تقييم السيارة بعد صيانة ال 10000 كم AhmedGen2

**AhmedGen2** · 02-05-2009 02:48 PM

السلام عليكم

رحت انهاردة عملت صيانة ال 10000 كم فى أمير وجوزيف ، تم تغيير الزيت والفلتر والتكلفة شاملة 259 جنيه ، طبعا ً الورشة ضيقة جدا ً ويادوب ، رحتلهم الساعة 11 خلصت 2.

استلمت العربية والمهندس قاللى إن كارتيرة الزيت بتنقط وعايزة تتغير ، واضح كدة إن السبب مطب من مطباتنا العزيزة ، قالى كمان إن العربية مش مصفحة من تحت هى عالية آه لكن مفيش حماية من تحت ، المهم أنا دلوقتى لازم أغير كارتيرة الزيت ديه من التوكيل لسه هكلمهم بقى وأشوف الحوار دة.

حد عنده فكرة هى بكام؟ ، المهندس قاللى هى تتغير فى الضمان لكن ممكن اغيرها على حسابى على حسب تقييم مهندس المعاينة.

بعد الصيانة العربية سحبها حلو وصوت الموتور هادىء نسبيا ً وكله فل.

**m.3abdel3al** · 02-05-2009 02:54 PM

الف مبروك اولا على الصيانة وعقبال ال 10000000 ان شاء الله في الاول بس انا لية استفسار انت ليه عملت الصيانة في امير و جوزيف و معملتهاش في التوكيل مع اني شايف ان السعر واحد ؟؟؟؟؟؟؟؟؟؟؟؟؟؟؟؟؟؟؟؟؟

و بالنسبة للكارتيرة ان شاء الله يغيروها في التوكيل

**M.almaghraby** · 02-05-2009 03:10 PM

مبروك يا مان عالصيانة و يا رب دايما مبسوط بالعربية

بس مش هوا لازم تعملها فالتوكيل عشان الضمان ولا ايه؟

و يا ترا حطيط زيت نوعه ايه....؟

**momenhamdy** · 02-05-2009 07:10 PM

مبرووووووووووووووك يا باشا علي الصيانة

و ان شاء الله موضوع الكارتيره يكون تمام و تتعمل داخل الضمان

**AhmedGen2** · 02-05-2009 07:17 PM

عملتها فى أمير وجوزيف عشان جنبى فى مدينة نصر مكنش ليها لازمة اتسحل فى الصحراوى.

نوع الزيت توتال 5000.

أمير وجوزيف بيعمل الصيانات الدورية عادى تبع الضمان والتوكيل ، الفرق إن أى مشاكل فى العربية مش بيصلحها يعنى آخره يغير زيت وفلتر وحاجات من دى ، أى مشاكل عالتوكيل فورا ً.

**m.3abdel3al** · 02-05-2009 07:59 PM

يعني امير وجوزيف يعتبر مركز معتمد

**AhmedGen2** · 02-05-2009 08:40 PM

آه يا باشا ، المهندس آمر بنفسه اللى قاللى أروح هناك أريحلى.

**M.almaghraby** · 02-05-2009 11:16 PM

طب مش 250 دا كتير شوية؟؟؟

انا عايز اعمل ال 5000 هناك يا تري هتتكلف كام

و يا ريت لو حد يعرف عنوانة بالظبط عشان انا في مصر الجديدة و دا حيبقي اريحلي كتير

**AhmedGen2** · 02-05-2009 11:38 PM

ادخل مكرم عبيد خليك ماشى لغاية ماتلاقى صيدلية أفريقيا على شمالك خش الشمال وكمل على طول حديقة الطفل هتبقى على شمالك وشوية كدة وهتلاقى أمير وجوزيف على يمينك بعد الأبيارى بشوية.

صيانة ال 5 آلاف انا كنت عملتها فى التوكيل ب 280.