الى كل اصحابى واخوانى ملاك البيتلز
حبيت اشرحلكم اللى حصل النهارده معايا
علشان ان شاء الله تستفيدو من التجربه
واللى عاوز يجرب
طبعا انا كنت اخر مرتين تغيير زيت استعملت موبيل
دلفاك 1340 وبصراحه النهارده عملت مشاوير كتير
داخل البلد والبلد كانت زحمه جدا وقرصت على الموتور كتير
وفوجئت بالموتور سخن ولمبة الزيت نورت
نزلت على طول وبطلت العربيه
واستنيت شويه وكشفت على الزيت لقيت مستواه كويس على
الشرطه اللى فوق زى ماهو
وقتها ادركت ان الزيت فك خصوصا بعد ماجرت اللزوجه
بلمسه بأيدى
وقولت مابدهاش اروح اغير الزيت وكان فى نيتى انى اوصل
لاقرب بنزينه شل علشان كنت ناوى اغير لشل x100 وبصراحه وانا ماشى على الدائرى لقيت امارات مصر على يمينى
قولت لنفسى خش ياهاشم وجربه المره دى
روحت داخل وراكن عندهم وجاللى بتاع تغيير الزيوت
وكانت مفاجئه على غير العاده
لاول مره اتعامل مع حد فاهم كل حاجه فى عربيتى من غير ما اوضحله انا هيعمل ايه
لقيته من نفسه بيقوللى الزيت المناسب لعربيتك (باور تاكسى)
الجركن 4ك ب55 جنيه
ودرجة لزوجته 50/20 ثنائى الدرجه
وعندنا السايب بتاعه ونحاسبك بالكيلو وده افضل ليك
لان عربيتك بتاخد 2.5 ك بس
قولتله طيب مافيش احادى الدرجه
قاللى احادى الدرجه اللى عندنا درجته 40 وده مش مناسب ليك
قولتله اوك خلينا فى باور تاكسى نجربه
ابتدى الشغل وقاللى على فكره ياباشا
الزيت ده بيتغير على 3000ك بس بالنسبه ليك انت تيجى
بعد 2000 بس علشان انت عربيتك تبريد هواء والشغل كله على الزيت
قولتله انت متأكد انه هيقعد معايا 2000ك قاللى انت هتجرب بنفسك وتشوف
بعد ماخلصت دخلت عن الموظف علشان احاسب
كان الحساب كله 36.5جنيه
سعر الكيلو 13 جنيه
خدمة التغيير 3 جنيه
بقشيش للعامل 1 جنيه
والموظف عملى فاتوره وكارت دون عليه بيانات العربيه
وكتب عليه قرائة العداد
قولتله ليه ده
قاللى فى عرض احنا عملينه
لو غيرت عندنا سبع مرات الثامنه مجانا علينا
ولقيته قاللى نفس الكلام بتاع العامل اللى بره
تيجى تغير بعد 2000ك علشان انت عربيتك تبريد هواء
خرجت وانا فرحان جدا
خصوصا بعد ماسمعت صوت الموتور من جديد
ومش مصدق بعد الزيت اللى فك منى النهارده على 800ك بس
معقول ده هيقعد معايا 2000ك وانا على كده قلبى هيطاوعنى
استنى 2000ك بحالهم ماعتقدش
بس بكره نشوف
[