اين الطائرات الخاصة !! هى البلد ناقصة زحمة ..

فى ايه فى البلد النهارده يا جماعة !!

انزل من بيتنا الساعة 11:30 اروح الجامعة الساعة 1:45 !

ربع ساعة على كوبري العباسية و نص ساعة فى اول صلاح سالم و نص ساعة كمان عند الكلية الحربية و الشوارع مليانة ظباط و عساكر و الدنيا هايسة خااااالص ..

كان فى موكب معدى من قدام الكلية الحربية الصبح و انا رايح و ده كان السبب فى الزحمة القاتلة اللى الواحد كان كره حياته بسببها لانى ملحقتش المحاضرة اللى رايح علشانها ..

ايه بقي اللى معطل الطريق كل ده لغاية الساعة 4:15 كمان ...
حتى عند ارض المعارض الدنيا مقفولة و زحام مرورى يقرف و الله ..

لما فى ناس مهمة اوى كده بتتنقل فى البلد . ما يعملوا لهم طائرات خاصة و خلاص ..

ليه سيادة الرئيس لما ييجى من المطار مياخدش طائرة خاصة للبيت !! ليه رئيس الوزراء ميكونش لهم طائرات خاصة و يريحوا الناس من الزحمة دى ..

انا بيتهيأ لي الزحمه بسبب وفاة حرم رئيس الوزراء.

اقتباس:

---

لقاهرة - محرر مصراوي - توفيت صباح الثلاثاء المربية الفاضلة السيدة منى السيد عبدالفتاح حرم الدكتور أحمد نظيف رئيس مجلس الوزراء عن عمر يناهز 57 عاما بعد صراع مع المرض .

http://productnews.link.net/AFP/arab...lt-245x174.jpg

وستشيع الجنازة بعد صلاة عصر الثلاثاء من مسجد آل رشدان للقوات المسلحة.

---

يعني امبارح عيد ميلاد.
والنهارده وفاة.

ربنا يسترها ومايكونش عندهم طهور

الجنازة شيعت من مسجد آل رشدان بعد صلاة العصر.
عشان كده كان في زحمة عند أرض المعارض.

صلاح سالم واقف من الصبح .. لان فى ضيوف جايين من المطار .

و ميدان العباسية العربيات فوق بعض من الزحمة و العطلة .

طب لما فى مناسبات كده او ظروف .. ما يدوا الناس اجازة بقي و تبقي عطلة بعطلة بدل ما الناس تتبهدل و تتخنق كده .

كأن قلبي كان حاسس

الحمدلله اني ما خرجتش النهاردة

انا بجد ضغطي بقي مرتفع علي طول من الزحمة و السواقة

شكلي هابدأ الضغط بدري بدري:b4_611:

البلد بايظة

يعنى هى الطرق ناقصة واقفة وعطلة مش كفاية علينا زحمة كل يوم تبقا زحمة المنسبات كمان

المفروض فى القاهرة تبقى الناس عاملة حسابها على ان العربية مكان اقامة مش مجرد وسيلة للتنقل

يعنى لازم تكييف و DVD Player واضرب دش على السقف وتلاجة وبويلر .. عيش حياتك

اقتباس:

---

المفروض فى القاهرة تبقى الناس عاملة حسابها على ان العربية مكان اقامة مش مجرد وسيلة للتنقل

يعنى لازم تكييف و DVD Player واضرب دش على السقف وتلاجة وبويلر .. عيش حياتك

---

ذهابي للقاهره مره اسبوعيآ (حوالي 350 كم ذهابآ أيابآ ) .
علمني ازاي اختار الوقت المناسب للسفر.

فعلا الوضع ممل وقت الذروه.

ماهو المشكلة انك تبقى نازل لمصالح معينة هتبقى مرتبط باماكن ومواعيد

مش عايز اقولك ان الباسبور بتاعى بقالة سنين فى وزارة الشباب ومليش نفس اروح اجيبة لأنى لما بنزل بالنهار بنزل يدوب على قد المشوار اللى رايحة وخلاص حتى مواعيد الشغل بقدر الأمكان بنخليها بالليل

لكن غير كدة بتجنب تماما اكون ماشى فى شوارع القاهرة بالنهار ، بالليل من بعد 12 وكل ما تتأخر يبقى احسن

يا اما زى ما قلت تبقى عامل حسابك انك قاعد فى العربية زى ما بتقعد فى البيت وشوفلك حاجة تعملها

متبقاش مستنى انك توصل علشان اعصابك متتعبش

انت كدا زعلان
انا النهارده اخدت مسافه مش كبيره اوي
بعد مدينه العبور بشويه لحد مكان اسمو موقف العاشر او موقف النزهه
اخدت في حته تعتبر صغير ساعتين الا ربع
من الساعه 5 لحد 6:45 والمفاجأه اني اخدت صلاح سالم من اول الكليه الحربيه لحد كوبري الفنجري في عشر دقائق تقريبا
وكنت في الموصلات
الطريق ده بقى وحش جدا
ومفيش نظام خالص عربيات خارجه من طريق بلبيس وعربيات جايه من طريق اسماعيليه وعربيات جايه من العبور
والدنيا هناك قمة الزحمه
منصحش حد يروح هناك بعد الساعه 2 مثلا ولحد الساعه 7 مثلا بردو

ولما يكون في واحد بيموت مش مشكلة الاسعاف تيجبه او حتى توصله
المهم السيد المسؤول يروح بسرعة ومن غير صداع ولا وجدع دماغ
هي خربانة خربانة خلاص مفيش فايدة والضرب في الميت حرام

ما هو برده مش كل الحتت ينفع تتراح بالطياره ولو هيعملو تجهيزات في كل حته هتتكلف كتير
والحاجه المهمه قوي ان الناس مش دي مش بتحس بالزحمه زينا