ايه حكاية نظام المدارس فى مصر؟؟

**أحمد سالم** · 04-05-2009 05:51 PM

هو ايه الفرق بين المدارس فى مصر
يعنى بنسمع ان مدرسه كذا تجريبيه
واخرى نموذجيه
واسامى تانيه مش فاكرها
هل حد يعرف ايه مميزات هذه المدارس وايه سبب تسميتها بهذه الاسماء
وكمان عايزين نعرف فين المدارس الازهريه المدعمه من الحكومه وهل يشترط لو هقدم لطفل فى مدرسه ازهريه فى مدينة نصر مثلا لازم اكون من سكان مدينة نصر
ارجو من الل عنده اى معلومات عن موضوع المدارس يقولنا
كمان سمعت ان فى مرحله تعليميه الان قبل الكى جى
وتسمى بال بى سى
وهى من سن سنتين ونصف

وياريت لو كل الاخوه يرشحو افضل مدرسه ممكن يدخلو اولدهم فيها

**Ahmed Selim** · 04-05-2009 06:12 PM

كل الل أقدر أفيدك فيه هو ال Bc

أو ما يعرف بالبيبى كلاس و هو مجرد مرحلة سابقة للكى جى لصقل بعض المهارات التعليمية عند الأطفال.

هى مش مرحلة أجبارية خالص بس الفكرة أن معظم المدارس الخاصة بتعمل أختبار للطفل عشان تشوف قدراته الأستيعابية عاملة أيه و بناءً عليه تحدد هل ينفع يدخل كى دى وان ولا لأ......و لو لأ يبقى بالتالى بيرشحوا دخوله للبيبيى كلاس.

التجريبية والنموذجية كل معلوماتى عنهم أنهم مدارس حكومية بمصاريف و بمستوى أعلى بالطبع من المدارس الحكومية المجانية.

بالتوفيق إن شاء الله

**أحمد سالم** · 05-05-2009 01:27 AM

البيبي كلاس ... مش محتاج مدرسة
أي حضانة مناسبة للطفل بجوار المنزل تفي بالغرض
المدارس النموذجية ... دي العربي العادية .. وإللي بياخد لقب نموذجي
بيكون مميز في المستوى
المدارس التجريبية ... دي مدارس حكومية لغات ... بتدرس فيها اللغة والمواد العلمية بالإنجليزي طبعا .. ودي بتبدأ من 500 ج إلى 2500 على حسب.
المدارس الخاصة ... فيها قسمين قسم عربي ولغة مستوى رفيع ... وقسم لغات ... ودي مالية البلد
المدارس اللغات الصح .. دي إللي بتدرس باللغة وبتدي على الأقل 3 لغات E . F . G ... دي معدية طبعا تبدأ من 5 و 6 ألف K.g على الأقل
المدارس الأزهرية نوعين ... حكومية ... منها واحدة في عباس العقاد وبتاخد سن كبير ومصاريفها بتبدأ من 400 أو 500 ج .. والأولوية لسكان نفس المربع السكني خصوصا لو مفيش باص
ومنها الخاصة واللغات ... زي الغد المشرق ... المعهد التجريبي الأزهري .... الخ ودي ساعات بتعدي ال 6 آلاف K.g ....

أنصح حضرتك .. وده رأي شخصي ... بلاش أزهري
ممكن تدخل مدرسة ذات طابع ديني مثال ... طلائع الكمال ... ومدرسة السيدة عائشة ... وكام واحدة من النوع ده ... بيحفظوا قرآن ... وبيأكدوا على الحجاب في السن اللازم ليه ... سلوكيات جيدة ... فصل بين الولد والبنت ....

خاللي بال حضرتك
التقديم في اللغات في مارس وإبريل من سن تلاتة ونص فيما فوق
المدارس الخاصة في مايو
والتجريبي في نصف مايو
والنتيجة بتبان في شهر 7
لازم تقدم في اكتر من مدرسة ... تصور الطفل صور كتييير وتطلع شهادات ميلاد كمبيوتر وتلف المدارس كعب داير وتدفع ابليكيشن وتعمل انترفيوه ... وشغلانة .... ربنا معاك ومعانا

آسفة على الاطالة

بسم الله ماشاء الله عليكى اختى الكريمه
معلومات كامله مكتمله والكمال لله
الف شكر ليكى وربنا يجزيكى خيرا
اللهم وفقها ووفقنا لما تحب وترضى

**أحمد سالم** · 05-05-2009 01:38 AM

أنصح حضرتك .. وده رأي شخصي ... بلاش أزهري

بس ارجو من حضرتك توضيح اكثر بخصوص المدارس الازهرى
لانى فعلا كنت بفكر فيها
لو ممكن توضيح السبب

**Hany A Fattah** · 05-05-2009 02:15 AM

مشكلة المدارس الازهرى ان المنهج فيه مواد تانى زياده عن باقى المدارس وبتعتبر مواد اساسيه كمان
تخيل اخويا كان ازهرى من الابتدائى ودخل هندسه الازهر كان كل سنه ينجح فى مواد التخصص ويسقط فى الفقه او الشريعة مع انه مش هايشتغل بيها بعد التخرج

**hn_kamal** · 05-05-2009 08:47 AM

فيه مدرسة اسمها منارة القاهرة فى مدينة نصر ودى مدرسة فيها قسم لغات وقسم أخر انجليزى مستوى رفيع
واحسن حاجة عندهم اهتمامهم بتحفيظ القرآن من سن الkg
ومصاريفها تقريبا 2600 جنيه
وهما مدرستين منفصلتين واحدة للبنات واخري للاولاد

**نور العمر** · 05-05-2009 04:02 PM

تمام منارة القاهرة دي ممتازة فعلا

بالنسبة للأزهري ... مواده كتيير جدا ... وصعب مع تقل المواد الدراسية دلوقتي .. مواد ثالثة نزلت لأولى وحاجات من خامسة نزلت لثالثة إللي متابع وولاده في المدارس شايف المناهج تقيلة إزاي..

لو دخلنا أزهري بندخل عشان الدين ... ده ممكن ننميه بردوا بالخارج
بالقراءة الحرة .. وبتحفيظ القرآن في المسجد ... ومش كل الدعاة إللي على الساحة خريجين أزهر أمثلة ( عمرو خالد - معز مسعود ).

ودي حرية شخصية ... وطبعاً إللي يقدر يدخل أزهر ويوصل بابنه لتحمل 17 مادة في السنة ... يبقا ممتاز طبعا

والله المستعان

**Samah AbdAllah** · 05-05-2009 10:07 PM

بس لازم نراعى ان مدارس الازهر لو عندك بنت مش ولد البنات ليهم فى المستقبل كليات محدودة مش زى الاولاد حتى فى المجموع اللى بيدخل كل كلية بيختلف فى الولد عن البنت
ومع احترامى للكثير من دارسى الازهر فمدارس الازهر حاليا دون المستوى وكله برده دروس خصوصية فتخيل انت كمية المواد دى مع الدروس المذاكرة هتبقا امتى

-

الموضوع: ايه حكاية نظام المدارس فى مصر؟؟

LinkBack

أدوات الموضوع

عرض

-

-

-

-

المواضيع المتشابهه

هما ليه ما يعملوش نظام الواحد ميوديش عياله المدارس

عاوز اعرف نظام الدبلومة فى كلية الحقوق نظام الدراسة واسهل فرع اية

المدارس

هي دي المدارس في مصر

للبيع 0198688887 جديد وعلى نظام الخط ويوجد 010 مميز نظام الكارت

الكلمات الدلالية لهذا الموضوع

المفضلات

المفضلات

ضوابط المشاركة