تحذير من شارع

**ecybrarian** · 23-09-2007 08:53 AM

السادة أعضاء المنتدى الكرام، تحية طيبة وبعد،
أوع حد فيكم يفكر يخش شارع الخضيري (الواصل بين السيدتين زينب وعائشة ويبدأ من قسم السيدة زينب وينتهي عند قسم الخليفة) الشارع ده واقف واقف واقف. ده انا لبست فيه حتة لبسة مالبستهاش في المحور في شهر 8 اثناء التصليحات.

من كان منكم ذاهب (ولا بد ذاهب) لأي من الميدانين فليأخذ طريقا آخر. مجرى العيون مثلا. إن شاالله حتى نفق الأزهر بس مايفكرش في الطريق ده الأيام دي خالص. ده انا اتعقدت . كمية ذكاء من الناس في الشارع ماوردتش على حد. الشارع اتجاهين ومع ذلك كل إللي يلاقي حتة فاضية يخش فيها حتى لو كانت في الاتجاه المعاكس...وحاجات تانيه كتير

وربنا يسهل طريقكم

**Akram** · 23-09-2007 10:06 AM

ربنا يبارك فيك,
كمان فيه هناك سوق يوم الجمعة و الأحد يعني هتبقى زحمة من كله...

**Sharky** · 23-09-2007 10:15 AM

شكرا على المعلومة

**Karim_Monir** · 23-09-2007 10:29 AM

الاذكياء دول بسببهم واقف في حدايق القبة امبارح ساعة من 2:30 الي 3:30 بالعربية
كل اللي يلاقي حتة فاضية في الاتجاة المعاكس يدخل وهو بكدة بيقفل في وش اللي جاي وتقولة يا عم مايردش تقولوة يا سيدي ما يرودش
قمت قافل الازاز ومشغل التكييف ومديها طرشة لحد ما تفتح وفي الاخر واحد الله لا يسامحة بتاكسي رينو خبطلي الاكصدام بزازية غلسة كسر حتة من بلاستيكان الاكصدام نطر لبرة

**goodwave** · 23-09-2007 10:42 AM

كريم باشا

ايه إللي بيحصل ده إيه إللي أنا شايفه دة :shock:

لا يا عم ده يبقى عندنا هنا في القرية (قصدي إسكندرية) أرحم...... إحنا أتخن زحمة عندنا تقعد نص ساعة بس موضوع سواق تاكسي أو ميكروباص يخبطك فدة عادي اصللك حتتخبط يعني حتتخبط..... فداك وفدى كنزي والحمد لله جت سليمة.

انا إمبارح على الطريق الصحراوي المؤدي إلى العجمي من عند كارفور وواحد رخم بيكسر الشارع غلط وجاله واحد أرخم منه وكسر علية ودة يقول مش راجع والتاني يقول وأنا واقف كدة مش ورايا حاجة........... والسكة وقفت كلها........ يا عالم يهديكو ربنا إحنا صايمين عدوا........ لأ....... طب ياعم ما يردش ....... طب يا سيدي ميردش ...... اعمله إيهههههههه (معلش القافية حكمت)

مردتش اخرج عن شعوري وقلت اللهم إني صايم وبعدين اسمع طخخخخخخخخخ وإذا بسواق تاكسي وإحنا واقفين نعس والعربية ريحت منه وخبطلي الإكصدام......... بصتله في المراية ألاقية أبن ال....... بيحاول يرجع ويهرب بس مش عارف........ نزلت جري علية ويقوم يقولي معلش اصل ميكروباص خبطني وجري :lol:

ميكروباص منين والدنيا واقفة ومفيش ميكروباصات اساسا؟ إظاهر إنه كان بيحلم.......

حسبي الله ونعم الوكيل