بعد التحية لى سؤال
رجاء التكرم بأؤسال أى معلومات عن اللوجان Mcv حيث أننى معجب بهذة السيارة
وأرغب فى شرائها لكنى لا أرها فى البلد أو مش منتشرة يا ترى أية السبب
عرض للطباعة
بعد التحية لى سؤال
رجاء التكرم بأؤسال أى معلومات عن اللوجان Mcv حيث أننى معجب بهذة السيارة
وأرغب فى شرائها لكنى لا أرها فى البلد أو مش منتشرة يا ترى أية السبب
تعالى شوفها فى اكتوبر هنا كتير اوى :-)
عربية 7 راكب...بموتور 1600 سى سى ...90 حصان و فيه موديل برضه 1600 سى سى لكن 110 حصان بس الكماليات إللى فيها أقل من العربية إللى موتورها 90 حصان...
هتلاقيها معروضة عند الطارق أو عربيات و يمكن السبع كمان ده طبعا بجانب فروع التوكيل فى المقطم و المعادى و سور نادى الزمالك فى المهندسين و مدينة العبور...
و هى موجودة و ماشية فى البلد و كمان فى واحدة تاكسى اشتهرت بعد ما أحد الأعضاء صورها و رفع الصور على المنتدى...لكن مش منتشرة زى اللانوس مثلا...لإنها جديدة فى السوق و كمان مش كل الناس محتاجة عربية 7 راكب و إسم رينو لا يجذب الناس مثل أسماء أخرى أوسع انتشارا...
الصفحة بتاعت اللوجان MCV من على موقع رينو الرسمى فى مصر
http://renault.com.eg/home_logan_mcv_f2.html
السلام عليكم و رحمة الله و بركاتة
الاخ الفاضل شادي
العبدلله من مالكي اللوجان MCV ال 7 راكب و تحت امر حضرتك في اي استفسارات
الموقع دا www.dacialoganmcv.nl بيحتوي كل البيانات التفصيلية للعربية
و انا مستعد للرد علي استفسارات حضرتك
و حضرتك ممكن تبحث في قسم الرينو علي المشاركات الخاصة باللوجان و هتلاقي فيها كل حاجة عن العربي دي و انا كنت حكيت تجربتي مع شراء العربية دي في احدي المشاركات
حضرتك ممكن تبحث في المشاركات بتاعتي لو تحب
تحت امر حضرتك
السلام عليكم
انا كنت كتبت قبل كدة موضوع عن حيرتى بين الوجان والايفنزا خصوصا انى عايزاها ف شغل
والاخوة هنا تكرموة بالرد
خصوصصا الاخ مصطفى
بس انا لسة مجبتهاش
النهاردة كنت عند اوتو سمير ريان ولقيت سعرها نزا بقى 89 الف من 92 الف وعندهم نفس مواصفات شركة عربية بالاضافات بتاعتها
بس هنا شفت الافانزا الاتوماتيك الجديدة وشفت ال تيروس ال 7 راكب ودى ب 146 الف
كتير بصراحة عليا
وكمان الولد ال هناك قالى ان التيروس والافانزا 1500 c.c بس انكا اللوجان 1600
وقالى انها اشد وفضل يقنعنى بيها
انا كنت هوافق بس قولت لسة لما اروح التوكيل اشوف نظام التقسيط ععندهم
اخ مصطفى انت كنت جايبة قسط من التوكيل؟؟؟كان النظام اية؟
ف سمير ريان قالى تتدفع 45 الف لانى هاجبها بالبطاقة واقسط على 3 سنين 1588 ج
ها ؟اتوكل على الله؟؟وفين الاقى اللون البترولى بتاعها؟؟
شكرا
ازي حضرتك يا استاذ حسام
انا قسطت العربية من التوكيل نفسه ( الشركة المصرية العالمية لاللسيارات EIM )
تقريبا بنفس الفايدة بتاعة شركة سمير ريان اللي حضرتك قايلها
