الموضوع: تحت بند عيوب التقفيل القاتلة

المشاركة الأصلية كتبت بواسطة amir

يا باشا انا بحب المنتدي ده و بحب اكتر اعضاءه المميزين بأدبهم و علمهم و فايدتهم للناس
لو هاتكلم في التوبيك ده بصراحه كده و بالبلدي و من دون تزويق في الكلام فاهقول الاتي:
انا حاليا بفكر ابيع الصني و اجيب جين
طيب هل انا ماديا قادر علي كده الاجابه اه بس موضوع فرق الفلوس بين تمن الصني بتاعتي اللي اتقدر من المنتدي ب 75 الف و تمن الجين مانيوال حوالي 6 الاف جنيه
نزود بقي التراخيص و التأمين يعني كمان 5 او 6 يبقي المجموع في رينج ال 12 الف فرق فلوس هدفعها من فلوس حاجات تانيه محتاجها حاليا و بشده
طيب لو جيت عملت كده و جيت علي نفسي ماديا لتحقيق رغبتي القديمه في امتلاك جين و يوم و اتنين و ابدء نفس المعاناه و الحسره اللي اتعرضلها برضو بعض الناس اللي اشترو موديل 2009 في عيوب بعضها تافه فعلا و الاخر مقرف و يجيب احباط زي موضوع التكييف مثلا و اضريت اني افك التابلوه علشان اغير مكان الكوندنسر ولا الكويل مش فاكر
و برضو بعد كده الاقي التكييف يتسد بالتلج
اكيد بيني و بين نفسي هموت من الحسره من كده زائد التابلوه اللي هيبدء يزيق بعد الموضوع ده
بمعني العربيه بقت مش فارقه عن اي مستعمل موديل قديم
و مش هينفع نتكلم و نقول اصل دي حالات نادره و حظهم وحش
حظ ايه بقي ده واحد وثق في العربيه موديل 2009 و بعد اسبوع ولا شهر اتفتحت عليه بوابات جهنم في عربيته الزيرو و التوكيل مش نافعو ببصله
انت مش متخيل انا بحب الجين قد ايه و الله بقعد اقنع نفسي ان الموضوع هيعدي و تقع تحت ايدي العربيه اللي تخليني اكدب العيوب اللي الناس بتتكلم فيها كلها!
بس ارجع و ابص علي الناس اللي جابو موديل 2009 من شهر او اتنين و اخاف
ايه اللي هيخلي حظي احسن منهم ما هما كمان فكرو كده قبل ما يشترو و للاسف اتصدمو في قرارهم و محدش نفعهم و لو حبو يبيعوها الخساره هتكون تقيله
مش عارف انا لو يحكموني في رقبه البني ادم مسئول الجوده في بروتون هحطه تحت العربيه و افرمه
لأنه بغباءه ده مموت سمعه العربيه مع انها عشره علي عشره و حتي الناس اللي طلعت لهم مشاكل برضو بيدافعو عنها لأنها تستاهل طيب ناقص ايه في المعادله دي
عربيه رائعه+موتور قوي+اداء و ثبات تحفه+كماليات متميزه+شكل داخلي و خارجي جبار
المعادله دي ناقصها ايه علشان الناس تتطلع بالجين السما و تعد العربيه الاولي عالميا؟
ناقصها جوده التقفيل
بس كده
حاجه تافهه جدا جدا لكن جايبه العربيه في محل الشبهات
و اداء التوكيل في معالجه الحاجات دي برضو حاجه تعر و تكسف يعني العربيه عاملاله مبيعات اظن اكتر من العربيات "الغاليه" اللي فرحانين بيها قوي قوي في معرض السابع و يحسسوك ان كتر خير الدنيا انهم بيبيعوها جنب الموديلات الفخمه اللي هناك و كأنها جربه مثلا!!!!! و كل ده من غير حملات اعلانيه محترفه او لا قدر الله اعلانات في الجرائد ولا حاجه خالص اللهم الا اعلان يتيم في الجرنال مره واحده تاريخيه علي رأي احد كدابي الزفه المشهورين!!

