هل عربيات بروتون وحشة و سيئة و ...

**abo3bdolrahman** · 23-09-2007 06:19 PM

طبعا كلكم مستغربين من العنوان و بصراحة بقى العربية شكلها كده تحس إنها هاتهجم عليك و الكبوت اللى نازل من المنتصف ده شكله كده مش عارف إيه و الفرش الداخلى ده خاماته كده مش قد كده ده حتى شبه العربيات الصينى
ده غير بقى إنها عربية ماليزى هيا من إمتى ماليزيا دى بتعمل عربيات بصراحة خسارة إن الواحد يدفع فيها 90 الف للفول أوبشن اتوماتيك ما عندك اللانسر الشكل القديم و لا الياريس و لا ............

طبعا الكلام اللى فوق ده يصدم أى حد بيفكر فى الواجا خصوصا و إن اللى كاتبه معاه العربية و مشرف لمنتدى الواجا بس بصراحة هوا ده اللى بنسمعه من كل الناس اللى .... :x .

منتظر آرائكم حول هذا الكلام و تعليقاتكم عليه و أى حد عنده أستفسار عن العربية أنا تحت أمره
و رأى الشخصى واجا إلى الأبد :D

**waleedabbas** · 23-09-2007 06:24 PM

انا رايى ان الواجا بسم الله ماشاء الله عربية محترمة وماتقلش عن عربيات كتير فى مستواها ومن نفس الفئة من العربيات الكورى واليابانى.

**Heshaam** · 23-09-2007 06:35 PM

أنا في رأيي إن الماركة ديه فيها شئ بيبعث على الثقة

الثقة ديه نابعة من إيه مش عارف - ممكن إنها نزلت (الويرا) لفترة في التسعينات وبعدين التوكيل اختفى بس العربية اثبتت نفسها؛ أو لأن عندنا انطباع عن ماليزيا أنها بلد متقدم تكنولوجيا (وريثة اليابان) أو إن الشركة اشترت لوتس وهي شركة سيارات رياضية عريقة أو لأن إسم توكيلها جذاب (طول عمره بيوزع البي إم والجيب وتوكيل ستروين) - رغم إن خدمته أحيانا بتبقى مش أد كده.

بس الأكيد - على الأقل بالنسبة لي - إنك لما بتركب عربياتها بيتأكد عندك الإحساس بالثقة ده من حيث قوة الموتور وشكل الصالون والكماليات وطبعا الشكل الخارجي (تجربتي العملية كانت مع الجين تو وإن كنت اتفرجت عالواجا قبلها ولم أقودها) وحتى هذه اللحظة لم يصدر عنها ما قد يغير من فكرتي عنها -- رغم إنه ما فيش عربية بتخلى من المشاكل - إلا أنها مشاكل لم تفقدني الثقة فيها حتى الآن.

معلش أنا آسف لو المشاركة مش مباشرة عالواجا بس أنا لقيت نفسي مدفوع للكتابة عن الموضوع بالشكل ده.

**Ahmed Anwer** · 23-09-2007 06:54 PM

الأخ عبد الرحمن بخصوص الواجا
انقلك ردين ليا في موضوعين مختلفين
إمبارح كنت سايق الواجا بتاعت ابن عمي و حضرتك عارف إني عندي فيرنا أتوماتيك عربيتي ب 75 ألف و عربية ابن عمي اتوماتيك برده ب 92 ألف فرق 17 ألف
بصراحة كل جنيه في الفرق ده أنتا واخد بيه حاجات
بسأل ابن عمي اشتريتها ليه قاللي BEST VALUE FOR MONEY
واخد صالون احسن ، واخد جنوط سبور عريضة ، واخد اوبشنز أكتر باركنج سنسور و حاجات تانية بس هوا ماكنش عنده إير باج ، واخد ثبات أفضل ، واخد تقفيل أفضل بس كل ملاحظاتي عليها الدركسيون أتقل هوا بيقولي عشان الجنوط العريضة ، صوت الموتور عالي شوية بس صوت موتور عالي تحس إنه رياضي مش صوت موتور عالي كركرة
اللي معجبنيش فيها خالص بصراحة أنوار التابلوه الحمراء ، مزعجة و متعرفش تشوف منها البيانات
و هيا علي فكرة واخدة تقييمات وحشة في المواقع الإنجليزية مش عارف ليه
العيب الأساسي بقه في مصر عيب إعادة البيع
ربنا يباركلك فيها

ثاني رد في موضوع اخر
برده أنا بقول أنا سقت عربيات كتير كوري و ماليزي و ياباني و كتير بحس أن في فروق بين كل عربية غالبا بيبقي متناسب مع سعرها زي مانتا بتقول دايما بتدفع ايه و عايز تاخد ايه بس العربيات الياباني في مصر كتير بحس أن جزء كبير من اللي انتا بتدفعه ثمن إنها اسمها ياباني مش فروقات في الأداء
يعني أنا سقت الياريس و اللانسر 1600 و سقت الواجا و الثلاثة في نفس السعر تقريبا بصراحة فعلآ الواجا أفضلهم كأداء و أوبشنز و كل حاجة بإستثناء حكاية العمر عشان مقدرش أحكم عليها ، يبقي أكيد في فرق الإسم برده زي أي حاجة بنشتريها

