الموضوع: عايز أركن قصاد بيتي

السلام عليكم ورحمة الله وبركاته

الأخوة الأفاضل اللى شايفين إن حق الإنسان فى ركن سيارته تحت بيته هو حق أصيل، ممكن أعرف جابوا القاعدة دى منين؟و رتبوا هذا الحق على أى أساس؟
مفيش حاجة اسمها المكان بتاعك طالما لم تشتر هذا المكان. حتى لو اجتمع سكان الشارع كله وتعارفوا على مكان لركن كل واحد فيهم، برضه ما اسمهوش مكانك (إلا بأه لو الشارع ده أعلن استقلاله باعتباره دولة ذات سيادة على أرضها تقدر تمنع اى حد إنه يدخلها).

الحق اللى أنا أفهمه هو حقك فى أن تركن سيارتك فى مكان آمن. والصفة دى مش بالضرورة تتوافر تحت بيت حضرتك ومعظمنا عربيته اتخبطت وهى راكنة تحت البيت (من شهر تقريبا العربية مركونة جنب الرصيف تماما والشارع عرضه 20 متر وفى منطقة أصلا مش زحمة وواحدة ست بنت حلال دخلت فى الجنب قطعت الإكصدام وعوجت الرفرف وكسرت وش الفانوس، والمفاجأة إنها ماوقفتش وابن البواب طلع يجرى وراها ما جبهاش)

كمان الحق الذى لاخلاف عليه أن الشارع ملكية عامة من حق كل الناس استخدامه بما لا يضر ببعضهم البعض ولا يحرم أحد آخر من استخدامه، وبالتالى ليس من حق أحد أن يمنع أحد من ركن سيارته فى أى مكان مالم يترتب على ذلك إيذاء أو تعطيل مصلحة، وهنا بقى دور العرف اللى تعارف عليه الناس فى تحديد هذه المصلحة.

وطالما الحكومة لم تلزم نفسها بتوفير أماكن انتظار للسيارات التى تسمح بترخيصها يبقى وجب على الشعب إنه يتصرف وفقا للأعراف السائدة مع تصويب الخطأ منها.

يعنى لما انت (أى حد فينا من غير تخصيص لحد بنفسه) تمنع غيرك إنه يركن قصادك وكل الناس تعمل زيك يبقى عمرك ماهتروح تزور أى حد ولا تروح لدكتور ولا محامى ولا محل موجود فى الشارع والدنيا تخرب بأه.

طيب نعمل إيه يعنى نرمى عربياتنا فى آخر الدنيا وناس غيرنا راكنين تحت البيت. يا سيدى اللى راكن تحت البيت مش هيفضل راكن للأبد، غايته ساعتين تلاتة (لو فى زيارة مثلا) وهيطلع. سهل قوى تتفق مع بواب عمارتك إنه لما مكان يفضى أمام العمارة يبلغك بالانتركوم تقوم تنزل تجيب العربية أمام العمارة.

الحياة سهلة قوى ياجماعة وأقصر من إنك تجند نفسك علشان تدافع عن مكان انتظار سيارتك وتتخانق أو تزعق لواحد راكن أمام بيتك، ومع احترامى الكامل ماحدش هيقدر يزعق لو العربية اللى راكنة دى مكتوب عليها شرطة مثلا أو مجلس شعب (إلا طبعا اللى شغالين فى أمن الدولة أو الهيئة القضائية)، يبقى مفيش داعى بأه للأستأساد على الناس الغلابة.

