التعريفة الجديدة لتاكسي القاهرة: 2.5 جنيه لفتح العداد و125 قرشًا للكيلو

**mragh** · 30-04-2009 10:16 PM

أقر مجلس محلي محافظة القاهرة فى اجتماعه الأربعاء برئاسة المحافظ عبد العظيم وزير التعريفة الجديدة لتاكسى القاهرة الجديد.

ووفقا للتعريفة الجديدة فسيتم احتساب جنيهان ونصف الجنيه لفتح العداد ويشمل الكيلو الأول، ثم 125 قرشا لكل كيلو.

وفى حالة انتظار التاكسى للراكب تكون الساعة الأولى بسعر 15جنيها بواقع 5 جنيهات لكل ساعة إضافية.

وقال المجلس ان هذه التعريقة تتوافق مع دراسة أعدها البنك الدولى بعد استبدال سيارات التاكسى القديمة بأخرى جديدة.

وسجل عدد من أعضاء المجلس اعتراضهم على التسعيرة الجديدة باعتبار أن التاكسى العادى هو التاكسى الشعبى، الذى يمكن لمتوسطى الدخل استخدامه بخلاف تاكسى العاصمة فى حين أن التسعيرة الجديدة تشكل عائقا ماديا أمام متوسطى الدخل.

واستعرض المجلس الدراسة، التى راعت انخفاض تكلفة السيارة من 80 ألف جنيه إلى 50 ألف جنيه كمتوسط لسعر السيارات المحلية ضمن المشروع وانخفاض تكلفة التأمين الشامل على السيارة من 5% إلى 3% وفقا لما التوصل إليه، فضلا عن انخفاض تكلفة التمويل للقرض من 9% إلى 6.25% وراتفاع لتر البنزين فئة 90 بنسبة 75%.

وأشارت الدراسة إلى أن هذه التعريفة تسمح لصاحب التاكسى بسداد التزاماته إلى جانب تحقيق دخل مناسب له، وقد راعت الأزمة المرورية التى تعانى منها العاصمة فى تحديد سعر مناسب لأوقات الانتظار.

المصدر: صحيفة الشروق

**samoevil911** · 30-04-2009 10:32 PM

اييييه دا.. هما عشان السواقين متعترضش علي استبدال السيارات القديمة بتاعتهم .. يقوموا يخلوا السواقين يخدوا الفلوس دي من الشعب.. اييه هو الشعب هيروح فين اكتر من كدا .. دا احنا بنصرف علي الحكومة كمان .. والله حرام

**hoka** · 01-05-2009 05:33 AM

طيب اعضاء مجلس الشعب اعترضوا وبعدين
الاجابة....ولاحاجة

**snakeson2** · 01-05-2009 10:05 AM

ياعم سيبك من الكلام دة ابقي قابلني لو واحد شغل العداد هوة ماشي !
العداد دة زي الساعة كدة منظر والدليل عندك في الغردقة كان في الاول برضو عداد وكلام فاضي ودلوقتي شكرا!

**drshata** · 01-05-2009 10:22 AM

كده المشروع هيفشل ومفيش حد هيسدد اقساط
وابقى قابلنى فى الحلقة الجاية على رأى كرومبو

**abdelaziz-waleed** · 03-05-2009 01:55 PM

المشاركة الأصلية كتبت بواسطة mragh

وفى حالة انتظار التاكسى للراكب تكون الساعة الأولى بسعر 15جنيها بواقع 5 جنيهات لكل ساعة إضافية.

وقد راعت الأزمة المرورية التى تعانى منها العاصمة فى تحديد سعر مناسب لأوقات الانتظار.

هما الجملتين دول لهم علاقة ببعض
اصل لو كدة يبقى احنا مطالبين ندفع 15 جنيه على الوقفة في الاشارات والزحمة

**abzoabzo** · 04-05-2009 11:12 AM

يعنى بعد ماكونت بدفع 6 ادفع 10 ميتحرق التاكسى الجديد على اللى عامله دا انا بركبه علشان مبلاقيش ركنة لعربيتى بلد متخلفة وحاجة تقرف كتير قوى 1.25 لكل كيلو انا راكب مرسيدس ده الليتر بيعمل عشرة كيلوا و 1.75 ده لو السواق بحافظ على عربيته والله لو بلد بتفهم وعارف انها فى يوم من الايام هتبقى مستوردة للبنزين تخلى الاتوبيسات والتاكسى غاز غصب عن اى حد وترخص تعريفتهم علشان متخرجش عربيتهم من الجراج وسلامات يا حكومة الغد والفكر المستنير بس خالى بالك من البلاعة علشان اتسرقت

**Imhotep** · 04-05-2009 07:09 PM

المشكلة كمان ان موضوع احلال التاكسى الجديد بالقديم ممكن يكون تمهيد لالغاء بنزين 80 كمان علشان المواتير الجديدة، مع ان مرة سواق تاكسى قالى ان اصحاب سيارات التاكسى الجديدة بيحطولها 80 برضه، ومعرفتش اصدقه و لا لأ.....

**_hany_** · 08-05-2009 04:35 AM

حكومة ناصحه و عارفه ازاي تطلع القرش من فم الأسد (اللي هو المواطن الجبان اللي حاطط قرشه في جيبه و مش عايز يطلعه بالذوق)،
ماشيين بسياسة لبس ده في ده و اهبر من الاتنين، فعلا احنا بلد الاستنصاح و الفهلوه.
عمار يا مصر!

**khalid_adel** · 08-05-2009 04:57 AM

المشاركة الأصلية كتبت بواسطة mahora

المشكلة كمان ان موضوع احلال التاكسى الجديد بالقديم ممكن يكون تمهيد لالغاء بنزين 80 كمان علشان المواتير الجديدة، مع ان مرة سواق تاكسى قالى ان اصحاب سيارات التاكسى الجديدة بيحطولها 80 برضه، ومعرفتش اصدقه و لا لأ.....

انا شفت كذا مره لادا تاكسي الجديد واقف في طابور ال 80 عادي :)