السلام عليكم ورحمة الله وبركاته
انا مع حضرتك قلبا وقالبا فى كل كلمة حضرتك قلتها خاصة انى برضه زى حضرتك برضه ناوى اشترى العربية باذن الله وبدرس الموضوع لغاية دلوقت ولا انكر انى فعلا مغرم بالعربية جدا شكلا وموضوعا بس عمال اتخيل مثلا بعد ما اروح ادفع اد كده فى العربية وحد ييجى يركب العربية معايا بعد ما اشتريها يشتغل التزييق او تحصل مشكلة فى الزجاج او التكييف مش متخيل تعليق الناس على العربية وعليا ايه وخد باه دش من النصايح واللوم وليه مجبتش يابانى انت كده كده دافع فلوس وهتعد طبعا تبرر وتدافع عن العربية وتقولهم بس الموتور جامد والثبات رهيب وهتحس انك كانك عملت جريمة فى حق نفسك مع ان انا هبقى متاكد ان العربية فعلا تحفة بس الحاجات الهايفة دى بتاثر فينا كمصريين خاصة ان معظمنا مدمن ماركات وعلى فكرة انا مش منهم خالص بس هيكون احساس سىء اوى لو العربية اتفتحت وهى لسه زيرو وفرحان بيها احنا على فكرة يا اخواننا بنتكلم فى شوية حاجات انا متاكد انها بالنسبة للناس اللى عملو العربية دى هايفة وبسيطة وحتى لو قرروا زيادة سعرها حاجة بسيطة مقابل زيادة الجودة وانهاء المشاكل انا متاكد الكل هيرحب جدا ويقول بجملة الفلوس بس مقابل كده هياخد عربية تحفة اللى بيحصل ده بالظبط زى المثل المعروف بتاع اللى بوظ الاكلة عشان شوية ملح يارب فى فى ماليزيا يعرفو اختراع الشيكارتون ده يمكن ناخد عليه براءة اختراع هنا فى مصر هاها
من وجهه نظري المتواضعه لو فعلا عايزين نخليهم يتعدلو يبقي مش من ضغط اصحاب العربيه لأن دول رجلهم جت في الخيه خلاص
انا شايف ان اصحاب العربيات المعيبه يتحدو و حاجه من اتنين
1- يلمو فلوس من بعض و يعملو شكوي في الجرائد و تحذير للناس من العربيه و دي هتبقي قاتله للمبيعات و هيضطر انه يعيد التفكير في تصرفاته, بدل ما كل يوم المشترين يزيدو و هم مطنشين صرخات الملاك
2- اعضاء نادي بروتون هنا من اصحاب الشكاوي من العربيه يتناوبو الذهاب امام التوكيل و يرفعو يفط علي عربياتهم انها معيبه و التوكيل مش بيعالج عيوبها و مطنشهم (زي بالظبط قصه الراجل صاحب النوبيرا اللي سابهلهم في الشارع و جواها ورق بيحذر الناس من التعامل مع التوكيل) و ساعتها برضو المبيعات هتنزل الارض
و من واقع متابعتي لقسم البروتن فالموضوع مش مجرد كلام حلو من مهندس في التوكيل او صاحب التوكيل الموضوع اكبر من كده بكتيير و دي مجرد مسكنات للملاك و مادام المبيعات مستمره و الصيانات بتتعمل هيوجعو دماغهم ليه بقي؟

لازم فعلا ملاك الجين علي الاقل هنا في المنتدي يجتمعو و يفكرو في اداء العربيه و التوكيل و يقررو اتباع اجراء من الاجرائات اللي اقترحتها دي
و صدقوني لو واحد داخل يستلم العربيه و شاف منظر زي ده اكيد اكيد هيراجع نفسه مليون مره لأن الفارق بينه و بين صاحب العربيه اللي موقف عربيته و بيشتكي انه ده استلم قبله و الفاصل بينه و بين الراجل صاحب العربيه انه يمضي ورقه الاستلام


تحياتي للجميع و ارجو ان قسم البروتون يتقبل كلامي و محدش يفكر ابدا اني بهاجم العربيه انا بموت فيها و نفسي فيها بس فعلا خايف

