الموضوع: اللى عايز يعرف ممدوح ساب المنتدى ليه

والدى الله يرحمه علمنى حاجة مهمه جدا
انى لازم ارد الجميل على قد ما اقدر مهما كانت العواقب
الغريب انى متأكد ان فيه ناس كتير من الاداره اصحاب ممدوح طيب ليه الرفض الغريب ده
هل طريقة الصياغة للموضوع مش كويسه ولا ايه بالظبط
على العموم للمره التانية ده الموضوع
تحبوا تعرفوا محمد ممدوح ساب المنتدى ليه
قبل أى حاجه احب اوضح شوية قواعد فى الموضوع بتاعى
انا عارف ان كل واحد من حقه يقول رأيه – لكن فى نفس الوقت كل واحد ليه الحرية انه يتصرف فى الشئ اللى يملكه كيفما شاء – وانا من وجهة نظرى ان الموضوع ده بتاعى ومن حقى انى أضع أى قوانين أو قواعد زى ما أنا عايز
وهى ديه القوانين
1- ممنوع بأى شكل من الاشكال مهاجمة ممدوح فى الموضوع الخاص بى
2- ممنوع عمل اى موضوع اخر يهاجم ممدوح بسبب موضوعى (رجاء شخصى)
3- ممنوع مهاجمة أى عضو أو التلميح بأى شئ جارح لأى عضو (هام جدا)
4- عدم تحويل الموضوع الى قتال وخناقات وجماعة تبع فلان الفلانى وجماعة اخرى تبع علان العلانى والهدف الاساسى من الموضوع يضيع
5- يحق لأى عضو مهاجمتى (ريحوا نفسكم لأنى مش هارد) أو التعقيب على كلامى أو تعديله أو حتى تكذيبه بشرط عدم التعرض لأى عضو مهما كانت الظروف
.................................................. ..................*
قبل أى حاجة أنا باعتذر مقدما لمحمد ممدوح لو قلت أى حاجة هاتضيقه أو أى حاجة غلط فى اللى هاقوله
أنا زى – زى أى عضو فى المنتدى أفتقدت محمد ممدوح بشده – الراجل علمنا حاجات كتير وانا هاتكلم عن نفسى ان خيره عليا – عملت زى كل الاعضاء رخمت عليه شويه فى المواضيع بتاعنا يمكن يظهر لكن برضو مختفى – انا بصراحة قلت يمكن عنده ظروف أو ضغط شغل

لكن بصراحة الموضوع ابتدى يبقى مقلق حبتين
أتصلت بيه النهارده وبعد أذنك يا ممدوح انا هاكتب اللى حصل فى المكالمة مع احتفظى بجزء خاص ليه - مع العلم ان الجزء اللى هاحتفظ بيه ولا هايقدم ولا ها يأخر
بعد السلامات والاطمئنان عليه
صبحى : ايه يا ممدوح باشا ايه اللى بعدك عننا انتا زعلان مننا ولا ايه

ممدوح : (بالعافيه بيرد) لا والله مفيش حاجه

صبحى : هو انت زهقت ولا ايه ياممدوح

ممدوح : (بغيظ وزهق) بصراحة اه زهقت ومليت من الناس الغريبة اللى بقت موجوده فى المنتدى – الواحد بيحاول يساعد الناس على قد ما يقدر لكن بيلاقى ناس بتهد اللى هو بيعمل

صبحى : يا عم اهدأ شويه - احنا ياما قابلنا نوعيات من الناس ديه ايه الجديد – لو تفتكر يا ممدوح انى كنت زماان بهاجم الناس ديه لكن بعد كده بقيت بكبر دماغى

ممدوح :أنا بقى مش بعرف أكبر دماغى – انا بدور على الحاجه الصح وبأعملها – لكن دلوقتى كل لما أقول حاجة او أعمل حاجة ألاقى واحد ولا اتنين يعارضونى لمجرد المعارضة – ناس بقى هدفها الاول والاخر الكلام والظهور فقط – مش فارق اذا كان اللى بيقولوه صح ولا غلط – المهم انهم يتكلموا وخلاااااص

صبحى : ايه المشكله يا يا ممدوح ناس كتير للأسف بالشكل ده – كبر دماغك منهم المهم انك تعمل اللى عليك وخلاص – انا لأول مره ابدأ احس أنى بخدم المجتمع ولو بشكل بسيط فى المنتدى بتاعنا – ومش هانكر انى اتعلمت منك كتير – وبعيد عن العربيات احنا فعلا أصبحنا أخوه وأصحاب بنخاف على بعض وبندور على بعض

ممدوح : فعلا انا أتعرفت على ناس كتيييييييييييييير محترمه عن طريق المنتدى ومنهم ناس كنت أعرفهم أيام الدراسه

صبحى : طيب يا سيدى الناس اللى انت تعرفهم واللى بتحبوهم وبيحبوك عايزينك ترجع

ممدوح : والله يا صبحى انا فعلا مبقتش قادر- أنا وقتى كله أغلبه بقى فى المنتدى وده طبعا ليه تأثيره على بيتى وعلى شغلى - وانا بقيت باحسبها كالتالى – انا كل اللى بدور عليه انى اساعد الناس – اكتب رد على سؤال الاقى واحد كتب لى رد غلط 100% - أبدأ أرد عليه – يبدأ يتحول الموضوع لحرب وأنا اللى بيتحرق دمى فيها

