ما رايكم فى ازدياد ظاهرة وضع الحجارة الكبيرة واحيانا براميل امام المحلات والعمارات لمنع السيارات من الانتظار فى اغلب شوارع مصر - وطبعا تحدث العديد من المشاكل وتعطيل المرور نتيجة زلك -وهل فى حد شاف الكلام دة فى اى بلد تانية .
عرض للطباعة
ما رايكم فى ازدياد ظاهرة وضع الحجارة الكبيرة واحيانا براميل امام المحلات والعمارات لمنع السيارات من الانتظار فى اغلب شوارع مصر - وطبعا تحدث العديد من المشاكل وتعطيل المرور نتيجة زلك -وهل فى حد شاف الكلام دة فى اى بلد تانية .
لا واللى يحرق الدم اوى انك تلاقى واحد حاطط حجر ولا اى حوار ومحدش ييجى جنبة كأنها قطعة مقدسه ومحرم على اى عربية تيجى تقف فيها غير العربية الطاهره بتاعة سيادته
انا ضدها جدا كل واحد اشترى حتة من الشارع لحسابه حتى لو مش هييجى غير بعد 10 ساعات محدش يقف فيها
دى اصبحت حاجة طبيعيه
وممكن يخربوا العربية كمان
دية ناس ناقصة و محدثة نعمة ...
والله لو فاضى روح المجلس المحلى أو مجلس المدينة .. وظبط بتوع الإشغال وهما يتصرفوا معاه
وممكن طمان تتصل بالنجده
علشان دي فيها قضيه وغرامه
وانا عملتها لواحد عندي في الشارع
تروح تعمل شكوى في الحي
وهما مش هيسيبوه
وبالذات لو كان حاطط خوازيق وسلسلة
هيعلموه عدم الإعتداء على الطريق العام
المفروض ان قانون المرور الجديد منع الحاجات دى ووضع غرامات ماليه عاليه جدا بس هنقول لمين كفايه عليهم الحزام والطفايه والسبحه اللى متعلقه فى المرايه دى اهم واللى واكل حق الناس عيبنى عينك مش مهم دى مش شغلته دى شغلة المرافق ضابط المرور مالوش دعوه
حسبى الله ونعم الوكيل
واخديين المحلات والرصيف والشارع كمان وبقت قلة ادب ولو تنحت معاهم يتخانقوا معاك ويخربوا العربية ويفسووا الكاوتش ......عمار يا مصر
عاوزين نعرف التصرف القانونى الصحيح بتاع الموضوع دا
عشان نعرف ناخد حقنا
دا انا من يومين بركن قدام باب عماره الراجل صاحب المحل الناحيه التانيه من الشارع بيقولى ارجع ورا شويه بلعربيه
بقوله ليه ؟؟
بيقولى عشان صاحب العماره مينزلش يشوف العربيه كدا و يدايق و يطلع اى حد يندهللك تحرك العربيه
انا بجد وقتها لولا انى مكنش فى دماغ اتكلم و الراجل كلمنى بأدب
كنت هحط العربيه فى مكانها و يبقى يعمل اللى هو عاوزه
كل واحد اشترى حتة من الشارع لحسابه
نتيجة طبيعية لتمركز السكان في مكان ضيق .
و نتيجة طبيعية لعدم بناء جراجات لسكان ناطحات السحاب اللي بتطلع في يوم و ليلة في حواري عرض شوارعها لا يتعدى 10 متر .........
بأختصار نتيجة طبيعية للعشوائية ....... و الفساد الحكومي و الزيادة السكانية .
