الموضوع: عايز أركن قصاد بيتي

المشاركة الأصلية كتبت بواسطة hamedo0

قولت ليه وانا اخرج من باب البيت ازاى يقولي للف من حولين العربيه في الاخر خد العربيه ومشي وهو بيبص ليا بقرف والله كان نفسي اعلقه علي باب البيت بس ده مش اسلوبي

متزعلش بس دية انانية غير طبيعية من حضرتك, هو اية الي هيحصل لحضرتك لما تلف حوالين العربية!!!!!!!!!!!!
بالنسبة لركن عربيتك تحت البيت هو حضرتك الوحيد في البيت الي عندة عربية و لا اية!!!!!!!!! و لا معاك عقد ملكية للشارع امام بيتك.
معتقدش ان حضرتك عندك عقد ملكية او ايجار او حتي حق انتفاع.

لاو انت مالك العقار حدود ملكيتك تنتهي عند سور العمارة مش الشارع ولا حتي الرصيف.
لاو انت مالك او مؤجر للشقة حدود ملكيتك باب شقتك ,السلم ملكية مشتركة للعقار و الرصيف و الشارع دول ملكية عامة و اي حد بيعمل غير كدة بيغتصب حقنا كلنا.

ازاي بنتكلم في ابسط مباداء للرقي؟؟؟؟؟؟؟؟؟؟؟؟؟؟؟؟. الشارع بتاعنا كلنا مفيش حد علي راسة ريشة.

المكان اللى حضرتك بتعتبره مكانك او مكان سكان العمارة - ده مش صحيح لانك ملكية عامة - اى ان هذه المساحة من الارض زيها زى اى مساحة اخرى امامها او وراها لا تمييز بينهما لمن يرغب فى الركن
لكن



لو عايز تحجز حقك فى الركن فى مكان معين ففى هذه الحالة احب انقل لك تجربة سكان المعادى فى هذا الموضوع و هو انهم بيرحوا يسددوا فى المحافظة رسم سنوى برقم مسلسل خاص و بيبقى المكان ده خاص بكل شخص و بيكتب عليه مكان خاص و يكتب بجوارها رقم القسيمة و التاريخ - و ده انا شفته بعينى فى شوارع المعادى مثل 254 و ما حولها

و فى هذه الحالة فقط يعتبر هذا المكان خاص و لا يمكن لاى شخص الركن فيه

عزيزى humhum
ردا على ما كتبته التالى :-
هل ينفع حضرتك تركن قصاد بيت مسئول كبير ؟ ولا حتي نص نص ؟؟؟ أنا اقولك لأ وألف لأ ، لأن انا جاري مستشار متقاعد ، واخر واحد فكر انه يركن قصاده 5 دقايق رجع لقى العربيه مدشدشه وبيجرها الونش !!!!
واهو راجل مستشار ومحترم وفاهم في القانون ، بس قادر على حماية حقوقه
أرجو أن تتفرج على تصرفات هذا المستشار عندما تزول عنه سلطته و تأمل رد فعل الجيران تجاهه عندما يعلمون بزوال سلطته
نفس الموقف حدث فى المنطقة التى أسكن بها مع لواء شرطة عندما كان فى الخدمة و كان يحرس عمارته بعض مجندى الشرطة و يمنعوا أى سيارة من الركن أمام المنزل -الموقف الآن بعد أن تقاعد ذلك اللواء أصبحت سيارته مجال إنتقام لكل من أساء إليه عساكر الأمن المركزى التابعين لذلك اللواء فيما سبق .

المشاركة الأصلية كتبت بواسطة humhum

انا بروح من شغلي 12 ليلا
وساعات 2 صباحاً
وصدقاً مبلاقيش اي مكان اركن فيه خالص
تفتكر الحل اني اركن في شارع بعيد عن بيتي وانا ونصيبي العربيه تتسرق او تتخبط او يحصلها اي حاجه ، وحصلت قبل كده

ولا استعمل الطريقه اللي حضرتك بتعتبر انها بلطجه واخذ حق مش بتاعي !!! واللي تقريبا نص سكان المحروسه بيلجأوا ليها لأن الناس مبقاش عندها احساس ببعض

ممكن اعرف حضرتك بتلاقي مكان تركن قصاد بيتك ؟ على فكره ، لو حضرتك ساكن في التجمع الخامس مثلا يبقى صعب تحس باللي انا بتكلم فيه

عزيزى humhum
و هل ركن سيارتك أمام منزلك فى الشارع يحميها من السرقة أو الخبط قطعا ليس شرطا أن تحمى سيارتك بأن تركنها أمام منزلك .
بعد أن زاد عدد السيارات فى شوارع القاهرة أصبح من رابع المستحيلات أن تجد مكان لركن سيارتك أمام منزلك أو مقر عملك . فى الثمانينات و التسعينات كان مكان عملى فى وسط البلد فى جاردن سيتى و كان من رابع المستحيلات أن أجد مكان لركن السيارة بالقرب من العمل و كنت أركن السيارة فى الصباح إذا وصلت للعمل بعد الثامنة و النصف صباحا فى الجزيرة أمام فندق البرج و المنطقة المحيطة و أسير على قدمى حتى جاردن سيتى (مكان عملى) و أحيانا كانت تحدث مشكلة فى العمل ليلا و أتلقى تليفون بضرورة الحضور للعمل بعد منتصف الليل لحلها و كنت أذهب للعمل و اعود أحيانا فى الرابعة أو الخامسة صباحا و بالطبع لا أجد مكان لركن السيارة أمام منزلى فى مصر الجديدة و كنت أركن السيارة فى أى مكان و أى شارع موازى أو متقاطع مع الشارع الذى أسكن فيه - المشكلة ليست جديدة ، المشكلة موجودة منذ ما يزيد على 25 سنة و نتعايش معها بدون حساسيات .
الموقف الغريب الذى حدث معى الصبف الماضى أننى كنت راكن أمام محل الميكانيكى منتظرا لدورى فى إصلاح السيارة و أتى ساكن فى المنطقة و طلب منى ترك المكان لأنه أمام منزله -فطلبت منه بكل أدب الركن فى أى مكان متاح و إعطائى رقم الموبايل الخاص به لمحادثته بعد إنتهاء إصلاح سيارتى لكى يركن مكانى -و الواقع أن الرجل كان محترما جدا و وافق على الإقتراح و فعلا حدثته فى الموبايل بعد إنتهاء الإصلاح و أتى للركن مكانى و بدون حساسيات و عصبية .