واحد بيحب العربية دي . دا انا قعدت أفكر سنة ونص علشان احدد أشتري إيه وفي الآخر إخترتها هي:10D5C8~1107:

أنا بقه ولا كنت بافكر فيها , فكرت في الفيات و الاسكودا (جراند بونتو والرومستر) لما كنت حتجن فصليت استخارة , وكان عندي مشوار جنب معرض كبير لنيسان دخلت و اتفرجت على العربية قعدت جواها ساعة لما الراجل كان حيطردني
ولقيت نفسي باحجزها تاني يوم !!!

أنا حاسس إن ربنا هو اللي اشترهالي وأنا مسير تماما في الموضوع ده ماليش أي يد فيه , وربنا عارف الخير فين.ليا علشان كده مقتنع بيها لاقصى درجة

السلام عليكم ....

ارجو من اخواني في المنتدي المساعده في معرفه جمرك نيسان تيدي موديل 2007 اوتوماتيك - زجاج كهرباء - كاسيت عادي بتاع العربيه - سيدان - 1600 سي سي- خليجي
ولكم جزيل الشكــر

اقتباس:

---

المشاركة الأصلية كتبت بواسطة abou_ruqi

أنا بقه ولا كنت بافكر فيها , فكرت في الفيات و الاسكودا (جراند بونتو والرومستر) لما كنت حتجن فصليت استخارة , وكان عندي مشوار جنب معرض كبير لنيسان دخلت و اتفرجت على العربية قعدت جواها ساعة لما الراجل كان حيطردني
ولقيت نفسي باحجزها تاني يوم !!!

أنا حاسس إن ربنا هو اللي اشترهالي وأنا مسير تماما في الموضوع ده ماليش أي يد فيه , وربنا عارف الخير فين.ليا علشان كده مقتنع بيها لاقصى درجة

---

انا عايز اقول انى كنت ناوى اشترى لانسر و المبلغ طلع معايا الى الاسكودا A5 و اتصلت بالتوكيل و اخدت عرض السعر
و بعدين اشتريت التيدا بأسلوب لم يراه احد من قبل

انا لم اذهب لاى معرض و لا اتفرجت على اى عربيه للمقارنه

شفتها على النت
نزلت البورشور بتاعها
شفت السيدان مع واحد عندنا فى الشغل
روحت لموزع
لم يكن عنده الهاتشباك
طلبتها منه
بلون معين شايفه فى البورشور و لم اراه على الحقيقه
جابهالى من الاسكندريه
و انا باستلمها لم اجده اللون اللى انا عايزه
بس كان لون احلى

الحمد لله

حاسس انها خطوات ماشيه بسلاسه و رضا تام
و الحمد لله العربيه حتى الان ازداد اعجاب بها
--------------
بخصوص الكلام فى اول الموضوع احب ارد

مكان الولاعه انا مش شايف انه سئ
لانى مشغل اف ام مكانها و الكل معجب جدا لما يركب معايا انه مش شايفه من الاساس

انا معاك ان مكان ضبط المرايا مش حلو اوى


التابلوه و ارتجاجه و تكتكاته مش اوى

كما قال ابو رقيه
فى الاخر تحس انها عيوب عبيطه :B4_611:

اقتباس:

---

المشاركة الأصلية كتبت بواسطة mtak

انا عايز اقول انى كنت ناوى اشترى لانسر و المبلغ طلع معايا الى الاسكودا A5 و اتصلت بالتوكيل و اخدت عرض السعر
و بعدين اشتريت التيدا بأسلوب لم يراه احد من قبل

انا لم اذهب لاى معرض و لا اتفرجت على اى عربيه للمقارنه

شفتها على النت
نزلت البورشور بتاعها
شفت السيدان مع واحد عندنا فى الشغل
روحت لموزع
لم يكن عنده الهاتشباك
طلبتها منه
بلون معين شايفه فى البورشور و لم اراه على الحقيقه
جابهالى من الاسكندريه
و انا باستلمها لم اجده اللون اللى انا عايزه
بس كان لون احلى

الحمد لله

حاسس انها خطوات ماشيه بسلاسه و رضا تام
و الحمد لله العربيه حتى الان ازداد اعجاب بها :b4_611:

---

الله ؟ دي عربية مباركة بقه ؟ يا اما سعود عامل عمل وحاطه على عتبه توكيل سكودا ، كل اللي يروح يشتري سكودا يحجز تيدا !!!