هدانا الله جميعا لما يحبه ويرضاه

بمناسبة الاستئساد ع الشرطه ومجلس الشعب
انا يا سيدي لا عضو هيئة قضائيه ولا عضو مجلس شعب ، وواسطتي كبيره قوي قوي ، واكبر من اي واسطه ، واسطتي ربنا
من حوالي سنه
لقيت حضرة الظابط المحترم ، جايب عربيه بيك اب وراكنها قصاد البيت ، وحد جايبله كرسي وقاعد بيه على رصيف بيتي
ويظهر ان صاحب كافتيريا ح يجيب للبيه شاي أو حاجه زي كده
وطبعا حضرات الساده المخبرين محيطين بمعالي الباشا والعساكر والذي منه
الظاهر فيه مأموريه أو شيء انا مش فاهمه ومش عايز افهمه
المنظر مستفز جدا
فتحت عليهم صوتي ، مش ح اقولك اني مبخافش والكلام ده ، بس انا مؤمن بأن الحق قوي
وكلمته بخشونه شديده جداً ، وقصاد مرؤوسيه ، ان المنظر ده غلط ، وكده عيب ، والبيوت ليها حرمتها
وما كان من الباشا صاحب الدبابير الكثيره ، الا انه لم عساكره ومخبرينه ، ومشي من المكان في الحال
وبالمناسبه
لو مكانش مشي كنت ح اطلب له النجده بس هو الراجل طلع محترم ، وانا بحترم جدا اللي ميصرش على الخطأ ، وبعترف اني كنت خشن جدا في الكلام ، وانه كان ذوق اكتر منى
بس الموضوع مش فكرة شرطه ولا جيش ولا نفوذ
المسأله مسأله حق
لا انا ولا انت اشترينا الشارع ، بس من حقك الأولويه في الشارع اللي انت ساكن فيه ، الأولويه في حاجات كتير ، يمكن يكون اخرها الركن
سؤال
لو لقيت تجمع شباب كتير على الرصيف بتاع بيتكم ، وقصاد مدخل بيتك ، هل تفضل ساكت ؟؟؟ ولا ح تطلب منهم يراعوا حرمة البيت ؟؟
هو الرصيف ده ملكك ؟؟؟
ح تقولي ح اكلمهم بذوق !! طبعا الذوق مطلوب ، طيب لو قالولك " لأ يا فندم احنا متمسكين بحقنا الشرعي والقانوني والبتنجاني في استغلال الرصيف الذي هو ملك للشعب ، ولقد ولدتنا امهاتنا احراراً ولن نستعبد بعد اليوم !!! " يا ترى ح يكون ردك ايه ؟

انا مبقولش نكسر عربيات الغير لما يركنوا مكاننا
بس بقول يا ريت نحافظ على بعض اكتر من كده
ولما نكون ضيوف على حد ، نبقى ذوق ودمنا خفيف
ونحب لغيرنا ما نحبه لنفسنا

المشاركة الأصلية كتبت بواسطة humhum

سؤال
لو لقيت تجمع شباب كتير على الرصيف بتاع بيتكم ، وقصاد مدخل بيتك ، هل تفضل ساكت ؟؟؟ ولا ح تطلب منهم يراعوا حرمة البيت ؟؟
هو الرصيف ده ملكك ؟؟؟
ح تقولي ح اكلمهم بذوق !! طبعا الذوق مطلوب ، طيب لو قالولك " لأ يا فندم احنا متمسكين بحقنا الشرعي والقانوني والبتنجاني في استغلال الرصيف الذي هو ملك للشعب ، ولقد ولدتنا امهاتنا احراراً ولن نستعبد بعد اليوم !!! " يا ترى ح يكون ردك ايه ؟

رغم إن فعلا الرصيف مش ملكى لكن وقفتهم أمام بيتى فيها ضرر لأهل البيت، وبالتالى باروح أقولهم يا شباب بلاش الوقفة دى لو سمحتم (لسه الموقف ده بالتحديد حادث ليلة السبت الماضى) والحمد لله خدوا بعضهم بالمعروف ومشيوا، أما لا قدر الله لو كانوا طولوا فى الكلام كنت هاعمل نفسى باكلم النجدة أقولهم فيه ناس بيتهجموا على البيت أو بيتخانقوا ، المهم أى حركة تمشيهم من سكات. (وربنا يكفينا شر الشباب اللى ما يختشيش)

المشاركة الأصلية كتبت بواسطة humhum

يا جماعه بلاش تطاول
وبلاش تخلو سخونة الحوار تتحول إلى هجوم شخصي على البعض
احنا بنعرض وجهات نظرنا فقط
وصدقوني ، بحر الإهانات كبير وغويط قوي ، ولو دخلنا فيه هات اللي يطلعنا

ارجع للعزيز smax
صعب قوي تقارن الثأر (بالمناسبه هي الثأر أو التار بالعاميه مش الطار .. طار في الهوا شاشي:) ) بموضوع الركن
ورغم ذلك
فقضية الثأر دي ليها جذور تستند عليها في مسألة القصاص ، وان القاتل يقتل ، ولكن لأن القانون الوضعي بيحكم بالسجن أحياناً على القاتل ، فده اللي خلق مبدأ الثأر ، والانتقام عند عائلات الصعيد المحافظه
وبغض النظر اذا كنا ح نتفق او نختلف على قضية الانتقام ، لأن دي مسألة ترجع لفروقات ثقافيه وشخصيه ، يعني ممكن واحد فينا لو حد اعتدي على فرد من اهله يلجأ للبوليس ، وواحد تاني يلجأ لدراعه ، بس ده مينفيش ان في الحالتين في اعتداء وفيه حق !
وبغض النظر - تاني - عن رأينا في المسأله
تبقى المجالس العرفيه هي المرجعية الأولى لفض المنازعات في صعيد مصر وحدودها الغربيه وفي سيناء الحبيبه كذلك
واسأل في ذلك كبار ضباط الشرطه
ح يقولولك ان القانون المصري هناك يأتي في المرتبه الثانيه بعد المجالس العرفيه !!!
وده يؤكد صحة كلامي
بأن العرف ، يأخذ قوة القانون على أرض الواقع