صبحى : يا عم كبر دماغك واللى عايز ياخد معلومة منك ياخدها واللى مش عايز هو حر

ممدوح :ما ينفعش يا صبحى أشوف حاجة غلط وأسكت – فى ناس بتقول معلومات غلط ممكن تخسر الاعضاء فلوسهم ووقتهم – وأوقات بتكون معلومات ممكن تؤدى الى كوارث – والمشكله ان فى أعضاء كثيرون معلوماتهم محدوده (زى أنا *محمد صبحى* على سبيل المثال) وبياخدوا المعلومة على اساس انها سليمه 100 % بدون تفكير(مش زى أنا *محمد صبحى* خااااااااااالص)

صبحى : للأسف انا لاحظت فى الفتره اللى فاتت النوعيتين دول من الاعضاء
النوعية الاول بترد على أى سؤال والسلام المهم انها ترد – تعمل search على google وترد أى رد
والنوعيه التانيه للأسف بتاخد أى معلومه بدون التأكد من صحتها

ممدوح : بالظبط هو ده اللى بيحصل واحد تلاقيه بيقول محاضره طويله عريضة عند أى سؤال وفى النهايه المحصله صفر – وطبعا لو عضو جديد مش بيبقى فاهم ايه اللى بيتقال واذا كان صح أو خطأ وبيمشى وراه – يا صبحى مش عارف اذا كنت انت معانا فى المنتدى ساعتها ولا لأ – فاكر لما الناس كانت دايما تسأل هل فيه حل لمشكلة فرامل اللانوس – متكلمتش فيها لغاية لما أتأكدت ان التجربة نجحت على عربيتى 100% لأن ديه أرواح ناس ومسئوليه

صبحى :والله يا ممدوح انا عندى مهندس فى الشغل مطلع عين اهلينا – لما بتحصل أى مشكله يفضل يعمل تحاليل وافتراضات واحتمالات وفى النهايه المشكله بتفضل زى ما هيه- ولما احنا نحل المشكله تقريبا فى 1/10 الوقت اللى بياخده يقول اننا شغلنا كفته – الراجل ده اكاديمى أكتر من انه ممكن يشتغل بأيده – والغريبة برضو ان كل اللى بيدور عليه هو الظهور وبس

ممدوح :بالظبط هو ده اللى انا بقوله - حتى العضو XXXXXX أتصل بيه وقلنا نفس الكلام – ردود أكاديميه وشرح مفصل لحاجات ليس لها أى علاقه بالسؤال

صبحى :يا عم ممدوح ريحنى وأرجع تانى حتى لو بشكل مبسط – حتى لو 10 % بس من وقت فراغك – كلنا بنتعلم منك ومحتاجين كتييير لسه منك

ممدوح :والله يا صبحى انا تقريبا اديت كل اللى عندى والناس كانت ناقصها موضوع تنظيف المينفوالد والايديل ليرنينج واعتقد كده خلاص

صبحى :هو ايه اللى خلاص

ممدوح : انا عندى بيتى وشغلى – ولو شغلى اتأثر المنتدى مش هاينفعنى .................................................. ......................................
وبعد كده شوية كلام شبه تكرار للكلام اللى فات وانتهت المكالمه على كده
خلاصة الكلام
محمد ممدوح فى قمة الاحباط من اللى بيحصل
الراجل فعلا كان شغال علشان الناس وبس
فجأه لقى نفسه فى صراع سخيف لأثبات الاراء – والظهور فقط
أسف انى طولت جدا جدا جدااااااااا عليكم بس فعلا محمد ممدوح يستاهل ان أسهر أكتب الكلام ده علشانه – الراجل علمنى كتيييييييير وده اقل واجب – انى لازم احافظ على وجوده معانا – وفى نفس الوقت انا عن نفسى لسه عايز اتعلم كتتتتتتتتتتتتتتتتير وكتتتتتير من ممدوح
أنا باقترح اقتراح ممكن يكون غريب وانا نفسى مش مقتنع بيه – ان يكون فيه شبه موضوع ثابت للأسئله الموجهه لمحمد ممدوح وان الراجل يرد عليها واحنا بينا وبين بعضنا نبدأ نتناقش فيها
- يا ريت لو فى اى حد يقترح اى حل لأن فعلا دماغى فاضيه خااااااااالص ومش قادر أركز من كتر التعب
فى النهايه برجو من حضراتكم للمره الاخيره عدم مهاجمة أى عضو فى موضوعى سواء محمد ممدوح أو غيره
ويا ريت تنسوا فكرة المجموعات والفرق ديه شويه
رجاء هام : برجاء ان تكون المشاركات جديه فقط – ممكن نأجل الهزار شويه بعد أذنكم – ممكن

اعتذر لعدم ردى فى الفتره القادمه لأنى هاسافر كمان 4 ساعات وان شاء الله هارجع بعد بكره