**Ahmed Anwer** · 23-09-2007 07:39 PM

ليا بقي الملاحظات التالية علي عربيات بروتون عموما:_
1- عربية ابن عمي فلتر الزيت في عربيته ضرب و العربية عطلت بيه في الشارع و كلم التوكيل قطروها و صلحوها (الله اعلم ممكن تكون مجرد حاجة بسيطة مثلآ و هوا بيعمل صيانة مركبهوش كويس )
2- علي لسان ابن عمي نتيجة تواجده في التوكيل شكوي عامة من كهرباء الجين تو و إنها بتضرب و الزراير بتبوز و الكلام ده نفسه متكرر في المنتدي في كذا حته ؛ ده غير إن اخريين ذكروا إن فتيسها الأتوماتيك باظ في بعض العربيات
3- كتير أوي من أصحابي أول ما يقعد في عربية بروتون واجا ينزل يقولك العربية دي صناعتها مش جيدة و هتتبهدل بسرعة، طبعا ممكن يكون مجرد إحساسهم النفسي عشان اسمها ماليزي و ممكن يكون رؤية أبعد للأمور

أنا قلت رأيي بصراحة في أداء العربية عن تجربة في الأول
بس كون البرتون عربيات بتنزل مجنطة و أدائها رياضي و بأوبشن كتير كل ده كويس بس أهم حاجة في العربية الإعتمادية ،، قلة الأعطال ، فلو في مشاكل في صناعتها فيبقي بلاها أحسن
اتمني إن حضرتك توضح لنا الصورة من الناحية دي ، بس أرجوك بحيادية

**abo3bdolrahman** · 23-09-2007 07:50 PM

بالنسبة للجين 2 معظم المشاكل للأسف ناتجة عن إن معظم اللى شارينها شباب صغير و طبعا بقى التعديلات ما بتخلصش و لأن العربية لسه جديدة فالأسطى الكربائى لما بيجى يعدل بيركب أى حاجة فى أى حتة و طبعا ده غلط و الكلام ده أنا شوفته بعينى
أما الفتيس فالأخ اللى ذكر الموضوع هنا فى المنتدى قال إن قريبه اللى معاه العربية هوا اللى بوظه و أى حاجة لو ما كنتش تستخدمها صح هاتبوظ و الكلام ده ينطبق على أى عربية مش بروتون بس و موضوع فلتر الزيت ده أكيد ناتج عن قلة ضمير فى التركيب أما موضوع الإعتمادية بقى فأنا اللى بهرنى فى العربية دى لما شوفتها فى ماليزيا سنة 2004 إنى ركبت إنتاج 2001 و ده اول إنتاج و كانت زيها زى بتاعت 2004 بالظبط تحس إن العربية ماسكة نفسها و محترمة و ممكن ترجع لموضوع الحادثة اللى حصلت معايا و تشوف موضوع الإعتمادية و المتانة فيه و طبعا أنا مش متحيز فى رأى لأنى بصراحة مش مهتم إنها تنتشر أوى بين الناس لأنها لو إنتشرت هايروح التميز بتاع إقتنائها

**Heshaam** · 23-09-2007 08:04 PM

لأنى بصراحة مش مهتم إنها تنتشر أوى بين الناس لأنها لو إنتشرت هايروح التميز بتاع إقتنائها Wink

+1000000000000000000000000000000000000000

**amr mokhtar** · 23-09-2007 11:35 PM

المشكلة ان إحنا بنتكلم من غير تجربة عملية للعربية ... لإن طبعآ فى ناس ثاقبة النظر يقف كده و بكل ثقة يقولك العربية دى( واقعة )بدون اى تجربة
لو تفتكروا اللانوس اول ما بدأت تنتشر فى مصر كان سنة 98 ... الميكانيكية قالوا دى كورى و انها عربية خفيفة و ضعيفة و ما ينفعش نركب مكيف على موتور 1300 و كلام فاضى من ده ... و تشوف النهاردة الناس بتجرى على لانوس 98 او 99 ... تفتكر إيه اللى غير رأيهم؟؟؟

انا راى ان البروتون عربية ممتازة فعلأ رغم انى مركبتهاش بس بحس انها عربية محترمة خصوصآ الواجا و بصراحة هى اكيد احسن من الصينى ( ده رأى شخصى )

**Ahmed Anwer** · 24-09-2007 01:01 AM

علي فكرة يا م/ ابو عبد الرحمن
أنا من أشد المعجبين بالبروتون لكذا سبب أولهم إنها أول شركة سيارات بمعني الكلمة من دولة إسلامية ،
ثانيا أسعارها غير مبالغ فيها و منطقية جدا
أنا بس حبيت أثير الإنتقادات دي عشان الموضوع يحقق الهدف منه

**mina_ramsis** · 24-09-2007 01:37 AM

لا طبعا سيارات بروتون عربيات محترمة جدا بس يعيبها سعر اعاده البيع فى مصر و الواجا عربيه محترمة جدا جدا و جميلة جدا بس يعيبها الشكل القديم شويه

الموضوع: هل عربيات بروتون وحشة و سيئة و ...

LinkBack

أدوات الموضوع

عرض

هل عربيات بروتون وحشة و سيئة و ... - انشر الموضوع فى :

-

-

-

-

المواضيع المتشابهه

إستطلاع : عربيات سيئة السمعة

هل عربيات بروتون فيها speed limiter؟؟؟؟

مدى إعتمادية عربيات بروتون

مسلسل تركي فيه عربيات بروتون

صور بروتون جين 2 معدله ..... (عربيات جامده)

الكلمات الدلالية لهذا الموضوع

المفضلات

المفضلات

ضوابط المشاركة