الموضوع: بخصوص النيو سيراتو , أرجو المشاركه من الجميع !!!

المشاركة الأصلية كتبت بواسطة m.mokhtar

شديت مع سيفيك كتير وعدى معايا ال 200 مرتاح وحتى فى الملفات بناخدها على السرعات دى عادى
اللينيا هتعرف تاخد الملفات على السراعات دى؟

انا عربيتى 2000 سىسى 136 حصان 2 كامة
وعلى فكره السيفيك تطلع منى من الثبات
لكن على السرعه اخره معايا 210 تقريبا وانا بعدى

طبعا انا مش بكذبك بس يمكن صاحبك هو اللى قلبه مش ميت او مش بيعرف يتعامل مع الاوتو كويس

أنا بتكلم على الي حصل معايا بالظبط وعلى فكرة أنا طلعت من الجولف ال١٦٠٠ سي سي والأودي أي ٣ والفوكاس وكلنا كنا بنشد مع بعض على الدائري

المشاركة الأصلية كتبت بواسطة tutankhamoun

الياباني و الكوري و الأوروبي يعتبروا متساوون .
بس مينفعش أقارن ماروتي ....... و أقول دي ياباني بعربية زي الكيا سيراتو مثلا . و أقول أن السيراتو أقل علشان كوري

لما أقارن ......أقارن نفس الفئة أو حتى نفس المستوى السعري أو الحجمي للعربية .

أنا بوجه كلامي لأخي نادر نبيل .
علشان هو قارن بيكانتو ....... بكورولا . و ده مينفعش ......... و بعدين راح حاطط الأوكتافيا معاهم .


نقطة تاني
لما نيجي نتكلم عن السيراتو الجديدة
العربية ممتازة ....... أسم كيا لا غبار عليه منذ أن نزلت السوق المصري و هي ماركة محترمة و سيارتها مازالت تسير في شوارع المحروسة بكل اقتدار و بدون مشاكل برغم المشاكل المتكررة مع الوكلاء الكثيرون الذين تغيروا كثيرا في السنوات الماضية إلى أن أستقر التوكيل مع محمد نصير .

إنما كيا كعربية ............. أو كماركة .... ممتازة .

الياباني سيارات ممتازة و بصراحة اليابان لهم أختراعات و أبتكارات في السيارات لا أحد يستطيع أن ينكرها .
بس بصراحة أسعار عربياتهم ...... أستهبال رسمي
الحكومة فعلا حاطة العربيات دي في فئة جمركية عالية بالاضافة لجشع وكلائهم ......
يبقى أنا كدا لما أروح أشتري عربية ياباني بدفع يجي مش أقل من ربع ثمنها للحكومة في هيئة جمارك و بعدين ربع تاني للوكيل .
يبقى ليه ؟؟؟؟؟؟؟؟؟؟؟؟

ليه أروح أشتري عربية كورولا مثلا ب 150 ألف لحلوح ......... لما ممكن أشتري النتر أو سيراتو أو واجا من بروتون وأوفر فرق الفلوس الرهيب .

طيب صحيح محدش هايختلف على جودة الكورولا
إنما فرق السعر ............رهيب بجد .
يعني مثلا الكيا أعلى فئة ب 127 ألف لحلوح و أنا شايف برضه أنها غالية سنة بسيطة .
الكيا هاتديني كل اللي الكورولا هاتديهوني ما عدا ..... علامة تويوتا على مقدمة السيارة .
يبقى الكيا تكسب ... في رأيي .
أو مثلا واجا من بروتون ..... صحيح موتورها أقل في القوة الحصانية إنما هما الأثنين نفس الفئة و معاهم عربية زي الأوكتافيا .... أقل في القوة الحصانية لكن نفس الفئة .
شوف الفرق في السعر أد أيه ؟؟؟؟؟؟؟؟؟

محدش هايعرف الفروق اللي أنا بتكلم فيها دي غير اللي بيفكر في عربية و مش أسم العربية .

يعني يقارن عربية بعربية من غير أسامي .


أنا قلت الأمثلة دي علشان أبين وجهة نظري ان الكوري زي الياباني زي الأوروبي
أهم حاجة المحافظة على العربية و صيانتها الدورية .

( كلامي عن تجربة مع عربيات ياباني و أوروبي و كوري ........ و أخير ....... ماليزي .... )

في نقطة كمان مهمة جدا

الحالة النفسية للمشتري .
ممكن واحد راكب تويوتا أو أي ماركة مشهورة و الماركة داخلة دماغه قوي .
و طلع فيها عفريت .......... عمره ما هيعيب على الماركة و لكن سيبتدع لها الظروف و الملابسات الأخرى التي أثرت على اداء تلك السيارة الخيالية .

و تخيلوا نفس الشخص راكب عربية كوري مثلا و طلع فيها نفس العيب اللي ظهر في العربية الياباني الخيالية .
الدنيا هاتقوم و مش هاتقعد ........ ليه ؟؟
علشان هو في دماغه ...... أن الياباني لا يعلى عليه و الكوريين دول كوخة و مش بيعرفوا يعملوا حاجة غير أنهم يقلدوا أسيادهم اليابانيين .

طبعا هي ثقافة شعب ......... و مش هاتتغير في يوم و ليلة و هاتأخد سنين طويلة بس التغيير هايكون للأجيال الجديدة اللي بتركب و تجرب الكوري .

نفس الأجيال القديمة اللي مازالت مقتنعة بالماركات الأوروبي أقتناع شديد و أن اليابان و كوريا و ماليزيا و كل الصناعون الجدد بالنسبة لأوروبا .
لا يعرفون شيئا غير أن أوروبا هي البطل المغوار في صناعة السيارات .
مع أن اليابان مثلا دلوقتي بتقدم أختراعات في العربيات و بتحذوا حذوا أوروبا في هذا المجال بل و هناك مجالات للتفوق .
و معاها كوريا ........... و معاهم ماليزيا .

أحنا ( كشعوب أستهلاكية ) بس قاعدين نقيم و عاملين فيها الخبراء اللي مفيش مننا
و مش عاجبنا لا كوريا و لا الصين و لا ماليزيا .

............ أحنا أساسا فاشلين ..........

و تحياتي للجميع .........
و أحترس ....... مصر ترجع إلى الخلف .......تيت تيت تيت تيت ......... تيت تيت تيت تيت .

متفق معاك قولت كل اللى عاوز اقولة وخصوصا جزاية استاذ نادر واحب اضيف ان الصينى بدا فى الاقتراب من الكورى والكورى ابتدا يقترب من اليبانى واليبانى ابتدا الاقتراب من جودة ومستوى الاوروبى ولاكن فى مصر يتنزل لنا الاسوا فلا نلاحظ او نشعر بهذا التقدم او نزول هذة السيارات الاحدث والافضل فى الجودة مقابل ثمن مرتفع لايقدر علية غير فئات معينة وليست حتى المتوسطة والله هو الغنى ويرزقنا جميعا باذن الله