انا لما اجي أركن في شارع و لاقي بواب حاطط حجارة و لا براميل في مكان فاضي بأنزل أشيلها و أركن و يضرب دماغه في الحيط و مرة كنت بأركن تحت عمارة ناس قرايبي في مدينة نصر و البيه حاجز مكان بجرادل بلاستيك روحت شايلها بأكصطدام العربية و راكن مكانها
و ناوي اللي يكلمني لما اعمل كده أطلب له القسم و هما يتصرفوا معاه و لو ماأتصرفوش بلاغ للمرور و الحي و يمكن لزير الداخلية لما نشوف أخرتها بقي في البلد دي اللي ماشية بالدراع
مش مجننى غير واحد جزار هابقى اصور ليكوا المنظر حاطط زرعتيت بينها وبين الرصيف بتاع 2 متر
طيب ده جزار بيحتاج المكان ادامه فاضى ليه ؟ مش عارف
المهم انا لما باجى اركن انزل واشيل الزرع على الرصيف واركب العربيه واركن
ولا بيفتح بقه شكله كده فاكرنى ظابط ولا حاجه
انا واحد فى العمارة علمها و حط حجارة شلتها راح جاب اتنين بدل واحده شلت واحده راح نازل يشتم و يسب و للاسف طالع مش محترم على الاطلاق و لقيت يا انزل لمستواه ، يا اسيب المكان ليه و حجته انه اقدم واحد فى العمارة اشترى عربية و بالتالى له حق الاقدميه ؟!
كلامك مظبوط، بس ده واحد رد سجون فى قضايا شيكات و نصب، و صديقه مسجل خطر و لسه خارج من المعتقل و دى المعلومات اللى عرفتها. انا لو الظروف اضطرتنى و مفيش ركنه هركن و امرى على الله، بس صعب تجارى واحد زى ده و امثاله.
قلت هطلب البوليس قالى القسم كلهم معرفه :) قديمة
طيب ياجماعه حلو قوى كل الكلام دا وعندكو حق فى كل حرف قولتوه أن مش من حق حد يعمل كده بس للأسف دا كلام نظرى لكن الواقع حاجه تانيه خالص أنا عنيت من الموضوع ده 9 شهور وف ىالأخر ما تحلش
كنت كل ما اركن فى حته تلاقى أصحاب البيت اللى ركنت قدامه يعمل معاك مشكله والعماره اللى سكنت فيها كل واحد حاطيط حديد ليه عشان لما يرجع يعرف يركن أخر ما زهقت ركنت عربيتى فى وش مدخل باب البيت وبقيت بثبت معايا عربيتين دا غير انى لو حصلت وركنت فى مكان حد فيهم يقولك دا مكانى
طبعا اجتمعو وبطريقه وأخرى وفرولى مكان وبردو المشكله بقت قائمه لأن المكان اللى وفروهولى بقت تيجى عربيات غريبه من شوارع اخرى بحجه أن المكان واسع وفى بواب فى العماره يحرس العربيات وأنا أخبط دماغى فى الحيطه أخر ما زهقت حطيت حديدتين واللى مش عاجبه يخبط دماغه فى الحيطه وطبعا لا دى أخلاقى ولا أنا مقتنع بالى عملتو بس حاجه مستفزه وهو دا حال البلد واللى هيقول نغييره أيدى على كتفه
الواحد مش عارف يقول ايه
حاجة تقرف فعلا
كل حاجة بالدراع في البلد
فى عمان عندنا مافيش الكلام ده نهائي تركن زى ما انت عايز قدام اى محل أو عمارة ,,,
ولسه الأجيال الجاية ياما هتشوف
انا جاري في العمارة اللي جنبي بجد معندوش دم ... حاطط طوب وبراميل اسمنتية تكفي 3 عربيات ... عشان عربيته وعربيه عياله الأتنين اللي متجوزيين وساكنين بعيد نه عشان لما يزوروه يلاقوا مكان يركنوا فيه , ومرة شلتلوا الطوب ده وركنت عربيتي وجيت تاني يوم لقيت الراجل العبيط قاطع غطاء العربية قطعة كبيرة ضبه و مفتاح .
اكتشفت ان البوابين والنصابين بيجبوا نفس الحديد اللى بيحطوه بتوع المرور فى الكمين والمثلثات البلاستيك ويحطوها على اساس ان فيه عسكرى هنابالنسسبه للسلاسل او الحديد بتاع الشرطه ده او البراميل مفيهاش اى مشكله ذى الفل بنزل من عربيتى واروح بارشوت على البرميل او غيره او الحديد اللى بيحطوه بتوع المرورواشيلهم واركن واحط البرميل او الحديد تانى وامشى لكن البلاوى من الحجاره والاسمنت المصبوب والحاجات التقيله مبعرفش اشيلهااضافه الى انك لو راكن ومش شايف ان جنبك حجر ولا قدامك حجر العربيه تتحك منهم لله
فعلا ناس محدثين نعمة وعندهم عقدة الخواجة ولاد الايه دول