استلمت السيريون وان بفضل الله

**BlueFlower** · 02-05-2009 02:32 AM

السلام عليكم ....

اخيرا استلمت السيريون الحمد لله وراكنة تحت البيت :) .....

العربية ما شاء الله جميلة اوى فعلا ....

بس انا لاحظت حاجة ونفسى تقولولى رأيكوا فيها ، الفتيس تقيل بشكل ملحوظ ،

هل ده طبيعى فى السيريون وللا كده فيه حاجة غلط ؟ ، ولو ده مش طبيعى ،

ممكن يكون الزيت هو السبب ؟ ، وللا عشان العربية لسه جديدة ؟ ....

يعنى اعمل ايه ، اكلم الصيانة ، وللا استنى لحد صيانة الالف ؟!!!!

**MoToRiZeR** · 02-05-2009 02:41 AM

congratulations !!!
sorry i don't have arabic for now

about the gear box .. thats normal
but it gets better the more you use it

and gets it's best after the first 10,000 K
so expect it to get better during all that time

**BlueFlower** · 02-05-2009 02:49 AM

Motorizer باشا شخصيا ، ده ايه النور ده :)

شكرا يا استاذ Motorizer ، طمنتنى والله :) ....

**YoussefMostafa** · 02-05-2009 03:01 AM

الف الف مبرووووووووك علي اول سيريون وان في المنتدي

وعايزين تفاصيل اكتر عن العربية (السحب , صوت الموتور ,الاستهلاك ,..................)

وربنا يباركلك فيها والف مبروك مرة تانية

**hoka** · 02-05-2009 03:02 AM

الف مبروك ياباشا
ربنا يديك خيرها ويكفيك شرها
وبعد اذنك هى عاملة كام ومن فين

**BlueFlower** · 02-05-2009 03:50 AM

يا جماعة انا شاكر ليكو كل الاهتمام ده ، وانا سعيد فعلا انى انضميت لمالكى السريون المحترمين اللى هنا فى المنتدى ، الف شكر على قبولكم ليا معاكوا ....

Youssef_Mostafa باشا ،
شكرا على لقب اول مالك سريون وان فى المنتدى ياغالى .... والله يبارك فيك ...
العربية جد روعة ، السحب كويس فعلا ....

العزل برضه كويس ، وصوت الموتور اوطى كتيير من النوبيرا ، بس اعلى نسبيا
من الانسر البوما ( انا بقارن بعربيات اصحابى ) ....

استهلاك البنزين بجد منخفض ، يعنى مكنوش بيكدبوا ، العربية بتعمل 100 كم لكل 4.8 لتر بنزين .....

الفرامل عظيمة ..... يعنى ضحكت لما شوفت نظرة اندهاش صاحبى بتاع النوبيرا لما كان سايق السريون وجرب يسند على الفرامل ... يعنى بس المفروض ما نقارنهاش بالنوبيرا الشهيرة بفراملها الضعيفة اصلا ....

انا هاتابع معاكوا ان شاء الله اكتر من كده لما ارخصها وامشى بيها اكتر ....

hoka باشا ،
الله يبارك فيك وشكرا على مرورك ...

بالنسبة لسؤالك ، العربية ب 71000 ، انا قسطها من الشركة العالمية المتحدة للتجارة ، ودى شركة تبع عبد اللطيف جميل مسئولة عن تقسيط العربيات ( بفائدة 8% لدايهاتسو و فائدة 9% لاى عربية تانية ) ....
يعنى من الاخر كده التقسيط من دايهاتسو مصر مش تبع بنك معين .....

لو عايز تفاصيل اكتر اقرأ الموضوع ده
http://www.nilemotors.net/Nile/showthread.php?t=72225

**abohalmos** · 02-05-2009 01:53 PM

الف الف مبروك ليك على السيريون وان
وعلى فكرة اعتقد انى انا اول واحد قال انك هتاخد لقب مالك سيريون وان
الاول فى المنتدى .........حتى راجع الموضوع من الاول
ربنا يسعدك بالعربية و يديك خيرها و يبعد عنك شرها و كل شر باذن الله
وانت كمان هاتبقى المرجع الاول لكل اللى هايشترى سيريون وان
و اللى منهم انا باذن الله . قادر يا كريم
المهم بقى متنساناش بقى فى التقارير و انطباعك عنها
وان شاء الله تركب كاسيت حلو عشان تبقى كملت العربية مية مية
و بالمناسبة انت بتحط بنزين 92 ولا 95
عشان الموضوع ده حصلت عليه حوارات قبل كده و عايزينك تطمنا

**BlueFlower** · 02-05-2009 02:08 PM

صديقى abohalmos ، الله يبارك فيك يا باشا ...

وبرضو الف شكر على اللقب وعلى انك اول واحد تقولوا يا باشا ..... والله

انتوا كلكوا ناس فى قمة الاحترام ....

عقبالك كده ان شاء الله واكيد هانكون مع بعض ....

ان شاء الله اول ما ارخص هاجيب كاسيت وسماعات وبرضو هاتابع معاكو ....

انا حطيت بنزين 92 ....