##تنبيه هام قبل الذهاب لسوق السيارات بالحي العاشر##
السلام عليكم
أنا ساكن جنب سوق السيارات ياجماعة ولي معه تجارب عديدة
إسمحوا لي أن أوضح لكم الوضع العام لسوق السيارات بالحي العاشر
أولا:- التجار الراغبون بالشراء يقفون بالشارع اللي قبل السوق بمحطة عند يو ترن جامع السلام وينتشروا حتي السوق بطول الشارع علي الجنبين
ويتصيدوا السيارات المارة جميعها سواء عاوز يبيع أم مجرد معدي صدفة ويصل الأمر إلا أن التجارة بيتخانقو علي السيارة الكويسة ويضربوا بعض أمام البائع وأحيانا بيركبوا بالعافية في السيارة ويضعوا 10000 جنيه عربون في التابلوه (زغللة لعين الزبون) قبل الكلام في أي حاجة علشان ما يدلوش فرصة يفكر وده حصل معايا شخصيا أكثر من مرة
ثانيا:- من ينجو من التجار خلال هذه المرحلة لا يسلم منهم أمام السوق وقبل البوابات وطبعا يريدون الوصول إلي أن صاحب السيارة لازم يوافق علي السعر اللي بيفرضوه علي المالك علشان يتنازلوا وياخدوها منه عشان يعرفوا ياكلوا لقمة عيش .......مساكين
ولو طالوا يقلعوا الواحد هدومه ما يتأخروش...
ثالثا:- واللي يدخل بقي جوة السوق يجد التجار الللي بيبيعوا ومتجمعين مع بعض في الأماكن المميزة (أول ما يقابل الباحثين عن سيارة من الغلابة اللي زيينا عند دخول السوق) وراكنين عربياتهم وبينهم فراغات كبيرة وفي الممرات بحيث محدش يعرف يركن جنبهم ويفرشوا جنب العربيات ويطلعوا الجوزة والشاي وشغالين ..... غلابة
رابعا: نسبة كبيرة جدا من العربيات اللي هي راشة وشبعانة سمكرة هي الغالبية اللي راكنة جوة السوق وتقريبا هي هي كل جمعة ما بتتغيرش والتجار الكبار بيسرحوا صبيانهم علي كل عربية ويحددوا لهم السعر الأدني اللي ما ينزلوش عليه وكله بتوكيلات
لذلك اللي بيدخل السوق علشان يشتري بيلاقي فرص الشراء ضعيفة جدا جدا جدا لأن اللي بيكون هناك اللي مش لاقي زباين أو طالب سعر عالي جدا ومحدش حيشتري منه او الحالات اللي سيئة للغاية وصاحبها عاوز يبيع بأي سعر
لذلك بعد تجارب عديدة أحسن شيء أقترحه هو شراء السيارات عن طريق الإعلانات بالجرائد والوسيط والنت لأن نسبة كبيرة منهم بتكون عربيات ملاك عاديين مش تجار وبيكون السعر قابل للتفاهم بحيث يكون متناسب مع حالة العربية وطبعا فيه نسبة تجار بس الغالبية عاديين وبيكون فيها عربيات نضيفة جدا وكسر زيرو كمان
وأنا شخصيا عملت كده ومعلن عن سيارتي اللانسر فالوسيط الجاي
مشكورين وأعتذر إن كنت أطلت وأرجو أن أكون قد أفدت
