بص ياسيدى الفاضل
انا راكب النوبيرا بقالى حوالى 5سنين وفى خلال الخمس سنين دول بدلت فى 3عربيات نوبيرا واحدة اتو واتنين مانيوال
انا من حبي فى العربية دى عايز ابيع اللى معاية واجيب نوبيرا بردة بس جديدة
الاوبترا الصراحة معرفش عنها حاجة
لكن النوبيرا اعرف عنها كل حاجة
بالنسبة لاستهلاك البنزين فى النوبيرا هو ولا كتير اووى ولا قليل اووى
بتعمل حوالى 200كيلو فى الصفيحة داخل البلد و220على الطرق السريعة
طبعا بلد الصنع كوريا والتقفيل مصرى.
بالنسبة لعفشه النوبيرا هى ايضا ولا جيدة ولاسيئة ولكن تحتاج الى صيانة دورية باستمرار واشهر عيب فى العفشة جلب المقصات ودى اتحلت زى ما محمد ممدوح قال بتغير المقصات الى نوع اسبانى
وطبعا استخدام كل واحد يفرق عن التانى انا عن نفسي طبيعة شغلى بتخلينى اعمل فى اليوم بال250 كيلو متر منهم حوالى 70 كيلو متر فى طرق غير ممهدة والباقى كلة طرق سريعة وبردة لازم تعدى على فواصل ومطبات بتشخلل العفشة انا على النظام دة بغير جلب مقصات كل 3شهور ومساعدين كل 9شهور بس هى عفشة مريحة جداا مش بتاعت طنطيط وحركات من دى
بالنسبة للتكيف فهو تلاجة بمعنى الكلمة
بالنسبة لارتفاع السيارة عن الارض فهو معقول ونادرا لما تخبط فى مطب بس طبعا مع التحميل بتفرق
ويوجد بعض عيوب فى تقفيل السيارة مثل درج التبلوة كاوتش الزجاج
الفرامل ضعيف الى حدا ما بسبب وزن السيارة بس شغالة لكن فرامل فجائية ماتسعفكش ودى اسوء شئ فى النوبيرا
وسع الصالون والشنطة طبعا مش عايزة كلام تعتبر اوسع سيارة فلى فئتها
المحرك ايضا قوى ويتميز بسرع التجميع فهو محرك 1600 سي سي 16 صباب 4سلندر ويتمتع بنظام الحقن الالكترونى
اهم نقطة فى النوبيرا بقى وهى الثباااااات ثبات روعة العربية بسم الله ماشاء الله والله بدخل بيها ملفات على 170 كيلو متر فى الساعة وانا مطمن جدااا
قطع الغيار بالنسبة لتوافرها واسعارها فى متناول الجميع و البلد بحالها مافيهاش اكتر من تجار قطع غيار الدايو .
ويارب اكون قدرت افيدك.
المفضلات