الاتوستراد-لا بئة كده كتير اوي
امبارح وانا مروح البيت من على الاتوستراد في طريقي لحلوان لاقيتهم بيعملوا ايه ...
احكيلكم القصة من الاول
من سنة كده تقريباً كانت السيدة سوزان مبارك رايحة زيارة للمعصرة من على الاتوستراد طبعاً الطريق ده كان ضلمة وضيق وبقدرة قادر الطريق فجأة بئا 7 حارات متسفلتين ومنورين ولا اجدعها طريق دولي والحتة دي العربيات بقت بتجيب فيها 120 واكتر كمان وحصلت فيها كذا حادثة راحوا الاهالي طلبوا من المحافظ يعمل لهم كوبري مشاة او نفق لكن طبعاً بما انك في مصر وماحدش بيعبرك غير لما تعمل مصيبة:beatdeadhorse5: الناس جابوا كاوتشات وحرقوها وقفلوا الطريق لغاية ماجلهم المحافظ ووعدهم انه هيحل المشكلة دي بعدها بيومين فعلاً حل المشكلة بس ازاي بئا - عملوا في الحتة اللي حصلت فيها الحوادث دي 7 مطبات يا عالم- اه والله 7 في مطبات منهم بتبقى العربية واقفة على مطب واخرها على المطب التاني وعملوا لجنة عند المطبات دي واول ماتعملت طبعاً الناس ماتعرفش ان هنا في مطبات فأيه اللي حصل ؟
بالظبط كده حوادث غيرعادية منها مقطورة شايلة صخرة كبيرة اتقلبت هناك والصخرة لسا موجودة لحد دلوقتي على جنب الطريق "للعبرة" المهم بعدها ب500 متر كده في مدخل تاني للمعصرة الناس اللي هناك اظاهر انهم غاروا من المدخل الاولاني راحوا عاملين نفس القصة قاموا عاملولهم 5 مطبات هما كمان "5بس عشان ده مدخل صغير" المهم تطلع بئا من المطبات دي كلها بعد 1 كم كده قاموا عاملين 4 مطبات محترمة مش عارف عاملوها لمين رغم انها حتة فاضية ومافيهاش حد يحرق كاوتشات ويقفل الطريق بس بصراحة فيه منهم مطب واحد بس ليه لازمة لانه عند يوترن وبيحصل فيه حوادث وده المطب الوحيد اللي ليه لازمة في مسلسل المطبات اللي على الاتوستراد ده غير المتاريس اللي بيسموها مجازاً مطبات لسا بيبنوها جوة حلوان
انا بئا كنت باخد صب واي عشان ادخل حلوان ومابعديش على اخر 4 مطبات والصب واي ده كان فيه حفرة كبييييييييييييرة لازم تهدي عشان ماتلبسهاش امبارح بئا لقيتهم قافلين الصب واي وفي مكنة بتاعت الاسفلت دي- قولت الحمدلله هيردموا الحفرة بس لاقيتهم بيعملوا مطبين على الصب واي وسايبين الحفرة من غير ماتتردم .اعمل ايه بئا
اجيب كاوتشات واحرقها واسد الطريق واطالب بهدم المطبات دي.
ولا ااجرلي 2 فواعلية بالفاسات وانزل الساعة 2 بالليل اهد المطبات " اهدها مش اكسرها "دي وبالمرة المتاريس اللي في حلوان
كل ده وامبارح في 90 دقيقة جايبين واحد بيقول ان 75% من الحوادث اخطاء بشرية وال25% الباقيين متقسمين على العربية وعلى الطريق يعني الطريق سببه 12.5% من الحوادث
معلش رغيت كتير بس مش قادر اكتم في نفسي اكتر من كده:I_angr1[1]: