الفرامل يتكون تعبانه علي السرعات العاليه...

**3mr Farrag** · 21-09-2007 06:23 AM

عندي الفرامل اصلا مش حلوه من اول ما جبت العربيه و هي اكسنت 2006 الشكل القديم...
بس بقي علي السرعات العاليه ...يعني فوق ال 150 ببقي مقلق اوي منها و بحس انها بتفرمل ناحيه اكتر من التانيه....
فهل ده طبيعي ان الفرامل تكون سيئه فوق ال 150 ولا ديه اكيد مشكله عندي...مع العلم ان الاكسنت فراملهم اصلا مش حلوه

**sherif_84** · 21-09-2007 03:13 PM

والله ياعمرو أنا عندى الشاهين مشكلتها ان الفرملة صعبة شوية على السرعات العالية ولكن مظبوطة يعنى مفيش ناحية بتفرمل اكتر من الثانية ولا حاجة بس بتبقى صعبة شوية نظرا لسرعة السيارة
بالنسبة للأكسنت أنا خالى معاه أكسنت برضو 2006 زى بتاعتك بس ماافتكرش انه اشتكى من الفرامل بتاعتها برغم ان سواقته سريعة حبتين فممكن انت يكون عندك الطنابير متأكلة ( متجرحة ) من ناحية أكتر من الثانية فعشان كده التيل لما بيضغط على الطنبورة مش بيضبط معاك الفرملة بتاعت العربية فممكن تودى الطنابير للمخرطة عشان تتساوه زى بعض وبعد كده اشترى تيل جديد ( ما ينفعش تركب القديم على الطنابير بعد ما تتخرط ) وان شاء الله ماتشتكيش من الفرامل
على فكرة انا كان عندى نفس المشكلة دى فالشاهين عشان كده قلتلك يعنى مش بجرب معاك ولا حاجة وفعلا وديت الطنابير للخراط وجبت تيل جديد وبقت زى الفل الحمدلله ( بس لازم الميكانيكى يبصلك على الطنابير ويشوف ينفع تتخرط ولا لأ عشان لازم يكون ليها سمك معين عند الخراطة )
الخلاصة :
لو الطنابير ينفع تتخرط يبقى توديهم المخرطة وتجيب تيل جديد
لو قالك دى رقيقة ومش هتنفع يبقى اشترى طنابير أمامى جداد واشترى تيل جديد برضو

**Adham** · 21-09-2007 03:30 PM

ممكن يكون فية زوايا مش مضبوطة في العربية اضبط زوايا عالاربع عجلات على جهاز كمبيوتر محترم و إتأكد لايكون فية عجلة مقدمة او مأخرة سنة (تحدف إتجاة شوية لو انت كابس بنزين, و تحدف الإتجاة المعاكس شوية وانت دايس فرامل)

اضبط الكاوتش كويس و يستحسن تجيبلك مقياس ديجيتال دقيق و تخلية معاك تضبط بية الصبح قبل ماتمشي و راجع كويس التكت اللي على قايم باب السواق علشان تعرف عربيتك مفروض تتضبط كام قدام وورا و سيبك من فتاوي الصنايعية

و بالنسبة للفرامل بقى الأول شوف هواء في العجل ممكن يكون فية هواء زيادة في عجلة امامية أو خلفية

و رجلش فرامل العجل اللي وراء تاني (لو كنت مرجلشة قريب يبقى اصبر شوية لما يطبع و يتاكل الفردتين زي بعض)

و إذا برضة ماضبطش يبقى غير التيل للأربع عجلات و شوف الطنابير اذا كانت حالتها وحشة غيرها او صنفرها صنفرة خفيفة

**3mr Farrag** · 21-09-2007 03:46 PM

بس انا مش بشتكي من حدف خالص....الزوايا عندي مظبوطه ....و الفرامل قبل ال 140 بتكون عاديه....بس فوق كده لو كبست فرامل جامد شويه بحس ان الفرامل مش قادره علي الكوتش و الاقي العربيه مش مظبوطه و حاسس انها عايزه تعوم يمين و شمال في نفس الوقت :?
بس معتقدش انها عايزه تتخرط لأنها عاديه علي السرعات الواطيه
و شكرا علي الردود

**ahmed1981** · 21-09-2007 05:15 PM

1 - إكشف على التيل
2 - إكشف على الطنابير
3 - خد الهواء من مساتر الأربع عجلات
4 - إكشف على السرفو
5 - إظبط رجلاش فرامل اليد

**3mr Farrag** · 21-09-2007 05:31 PM

ازاي يعني اخد هواء من الاربع عجلات ...مش فاهم قصدك
و ياريت توضيح وظيفه السرفو...لأني بصراحه نسيت :(

**ahmed1981** · 21-09-2007 05:47 PM

المشاركة الأصلية كتبت بواسطة 3mr Farrag

ازاي يعني اخد هواء من الاربع عجلات ...مش فاهم قصدك
و ياريت توضيح وظيفه السرفو...لأني بصراحه نسيت :(

زيت الفرامل يتم ضغطه في كل عجلة في ما يسمى الماستر
وعندما يحتوي الزيت على بعض الهواء يضعف ضغط الزيت وبذلك تضعف الفرامل
والميكانيكي يقوم بعملية التكريك ليخرج الهواء من الماستر في كل عجلة
وهي عملية روتينية معروفة وسهلة على الميكانيكي

وظيفة السرفو هو مساعدت رجلك في الدوس على بدال الفرامل وبالتالي سرعة إستجابة الفرامل
وعندما يخرب السرفو تحس إن دواسة الفرامل ناشفة وصعبة ومهما تدوس متنزلش معاك بسهولة
وبسببها الفرامل بتبقى ضعيفة جداً

والسرفو بيعطل نتيجة خرم في الجلدة الداخلية (الطاقية) وأحيانا نتيجة جلد الحبك الخاصة به

والميكانيكي الشاطر وأكرر الشاطر يقدر يكتشف بوظان السرفو من مجرد الإحساس بالنشوفية الزيادة لبدال الفرامل

ياريت تتبع الخطوات في الرسالة السابقة وربنا معاك

**3mr Farrag** · 21-09-2007 05:51 PM

شكرا جدا يا احمد علي التوضيح
و ان شاء الله هبقي اشوف الموضوع ده

**Ahmed Hassan** · 21-09-2007 05:52 PM

س الفرامل زي ما عمرو بيقول كويسه على 140 و وحشه بعد 150 مظنش يكون ده عيب فرامل.. اظن كده دي امكانيات الفرامل لأنها بتكون جايبه اخرها و كل ما مقاومه القصور الذاتي بتزيد الفرامل بتضعف اكتر

**ahmed1981** · 21-09-2007 05:58 PM

أنا رأيي إن الفرامل روح العربية
وأي مصاريف فيها مش خسارة
ولازم الواحد يطمئن منها 100% مش 99.5%

الموضوع: الفرامل يتكون تعبانه علي السرعات العاليه...

LinkBack

أدوات الموضوع

عرض

الفرامل يتكون تعبانه علي السرعات العاليه... - انشر الموضوع فى :

-

-

-

-

-

-

-

المواضيع المتشابهه

العربيه بتنتش على السرعات العاليه

....* فى جرب النيسان صنى على السرعات العاليه

ثبات الماتريكس فى السرعات العاليه

هل الالنترا ثابته فى السرعات العاليه ؟؟؟؟؟؟

يووووة السيراتو بتصفر ليه على السرعات العاليه !!!!؟؟

الكلمات الدلالية لهذا الموضوع

المفضلات

المفضلات

ضوابط المشاركة