بالنسبة للجزأ ده من كلام حضرتك انا بختلف مع حضرتك فيه شوية لان انا عارف ان كلنا بنحب العربية جدا حتى بعيوبها بس لو عملنا اعلان مثلا زى ما قلت او خوفنا اللى لسه مشترهاش العربية هتموت فى مصر ومش هتقوم لها قومة تانية والوكيل مش هتفرق معاه حاجة كده كده هو بيتاجر فى انواع تانية ومش هتقف على الجين يعنى خاصة ان زباينها مش كتير زى اللانسر اللى بقت زى 128 فى انتشارها او الهيونداى فى تنوع موديلاتها واسعارها يعنى اقتصاديا مش هتفرق معاه اوى واديك شايف كل يوم الوكلاء بيتغيروا على ماركات العربيات وعادى ده تاجر لو حاجة سوقها وقف بيبيع حاجة تانية ومش فارقة معاه اوى ده غير فى نقطة تانية مهمة كون التوكيل غالى او فيه اهمال دى مشكلة مفيش كلام بس انا شايف ان العيوب اللى احنا بنتكلم عنها اساسها مش التوكيل اساسها المصنع فى ماليزيا خاصة ان العربية بتتجمع وتتصنع هناك يعنى الجودة عندهم فيها مشكلة وبالتالى التركيز فى الخطاب لازم يكون مع الشركة الام وبرضه مع الوكيل وحتى لو قلنا انهم بيجيبو هنا فرز تانى مثلا ودى مش معلومة بس بقول مثلا لما الشركة الام تلاقى ان الناس متذمرة من مستوى التقفيل فى مصر اكيد هتمنع الوكيل انه ياخد اى عربية معيبة عشان هتعرف ان الناس هناك فاهمة وكلامهم ممكن ياثر على المبيعات فى مصر عشان كده انا مصر على تجميع جميع مالكى العربية فى نادى يعبر عنهم كلهم ولو نقدر نعمل نادى تانى لكل راغبى شراء الجين 2 ونقول اننا عاوزين نشترى العربية بس احنا خايفين عشان المشاكل اللى عرفناها من مالكى العربية وعاوزين نتاكد ان الشركة هتلافى هذه العيوب فى الموديلات القادمة عشان فعلا نشترى واظن اقتراح الاستاذ رافى كان كويس جدا لتنظيم الاعتراض بشكل مرتب ومؤثر.
اخوانى المحترمين جدا يارب كلامنا ده يترجم الى فعل وصوتنا يخرج من جوه المنتدى لبرة بشكل حضارى يعرف الناس برة وفى التوكيل انهم بيتعاملو مع ناس محترمة وفاهمة وعاوزة المصلحة للكل لان لو المرة دى الكلام والاقتراحات دى كلها لو ماجبتش نتيجة وتحولت لفعل مؤثر هتبقى مع احترامى ليكم جميعا زوبعة فى فنجان محدش حس بيها ويبقى احسن لو محدش يفتح الموضوع ده تانى عشان مننفعلش ونقترح ونشجب ونقول وفى الاخر نعمل زى كل العرب وننزل على مفيش

السلام عليكم ورحمة الله وبركاته
انا مع حضرتك قلبا وقالبا فى كل كلمة حضرتك قلتها خاصة انى برضه زى حضرتك برضه ناوى اشترى العربية باذن الله وبدرس الموضوع لغاية دلوقت ولا انكر انى فعلا مغرم بالعربية جدا شكلا وموضوعا بس عمال اتخيل مثلا بعد ما اروح ادفع اد كده فى العربية وحد ييجى يركب العربية معايا بعد ما اشتريها يشتغل التزييق او تحصل مشكلة فى الزجاج او التكييف مش متخيل تعليق الناس على العربية وعليا ايه وخد باه دش من النصايح واللوم وليه مجبتش يابانى انت كده كده دافع فلوس وهتعد طبعا تبرر وتدافع عن العربية وتقولهم بس الموتور جامد والثبات رهيب وهتحس انك كانك عملت جريمة فى حق نفسك مع ان انا هبقى متاكد ان العربية فعلا تحفة بس الحاجات الهايفة دى بتاثر فينا كمصريين خاصة ان معظمنا مدمن ماركات وعلى فكرة انا مش منهم خالص بس هيكون احساس سىء اوى لو العربية اتفتحت وهى لسه زيرو وفرحان بيها احنا على فكرة يا اخواننا بنتكلم فى شوية حاجات انا متاكد انها بالنسبة للناس اللى عملو العربية دى هايفة وبسيطة وحتى لو قرروا زيادة سعرها حاجة بسيطة مقابل زيادة الجودة وانهاء المشاكل انا متاكد الكل هيرحب جدا ويقول بجملة الفلوس بس مقابل كده هياخد عربية تحفة اللى بيحصل ده بالظبط زى المثل المعروف بتاع اللى بوظ الاكلة عشان شوية ملح يارب فى فى ماليزيا يعرفو اختراع الشيكارتون ده يمكن ناخد عليه براءة اختراع هنا فى مصر هاها . معذرة الرد ده كان على الجزا الاول من المشاركة بتاعة استاذ امير

