الموضوع: اللى عايز يعرف ممدوح ساب المنتدى ليه

اللى بيحدث فى المنتدى هنا صورة مصغرة لما يحدث فى وطننا العربى وبالاخص فى بلدنا الحبيب مصر

و اللى مرجعنا ورا ثلاثة احزاب

1- حزب ( منافقون ) اقصد ( موافقون ) اللى هما اى حاجة تتعرض عليهم ......! موافقة وبالاجماع لية ؟ ازاى ؟ ميعرفوش


2- حزب (انا معترض ) اللى هما مالقيوش نفسهم ظاهرين فى حزب ( موافقون ) فقالوا نعترض علشان الناس تعرفنا طيب بتعترض على اساس اية يا استاذ ميعرفش طيب اية مدى علمك ميعرفش طيب جربت حاجة لأ طيب بتعترض لية ولا على اية بردة ميعرفش


3- حزب ( أعداء النجاح ) اى حد نجمة يعلى او يظهر على الساحة او الناس تحبة ميخلصهمش نعمل فية اية ؟ نعمل فية اية ؟ ايوة نشنقة من رجلية.......! حرب من اى نوع وباى طريقة المهم يزهق ويفارقنا ونبقا لوحدنا تانى. ولو طلع نفسة طويل .......... هو عارف هيجرالة اية

طبعا فى المقابل فية احزاب تانية

1- حزب ( يكش تولع ) اللى هو فاقد الامل فى اى حاجة و فى كل حاجة ومتنفسة الوحيد الحجرين اللى بيحرقهم ولا بيصد ولا بيرد عايش وخلاص يتبع قائمة المتفرجين ولو شافها والعة مش هيمد ايدة يطفيها ( يكش تولع )

2- حزب ( المجتهدين ) وليس ( المجاهدين ) اللى هما بيتعبوا ويجربوا ويطوروا وبعدين يعطونا النتائج على طبق من فضة ( لا نريد منكم جزاء ولا شكورا انما نريد مرضاة الله )

3- حزب ( الزهقانين ) ودول بيبقو فى الاول من النوع الثانى ( المجتهدين ) وبعدين يتصلط عليهم النوعين الثانى و الثالث من فوق (انا معترض ) و ( أعداء النجاح ) ويوصلوهم مع الوقت الى النوع الاول ( يكش تولع )

استاذ ( محمد محمود ) انا فعلا استفدت من حضرتك معلومات كتير ولاكن اللى اهم من المعلومات واهم من العربيات واهم من المنتدى انى كسبت معرفة ( راجل محترم) . ولو سمحت لى و ( صديق ) و.... ( معرفة الرجال كنوز )
و من اجل ذلك اتأسف لك بالنيابة عن كل من ضايقك بأسلوبة فى الحوار واترك لك حرية العودة الى اصدقائك .

فعلا الفائدة الاولى لهذا المنتدى هى معرفتنا لبعض وانا سعيد فعلا بالصداقات التى كونتها عبر هذا المنتدى العزيز
لذلك ارجو من جميع الاعضاء الاعزاء ان يحافظوا على اواصر المحبة والاحترام المتبادل بينهم والتى هى من وجهة نظرى اهم من علب الصفيح التى نركبها والتى من الممكن ان تزول لاى سبب ولاكن الصداقة لا تزول .

لذلك اتمنى من الجميع ان تنحصر مشاركاتهم مابين سؤال وجواب ومناقشة اما من يريدون الجدال من اجل الجدال ( كتر الكلام و مهاجمة الناس و تجريحهم بدون علم ) فنسألهم الرحيل .

وشكرا .