عاوز اشترى عربية برودوا كانشيل موديل 2008

**m_radwan78** · 03-05-2009 09:15 PM

السلام عليكم
مساء الخير على كل المشاركين فى هذا المنتدى الرائع.
احب اوجة سؤال للمشاركين فى هذا الموضوع .
انا امامى سيارة برودوا Perodua Kelisa موديل 2008 بمبلغ 50 الف جنية وانا بصراحة مستصغر العربية دى اوى بس هى هيدروماتك والشباب كلة داخل على المنتديات بيشكر فى العربية دى اوى مش عارف العربية دى اختارها ولا هيونداى i10 ولا atos ولا الكيا لانى بجد محتار جدا وخايف من قطع الغيار بتاعها لانى سألت لقيت قطع الغيار بتاعة العربية دى مش موجودة الا فى دمياط بس .
فالرجاء الرد من اللى عارفين هذة السيارة او مالكيها .
ودى صورة العربية للى مش عارفها
This image has been resized. Click this bar to view the full image. The original image is sized 650x394 and weights 36KB.

**أبوعائش** · 04-05-2009 08:19 AM

السلام عليكم ورحمة الله وبركاته
بص يا سيدي...أخوك لسه شاريها من يومين بس مانيوال...العربية حلوة جدا والحمد لله
مين قالك ان قطع الغيار في دمياط بس؟؟؟؟
بص عندك التوكيل ومحل اسمه أوشين في الحرفيين
واتنين في وسط البلد في التوفيقية منهم واحد اسمه ..مش عارف ايه.. السني
ده بالإضافة لدمياط....
العربية موتورها ياباني من دايهاتسو .
أما بالنسبة للـ i10 و البيكانتو...هم أغلى شوية من الكليسا
يعني بالنسبة للأوتوماتيك هتلاقيها 70 ألف أو أغلى شوية ( طبعا زيرو)
انما من ناحية الأداء وقطع الغيار معرفش...بس اللي أعرفه ان فانوس امامي للكليسا بـ 270 كامل من أوشين
انما للهيونداي معدي الباكو :)
بس برضه ده مش معناه ان قطع غيار الكليسا رخيصة...انا بقارن بس
استخير كتير جدا جدا جدا لأنك متعرفش الخير ليك في أي عربية منهم
أي سؤال انا والشباب في الخدمة

**sharkaoil** · 04-05-2009 02:37 PM

السلام عليكم
الف مبروك عليك العربية الجديدة وربنا يديك خيرها ويمنع عنك شرها ان شا ء الله
بس انا لية سؤال العربية الى حضرتك اشترتها جديد ولا مستعمل وموديل كام علشان انا ان شاء الله نازل دمياط اشترى واحدة قريب خلال 10 ايام ان شاء الله وعايز اعرف الاسعار اية دلوقتى بالنسبة للعربية دى وانا عايز واحدة اتوماتيك وربنا يكرم ان شاء الله
اكون شاكر جدا لاهتمامك

**أبوعائش** · 04-05-2009 03:00 PM

وعليكم السلام
الله يبارك فيك..
الحمد لله اشتريتها زيرو موديل 2008 اللي هو آخر موديل منها
انا مش من دمياط واشتريتها من التوكيل...بس مفيش فاضل منها غير عربيتين زيرو
وكمان مش في التوكيل...في أجنس اسمه الوليد موتورز في رمسيس وهما مانيوال
واحدة بيضاء والتانية فضي...مش عارف تجيبهم بكام من عنده بس هي عاملة 50 أو أزيد شوية صغيرة
لو عايز اتوماتيك يبقى تدور على كسر زيرو...بس هتتعب ...لأني من السؤال عليها مش لاقي حد عايز يبيع

**sharkaoil** · 04-05-2009 03:43 PM

على العموم الف مبروك مرة تانية
بس انا سامع انها منتشرة قوى فى دمياط علشان كدة انا بقولك انا نازل اشتريها من دمياط لان انا من الاسماعلية
بس لو عندك فكرة عن الاسعار كسر الزيرو دلوقتى كام يا ريت تبلغنى وشكرا يا اخى

**أبوعائش** · 05-05-2009 02:04 PM

الله يبارك فيك وعقبالك..
هي فعلا منتشرة في دمياط...ربنا يكرمك وتلاقي واحدة كسر زيرو كويسة وبسعر حنين
بس الصراحة معرفش الكسر بكام...بس لو تستغل زيارتك وتسألنا على أسعار قطع الغيار هناك
يعني اهو نقارن مع اسعار هنا...
وفقك الله

**sharkaoil** · 05-05-2009 02:18 PM

ان شاء الله انا والله ناوى اعمل كدة وعلى ما اعتقد ان الاسعار هناك بالنسبة لقطع الغيار احسن شوية من القاهرة على العموم ان شاء الله يكون فى رد قريب على طلبك
وشكرا

**m_radwan78** · 06-05-2009 10:43 AM

بجد انا باتشكر لكل من اهتم بموضوعى واهتم ولو حتى بالرد بكلمة واحدة فى هذا الموضوع
بس انا بعد سؤالى عن هذة السيارة السيارة بجد جميلة اوى بس للاسف مش واخدة اى حظ نهائى فى السوق اية السبب مش عارف مع ان المفروض تكون ليها حظ لعدة اسباب :-
1- مساحة صغيرة جدا ومن الداخل واسعة نسبية
2- الماتور قوتة مناسبة الف سى سى وبترخص على الشريحة الصغيرة لانها مثبوتة فى قوة الماتور 989 سى سى اى الشريحة اللى اقل من الالف يعنى زى الماروتى .
3- هايدروماتك ومانوال ومش مأثر دة على سحب العربية على ما سمعت من الاعضاء .
4- الاعضاء بيقولوا اسعار قطع الغيار رخيصة .
بس للامانة انا سالت واحد معاة العربية دى بس موديل 98 قالى جميلة اوى بس بانزل اجيب اللى عاوزة للعربية من دمياط وهو كان شاريها ب 27 الف جنية بس مبسوط منها اوى مع انة كان ممكن يجيب سوزوكى بس هو مبسوط بيها .
المهم ربنا يوفق الكل فى حاجة تكون بنت ناس .

**elkabary** · 16-05-2009 01:28 AM

انا عايز اشترى واحدة جديدة منين فى اسكنرية و قاهرة و بيكام؟

**egawady** · 16-05-2009 02:13 PM

الكليسا موجود منها زيرو فى التوكيل ( شركة هاشم باص - الكيلو 21 أول طريق مصر الاسماعيلية الصحراوى ) ..
تليفون : 26213434 26213737

انا كنت هناك من كام يوم وسألت عليها ...
المانيوال بـ 52000 جم والاوتوماتيك بـ 58000 جم ...
هوا السعر عالى شوية .. بس ده اول كلام منهم ... يعنى ممكن ينزل عن كده شوية .. وكل واحد وشطارته ...

وفعلاً العربية دى أفضل سيارة صغيرة فى السوق حالياً لأنها معمرة وقوية واقتصادية جداً وسعر إعادة البيع عالى ...

لكن للأسف هى مش منتشرة عشان التوكيل بتاعها مش مهتم بيها خالص ... التوكيل كل اهتمامه متركز على الاوتوبيسات والميكروباص ... انا كنت باتكلم مع مهندس فى التوكيل بخصوص الموضوع ده .. قالى ان فعلاً سعر الكليسا مبالغ فيه شوية .. ولو الشركة نزلت السعر شوية وعملت شوية دعاية وبروباجاندا .. العربية دى حاتتلحس ( نفس التعبير اللى قاله ) ...