ماتش جبار مالوش حل بين تشلسي وبرشلونة ينتهي بالتعادل 1-1 ليصعد برشلونة إلى النهائي..المدهش إن لما جول برشلونة جه..سمعت هيصة ما بسمعهاش إلا في متشات الأهلى ومنتخب مصر....هي مصر بتشجع برشلونة؟؟؟؟
عرض للطباعة
ماتش جبار مالوش حل بين تشلسي وبرشلونة ينتهي بالتعادل 1-1 ليصعد برشلونة إلى النهائي..المدهش إن لما جول برشلونة جه..سمعت هيصة ما بسمعهاش إلا في متشات الأهلى ومنتخب مصر....هي مصر بتشجع برشلونة؟؟؟؟
فريق برشلونة فريق بيلعب بشكل جمالى وبيضم لعيبة جامدين جدا (الساحر ميسى -هنرى -ايتو-اكسافى) بتجبر اى حد مهما كان انتماؤة انة يحب وينبهر بالبارثا او البلوجرانا انا نقسى من مشجعى مانشستير لكنى اصبحت من اكبر معجبى البارثا واداؤة وطريقة لعبة ....
بس طبعا فى النهائى انسى مش حشجع غير ال Red Devilz وبس :rolleyes2: :wink: :rolleyes2:
انا شخصيا معرفش حد مش بيشجع برشا
اعرف ناس بيحبوهم اكتر من الاهلي و الزمالك
و زي ما قال استاذ محمد
لعيبة جامدين جدا و لعبهم ممتع
الشعب المصري بيشجع برشلونه واحنا معاهم
ان شاء الله هنكسب البطوله
اقتباس:
المدهش إن لما جول برشلونة جه..سمعت هيصة ما بسمعهاش إلا في متشات الأهلى ومنتخب مصر
والله نفس الي حصل بالظبط
انا قلت هي مصر هي الي بتلعب ولا اية
انا كمان سمعت هيصه جااامده لدرجة فعلا قولت هو المنتخب بيلعب و لا ايه :)
انا كنت بشجع تشيلسي للاسف خسروا فى اخر دقيقة .
بس مادام البارسا امام المان ..
فانا بارساوى مع انى بحب المان جدا جدا . ولكن كفاية فوز بالبطولات لحد كده .
مصر بتشجع الفريق القوى او اللى بيكسب عالطول زى من كام سنه كده ايام ما كان ريال المدريد شادد حيله وكان فيه نجوم العالم كنت تسال اى حد بتشجع ايه هيقولك بشجع ريال المدريد دلوقتى بقى كله بيشجع برشلونه مع الهيصه يعنى
انا بصراحة بحب اتفرج على الماتشات دى عشان الأداء العالى جدا وبشجع جدا الماتشات الدراماتيكية زى ليفربول وتشيلى والماتش ده
فى اخر ثانية بيقلبوا الترابيزة
على فكرة الهيصة دى ده سببها ان الإثارة عند الناس اللى بتتفرج على البارسا وهو بيقلبها على البلوز ولو العكس كان حصل نفس الهيصة
لا انا مش بحب برشلونة انا بشجع ريال مدريد ومانشيستر يونايتيد وبكره جدا برشلونة بالرغم من كمية اللاعبين الي فيها
وامبارح زعلت جدا علي تشيلسي انها خسرت في اخر دقيقة
بس كده البطولة باذن الله للمان وبس علشان مستوي برشلونة مش من مستوي مانشيستر خالص
الحقيقة المان عندهم حلول أكتر من البارسا بس البطولة للبارسا
انا في البطولة دي بشجع تلات فرق طلع منهم واحد (ليفربول) و ناقص بارشا و المان في الفاينال فا انا مبسوط جداَ
انا كنت بتفرج عالماتش في قهوة في المهندسين و كل الناس كانت مفقوعة من شيلسي عشان عمال يدافع يدافع و فجأة لقيت مشجعين تشيلسي بيهيصوا في هجمات برشلونة .. انا عامة بكره لعب شيلسي جداَ و كنت هفرقع و هو كسبان بس إنيستا كان له رأيه الخاص .
اول ما الجون جه يا جماعة عينكوا ما تشوف إلا النور الكراسي طارت في القهوة و الناس قعدت تتنطط ولا كأن مصر كسبت كاس العالم و انا الصراحة نطيت برضه في الجون لأن مكنتش مصدق و كان نفسي برشلونة يكسب لأنه يستحق و أعتقد الناس شجعته عشان متعاطفة مع مجهوده .. و كمان ناس كتير إنضمت لمعسكر برشلونة بعد الكلاسيكو التاريخي 6-2 .
و علي رأي المعلق بتاع الماتش .. موش مومكن موش مومكن ! فعلها إنييييستا !
الجول اللى جابه انييستا .. نسخة من هدف ابو تريكة فى مباراة الصفاقس بالظبط ..
بس انا كنت عايز تشيلسي يكسب علشان ياخدوا بطارهم من المان ..
و كان لازم يدافعوا لان مستواهم الحالى اقل من البارسا بكتيرررر .. فعملوا زى فرق شمال افريقيا لما بتجيب جول ..
بس ان شاء الله السنة الجاية اليوفى مش هيتنازل ابدا عن البطولة ..
انا بحب اليوفى لدرجة انى كنت هبكى لما خسروا .. يلا خيرها فى غيرها و البطولة دى للبارسا ده لو مارحتش منهم ..
الشعب المصرى عادة بيشجع الاندية الاسبانية و لا يشجع الاندية الانجليزية
أيوة برشلونة بعد الاهلي في الترتيب عند المصريين ..
كنت مع ابن خالتي يوم التلات و صوته مبحوح خالص بقوله فيه إيه اتاريه اتفرج على ماتش الريال و البارسا و اتحمس شوية في بداية الاسبوع..اتصلت بيه امبارح صوته مش طالع اصلا بعد ما البقية الباقية من احباله الصوتية استنفذت في التعبير عن فرحته بهدف انيستا امام تشيلسي
أصل برضه جون مش قليل يا جماعة .. جون في الدقيقة 93 يعني و كل الناس متأكدة إن شيلسي في النهائي و كمان بعشر لاعبين بس