المشاركة الأصلية كتبت بواسطة humhum
سؤال الاول قولى انت جبتها منين بالظبط لانى روحت المصرية للسيارات اللى فى طنطا وقالى سعرها 53 الف الكلام ده يوم الخميس والسبت
أنا جبتها من الحبيب كارز ، الشارع اللي على ناصيته جاد في عباس العقاد
وتلفوناته
22735432-22721902-22710410-22735437-0100026045-0106654521
دفعت الفين جنيه حجز ، ويومها بالليل جابلي الورق بتاع العربيه واخد فلوسه كامله ، وكمان اداني الضمان بتاعها في يومها !!
وكان سعرها 52 الف ، ومفيش اي مليم تاني طلبوه مني ، وادوني هديه مع العربيه منفاخ رجل للعجل :)
ثانيا ايه الحاجات اللى انت خدتها مع العربية يعنى فيه مثلث ولا لا وصلت الكاسيت والحاجات دى يعنى
1) المثلث
2) الكوريك وشنطة ادوات قماش
3) 4 وشوش بلاستيك للجنوط
4) وصلة USB خاصه بالكاسيت سي دي
5) جرب كل حاجه ، الأنوار ، التكييف ، الكراسي ، القزاز ، كل حاجه ، متتكسفش ، انت دافع الوفات ، خد معاك 2 صحابك عشان يجربوا معاك ، وشوف كل حاجه ، ودور الموتور ، وشوف العربيه مشيت كام (انا عربيتي كانت ماشيه 80 كيلو) ، وخد بالك في حته بلاستيك في التابلوه من ناحية باب السواق لو متشاله اعرف ان ممكن يكون حد شال فيشة عداد المسافات ، وان الرقم اللي ح يظهرلك ملوش علاقة بالحقيقة المرة ، وهي ان عربيتك سافرت بلاد الله بين المعارض.
6) انزل تحت العربيه بص ، معلش بهدل نفسك شويه ، وانا بقولك ده عن تجربه ، لأني كنت ح اجيب عربيه عتبها مخبوط !! اه والله العظيم ، ماشيه 23 كيلو بس العتب من تحت واخد خبطه جامده قوي ، والراجل لما لاحظ اني اخدت بالي قعد يعمل اراجوز ، ويقوللي اهي خدت العين بتاعتها
وح اعملهالك ع البارد !! وطبعا قولتله باي باي يا بارد
ثالثا اجرأت الترخيص لو امكن ولك جزيل الشكر
عادي جدا ، ح تاخد عقد البيع من المعرض ليك ، وتروح المرور
1) تشتري الورق وتملاه
2) تعمل الفحص الفني
3) تعمل التأمين الإجباري
4) تاخد الملف (عقد الشراء + ورق الفحص + ورق التأمين) وتروح بيه الشباك تسلمه وتدفع الضريبه وتمن النمر الجديده
5) تستلم الرخصه
6) تستلم النمر بالرخصه ومعاها الشنطه والمثلث وتروح تعلقها
التكاليف بالنسبه لي انا كانت 900 جنيه لأني رخصت 3 سنين ، ولأن كان عندي طفايه قديمه مشوهالي بالعافيه ، الطفايه الجديده ب 130 جنيه
( 35 نماذج وورق + 185 تأمين 3 سنين + 640 ضريبه 3 سنين ونمر )
رابعا الاستاذ اللى كان بيفرجنى على العربية قصدى اللى شغال فى المصرية موظف المبيعات قالى على نظام الوديعة
انا شخصيا مش من مؤيدي التقسيط ، وخصوصاً طبعا لو ربا ، عشان ربنا يبارك في الحاجه ، وعشان بجد الربا ده بيجيب الفقر ، وياما البنوك خربت بيوت ناس ، بس لو انت حابب فكرة التقسيط ، فعليك وعلى بنك فيصل الإسلامي ، على الأقل الناس هناك بتقولك انها بتتعامل بنظام مرابحة اسلامي ، وفيه فتاوي من علماء بكده ، وسيبك ، هم اللي ح يشيلوا الذنب لو اخلوا بكلامهم ، انما اروح لبنك بيقولي عيني عينك انا شغال ربا !!! او انا شغال تبع الزبون عايز ربا ماشي عايز اسلامي ماشي عايز بوذي برضه ماشي ، كله ماشي !!
وطبعا مع احترامي للآراء التانيه ، بس اسأل واستفتي ، وعندك دار الإفتاء ، روح وقولهم على حالتك ، وربنا يوفقك ، لأن الضرورات ممكن تبيح بعض المحظورات ، بس برضه معلش اضغط على اهلك ، او بلاش ، هاتها مستعمل يا سيدي ، ب 47 تجيب كسر زيرو 2009 زي الفل و45 تجيب 2008 زي الفل ، ولا انك تدخل نفسك في اقساط وتأمين وحركات.
نمرة بنك فيصل فرع مدينة نصر
27868939-27868940-27868723
وبنك فيصل عنده نظام الودائع ده ، والميزه فيه على ما اذكر انك مش بتأمن ع العربيه ، ومش بيكون فيه حظر بيع عليها
موضوع الموتور
انا مع الأخ اللي بيقول انه صيني وتصميم نمساوي من شركة AVI
سيبك
انت الأهم انك تجرب العربيه عشان تحكم عليها ، ودي مسأله حاسمه في شراء اي عربيه ، انا ممكن اسوق BMW الفئه التسعتاشر ومتعجبنيش لسبب او لآخر ، فضروري تشوف حد من صحابك يخليك تجربها ، او انزل سوق السيارات وجرب واحده هناك ، ودي نصيحة عامة لأي عربيه بتشتريها
(انت كان معاك ايه قبل دي ؟ )
ختاماً
صلى استخاره ، واوعي تنسي
انا شخصيا الاستخاره فرقت معايا جدا ، انا كنت ح اجيب العربيه المخبوطه من تحت خلاص ، وقبل ما انزل من البيت صليت استخاره ، واخدت فلوس ورحت المعرض ، اول ما بصيت عليها شفت الخبطه !!!!!!!!
ويومها لفيت في القاهرة ، روحت ابو الفتوح المعادي ملقيتش اللون اللي انا عايزه والسعر كان 52900 ، وكان عندهم واحده تقفيل صيني 2008 لونها سماوي كانت ب52 وقاللي انه ممكن يعملي عليها خصم كويس ، بس معجبنيش الموديل ولا اللون ، ورحت بعدها لعيسي وقاللي برضه 52900 ، وقاللي انه ح يجيبلي غطا ودواسات !!!! وفي الآخر روحت البيت ، وقلبت في الجرنال لقيت معرض الحبيب ، كلمتهم لقيتهم جنبي في عباس العقاد وعندهم اللون اللي انا عايزه وبالسعر اللي انا عايزه 52 !!! ويومها دفعت مقدم ، لقيتهم بيكلموني بالليل بيقولولي تعالى خلص الورق بتاع العربيه معانا وكمان الضمان بتاعها جبناهولك !!
سبحان الله ، انا كان ممكن جدا البس العربيه المخبوطه من تحت !! لأنه كان ولا في دماغي !!
انا بعتلك رقم الموبايل بتاعي ع الخاص
ولو اني مش ح افيدك قوي في العربيه لأنها لسه جديده 400 كيلو
وربنا يوفقك
لا تنسانا من صالح دعواتك
المفضلات