لسه النهارده خدمه متابعه العملاء كلموني و علي هذا الاساس اتصلت بالسبع زهراء المعادي للسؤال عن كاوتشه المساعدين اللي كانو قالولي هناك انها هتلغي صوت الدبدبه الشهير
المهم الانسه مشكوره سألتني عن رقمي و قالت انها هتتصل تاني
شويه فعلا و اتصلت و الحوار كان كالتالي:
بالنسبه لكاوتشه المساعدين فهي خارج الضمان( لأن في حاجه عندي في العربيه طلعت بايظه و هتتغير في الضمان بس لسه مجتش)
المهم السعر كام قالتلي الكاوتشه الامامي ب 95 جنيه للواحده
و الكاوتشه الخلفي ب 181 الواحده
ده غير شامل التركيب
فنوع من انواع الفضول سألتها التركيب كام قالتلي امامي ب 50 للواحده و الخلفي ب 100 جنيه للواحده
قلتلها التركيب غالي جدا و سألتها طب لو جيت و انا بعمل الصيانه الدوريه مش التركيب يبقي ارخص( علي اساس ان العربيه هتبقي مرفوعه و الكاوتشات مفكوكه) قامت قالت لحظه اسألك و رجعت قالتلي لأ مصاريف التركيب ثابته

تبقي الحسبه بالبلدي كده
190 جنيه للكاوتشات الاماميه
362 جنيه للكاوتشات الخلفيه
يبقي المجموع لتمن الكاوتشات دي :552 جنيه
نحسب بقي مصاريف التركيب بتاعتهم:
100 للكاوتشتين الامامي
و 200 جنيه للكاوتشات الخلفيه
يبقي مجموع المبلغ المطلوب لتركيب كاوتشات المساعدين لمنع الدبدبه بتاعه الصني:852 جنيه مصري
و انا شخصيا متيقن ان مادام دي كاوتشات للمساعد يبقي اكيد هييجي يوم اضطر لتغييرهم مستقبلا

بجد و بصراحه كده و بدون تذويق الكلام حرام كده
انا صرفت مبالغ مكنتش اتصور اني اصرفها في عربيه من العربيات العاديه بتاعتنا دي الا في حالات الحودث و الحوادث فقط
انما كل صيانه دوريه ادفع مبالغ عاليه سواء قطع غيار في منتهي الغلو او مصنعيات غايه في التهريج!!
و العيب بتاع العربيه اللي هو مش مني ادفع فيه 852 علشان اعالجه يبقي بكملت ابيعها و اشتري حاجه تانيه اكرملي
انا عملت الموضوع هنا لتعميم الفائده من حيث الناس تعرف مصاريف تركيب الكاوتشات دي للي عايز يركبها
انما بالنسبالي فأنا هبيع العربيه قريب قوي قوي ان شاء الله بمجرد ما القطعه البايظه اللي عندي تييجي و تتركب في التوكيل علشان مابقاش ظلمت المشتري
و شكرا