الاخ الغالي humhum
يا باشا انا بقارن اعراف و عادات خاطئة ببعض و عارف انها اعراف اقوي من القانون في نظر فاعلها و دة تأكيدا لحضرتك ان الاعراف الي اقوي من القانون مش درورى تكون صح و عدم وجود القانون او عدم الاعتراف بية بيخلينا عيشين في غابة.
الاعراف الخاطئة الي شايفنها كل يوم هي الي مخليا الناس مش عارفة الصح من الغلط. دية انفلونزا الدكاكين و الاكشاك و اديها تطورت لانفلونزا السكان.
و بالنسبة لموضوع طار في الهواء شاشي ,و انت متدراشي ان دية بالعامية:)

واضح ان المشكلة كبيرة أوي و فيه ناس مؤيديين بنسبه كبيرة و ناس معارضين بنسبة كبيرة بس لازم نرجع نحلل المشكلة من أولها.
معظم الناس اللي بتشتكي من موضوع الركن ده هما اللي ساكنيين قريب من مراكز تجارية و مصالح حكومية و ده من وجهة نظري حقه بشده يعترض على شغل المكان قدام بيته لأن دي غلطة المركز أو المؤسسة أو أي شئ مقام في المكان ده من غير مايكون موفر جراج للركن و محدش يقدر يلومه لأن ده شكل من أشكال الإزعاج.
طبعا في مراكز موفرة جراجات بس طبعا عشان الباشا صاحب العربية يوفر الكام جنيه بتوع الباركينج ييجي يركن قدام بيتك و يقرفك في عشتك و أنت راجع من الشغل و قرفان و جعان و نفسك تترمي على السرير مش تمشي تلف في الشوارع على مكان ركنة......... و ده طبعا أنا أييد حقه في حجز مكانه لأنه الأولى بيه و دي مش غلطته ... لما الناس يقاطعوا المكان ده عشان الركنة يبقوا صحابه اللي عملوه من غير جراج يندموا و يتعلموا يقدروا أهالي المنطقة اللي عملوا فيها المشروع قبل ما يعملوه.

طبعا بالنسبة للمناطق التانية الهادية الموضوع ممكن يبقى ودي يعني مش لازم تتطلع الراجل من قدام البيت لأنه أكيد جاي يزور حد أو مستني حد , دور على مكان تاني تركن فيه و بعدين أبقى انزل بليل قرب العربية قدام البيت و أركن , و طبعا غالبا كل واحد بتلاقيه راكن قدام بيته ...أنا ده اللي بعمله مبكلموش خالص و لو كلمته بكلمه بكل أدب و أنا ببتسم عشان ميبقاش شكلك أنك بتطرده و لو قللي أنا ماشي أو كده بعد معمل الحاجة الفلانية بستأذن منه يرنلي الجرس و هو ماشي عشان أنزل أجيب العربية مطرحه لكن عمري مجبره أنه يمشي لأنه ساعتها مش من حقي و مش من الذوق كمان طبعا لو في مكان تاني قدامه يركن فيه هتلاقيه أحرج لوحده و راح ركن فيه عشان يفضيلك مكان..
طبعا موضوع البلطجة و أني أكسر عربية حد أو المشاجرة معاه و كرشه شئ غير مقبول على الإطلاق

المشاركة الأصلية كتبت بواسطة humhum

انا مبقولش نكسر عربيات الغير لما يركنوا مكاننا
بس بقول يا ريت نحافظ على بعض اكتر من كده
ولما نكون ضيوف على حد ، نبقى ذوق ودمنا خفيف
ونحب لغيرنا ما نحبه لنفسنا

هوه آه أي حد يركن في أي حتة
بس لو أنا طالعة بيتي وعايزة أركن ... اللي مستني في عربيته مايوسعليش ليه ؟!
خاصة لو الواحد معاه حاجات تقيلة أو عيال قرود ومحتاج يركن قصاد البيت !