الموضوع: يتحب مصر

المشاركة الأصلية كتبت بواسطة rafysamy

كلام جميل مفيش اوقع من كده

انا عن نفسي بحب مصر جداً واكتر حاجة فيها نسها الطيبين... (اللي سافر يقدر بره يقدر يعرف الفرق )

سيبكم من الحكومة لان الحكومة مش مصر (ربنا يستر على اللي حيحصلي بعد السطر ده)

مصر فيها حاجات حلوة كتير
انا بتكلم على مصر الوطن - مصر البيت الكبير بتاعنا كلنا.

ساعات وانا بتمشى على البحر في اسكندرية ساعة المغربية بحس بدفئ يملاني وامان من حوليا..

سفرت بره في اكبر واجمل دول العالم - ملقتش نفسي... محستش بالاحساس اللي حسيته وانا داخل المطار وراجع مصر

لما بسافر القاهرة - الاسماعيلية - السويس - بورسعيد - الغردقة - شرم الشيخ - مرسى مطروح - سوهاج - المنيا - مش بحس بفرق بحس اني لسة في بيتي
بلاقي ناس كلها كرم... كلها شهامة ومجدعة
لو وقعت بتلاقي اللي يمدلك ايده ويساعدك ( صدقوني الكلام ده مش موجود بره)

في حاجات كتير
بس مش عاوز اطول - سعدوني يا شباب

المشكلة ان ضغوط و "حرقة" دم تفاصيل الحياة اليومية هى اللى بتخلينا ننسى الكويس اللى فينا و اللى فى الناس.... وبتخلى صفات زى الشهامة و الكرم و غيرها من الصفات الحلوة التى ميزت الشخصية المصرية عبر تاريخها، بتخلى الصفات دى تتآكل و تضمحل....... و بدل ما الناس كانت بتسيب لبعضها كراسى المترو، اصبحت بتتخانق على حتى رغيف العيش...... اوعلى مستوى اخر الناس بتتخانق على ركنة سيارة، زى ما بالصدفة اخ لينا فى المنتدى ما عامل موضوع النهارده........
لكن يظل الامل موجودا ان شاء الله...... لو بطلنا نحلم نموت..... من الاكتئاب و العياذ بالله

بحبها طبعا دي حاجة مفيهاش في فصال...بس يمكن عشان ظروف الواحد تسمحله انه يعيش فيها بشكل ادمي..لكن في النفس الوقت فاهم كويس قوى ان فيه ناس ممكن تكون بتكرهها ويكون معاها حق ...ناس حقها بيضيع عشان معندهاش واسطة ...وشباب زي الورد مش لاقى غير بالكتير اكله وشربه ومش شايف امل في بكرة...مينفعش دول نتوقع منهم انههم يحبوا البلد اتوماتيك...فكرة الوطن والغربة مهياش "ديفولت" في البني أدمين زي ما الناس يتعتقد أحيانا..

مرة كنت قاعد مع شباب من قرية في الفيوم أسمها تطون مشهورة بأنها أعلى قرية في مصر شبابها بيعملوا هجرة غير شرعية بالمراكب لإيطاليا..فيهم ناس اتقبض عليهم مرة وسط البحر واترحلوا مصر... وكرروها مرة تاني وقبطان المركب رماهم بنفسه في البحر لما حس ان خفر السواحل الإيطاليين كشفوا المركب بتاعته...والحمد لله تم انقاذهم ورجعو مصر للمرة التانية ولسة برضه عاوزين يهاجروا...قلتلهم عليكوا بإيه ده كله...انتو كدة بتموتو نفسكم...قالولي ما احنا كده كده ميتين في بلدنا...يبقى نموت واحنا بنحاول نعيش أحسن ما نموت محنطين في بلدنا..الكلام ده أنا سمهتم من ناس كتير...كلام ممكن ميعجبش حد لكن متقدرش متتعاطفش معاه...

الفقر في الوطن غربة...والغنى في الغربة وطن.... (على بن أبي طالب)