المشاركة الأصلية كتبت بواسطة amir

ماهو للاسف النقطه الخاصه بوقوع مبيعات الجين في مصر حاليا هي الحاجه الوحيده اللي ممكن تتعمل
ملاك الجين مش قادرين ياخدو حقهم
و انا لو نزلت اشتريتها هابقي عباره عن ضحيه اخري و هانضم لطابور طويل من مالكي الجين اللي محدش عارف يتمتع بعربيته الزيرو منهم بسبب المصنع في ماليزيا و بسبب طناش التوكيل في حل المشاكل او قله قطع الغيار او غيره او غيره
يبقي ماعدش فاضل الا ان الملاك يفضحو التوكيل و ساعتها لما المبيعات تنخفض هيضطر انه يصرف فلوس في دعايه جامده و يحسن مراكز الخدمه الخاصه بيه بدرجه كبيره و يحل جميع المشاكل القائمه حاليا لكسب ثقه المشترين المحتملين
لكن فكره انه تاجر و العربيه دي بالذات مش فارقه معاه فالموضوع فيه كلام كتير
لو كان بيبيع شيروكي و كرايسلر و سيتروين بكثافه الجين تو كان ايه جبره انه يبيعها و يجيب لنفسه الهم ده كله؟
الموضوع تجاري بحت و الراجل بيكسب زي الفل
يبقي يقدم لعملاءه خدمه تكافئ مكاسبه
مش يتهرب منهم و كأنهم مصابين في مستشفي عام!!!!
و فكره انه كلام و خلاص من عدمه فدي يحسمها اصحاب الجين اللي لاقو ويلات التقفيل و مستوي التوكيل في معالجتها
انا و انت مجرد مشترين محتملين
و ربنا يسهل و الواحد يقدر يطمن نفسه و يشتري العربيه اللي بيتمناها و خايف ينتقل الي ارض الندم بعد كده

انا معاك والله وحاسس نفس احساسك بالظبط بس انت عارف ان احنا هنا فى مصر لما بتطلع فى دماغنا حاجة او اعتقاد معين من ناحية عربية او ماركة انسى باه انك تعرف تغير الفكرة دى خاصة لما ييجى الشكوى العلنية من اصحابها شوف عندك المازدا اعدت فى مصر كام سنة مشهورة بالفاسدة لغاية مابدات ترجع شوية لها الشعبية بالموديل الجديد يعنى على الرغم من ذكاء المصريين الفطرى بشكل عام بس احنا شعب معتقدات وفتاوى برضه بس ده ما مش معناه ان نفرط فى حقنا فى كل قرش بندفعه . بالنسبة للتوكيل وهتفرق معاه الجين ولا لا انا قصدى ان الوكيل ده مش هيغلب شوف مثلا حسام ابو الفتوح كان وكيل ماركة من افخم واغلى واجمل عربيات العالم واتسحبت منه دلوقتى وكيل اسبرانزا وشغال زى الفل احنا كمستهلكين بننتمى عاطفيا لماركة او موديل معين وندافع عنها بس الوكيل اهم حاجة عنده الربح صينى هندى ماليزى المهم اللى تسكب بيه العب بيه وطول ماهو بيبيع العربية بعيوب ومن غير عيوب ومحدش بيعترض او يبدى حتى امتعاضه يبقى مفيش حاجة هتتغير ولو بعد 100 سنة

احنا ياجماعه مشكلتنا ان احنا كلام مش فعل
للأسف احنا حاولنا كتير نعمل حاجه وانا من الناس دي ولكن عند الجد ولا اي حد موجود
اديلكم مثال انا عن نفسي مثلا بدات اني اغير التيل والزيت بره التوكيل لاني لقيت ان الخامات مقرفه جدا واسعار غاليه جدا
ليه ادفع في تيل فرامل امامي فقط بتغييره 320 جنيه وانا جبته من بره ب 125 جنيه وهو هو ويمكن احسن
وليه ادفع مصنعية تغيير زيت فقط والزيت من عندي كمان 130 جنيه
ليه ؟؟؟

يا أحمد المشكلة انك لو عملت حاجة برة التوكيل هتخرج برة الضمان.

كل ده فالعربية وبتقول عليها تحفه ؟!
يا ريت اعرف تحفه فايه؟