انت لو حسبتها هتلاقي الفائدة السنوية 10% علي المبلغ المتبقي و اللي هو 44000 جنيه و هتلاقيها تعمل فائدة كلية 30% من ال 44000 جنيه يعني حوالي 13.168 جنيه علي 36 شهر ( 3سنوات)
انا نفس النظام دفعت 50% مقدم و كانوا 45000 جنيه و الباقي اللي هو 46000 جنيه لإنهم حسبوهالي ب91000 جنيه وكان سعرها ساعتها 91900 يعني خصم 900 جنيه حتتتتته واحدة:Copy of majd(4):
بس انا قسطها علي 24 شهر مش 36 عشان اخلص من النصب الكبير دا و القسط عامل 2375 جنيه تقريبا
بس الحمدلله ريحت ضميري و بعدت عن البنوك في شراء العربية
حضرتك ممكن تروح الشركة المصرية العالمية للسيارات و تستفسر منهم عن انظمة التقسيط المباشر عندهم لأني كنت شفت اعلانات ليهم عن تقسييط بدون فوايد و كلام من دا يمكن يكون صحيح او علي الأققل بفايدة اقل من سمير ريان خاصة انك هتدفع نص المبلغ
بالنسبة للألوان انا اللي اعرفه ان العربية الللوجان ال 1600 سي سي 110 حصان ما فيش منها غير اللون الفضي فقط حاليا
اما النسخة التانية ال 90 حصان فهي دي اللي منها الوان
بس انا ارشح انك تشتري ال 110 حصان خصوصا و انت عاوزها في شغل يعني عاوز موتور شديد و يتحمل الشقا
و انا تحت امر حضرتك في اي استفسار تاني
و ربنا يوفقك
السلام عليكم استاذ حسام
أيه أخبار قطع الغيار؟ و هل فيه أي مشاكل في الماكينة أو بالذات الكهربا و الكمبيوتر؟ وهل صحيح أن مفيش ميكانيكي خارج التوكيل يفهم فيها؟
صلاح
متشكر جدا جدا جدا على الرد من الأخوة الأعزاء
ونرجو فى القريب العاجل عمل قسم خاص داخل المنتدى لل logan mcv
ولكم ألف تحية
على فكرة النهاردة كنت عند محمد ذكى بس شفتة عندة اللوجان ال 7 راكب بس النبيتى بصراحة اللون وهمى
قالى ان دى برضة هاف اوبشن 1600 بس 90 حصان
فقلتلة لا انا عايزة ال 110 حصان
قالولى كلام غريب زى ان ال 110 حصان دى مكنتش نخصصة لمصر وكانت لليونان وال فائض جى مصر لكن الاصلى كانت ال 90 حصان
وقالى بص على موتور دى وموتور دى هتلاقى الفرق
موتور ال 90 حصان شكلة متقفل كويس وبسيط بحيث ان اى حد ممكن يصلحة
لكن شوف موتور ال 110 شكلة مكشوف والحاجات ال ف النص دى ممكن مع الوقت تسيح غير انوة مش بسيط بحسث تلاقى حد فاهم يتعامل ازاى
غير دى ال 90 بتحطلها بنزين 92 ام ال 110 لازم بنزين 95
غير الالوان مش متوافر منها غير الفضى اما ال 90 فيها الوان
وقالى اهم دليل ان الموتور مش قد كدة الزيادات ال ضيفنها علشان يخلصوة منها وكلها صينى (الاضافات يعنى)وان واحد خد مطب جامد الجنط اتكسر من النص
يعنى حاجات اى كلام
وقالى ان ال 90 قوى وشغال كويس
اية رايكوة بقى انا اتجننت ؟؟؟؟انا عايز اشترى بقى وكل شوية حد يلعب ف دماغى
اية رايكوة؟؟؟؟؟؟؟؟؟؟؟؟؟؟؟؟؟ظ
جزئية لازم بنزين 95 هجص
المعلومة المؤكدة لأي عربية هي من الوكيل فقط مش الموزع مع كامل إحترامي للموزعين
البياع ده كلامه مش مظبوط عشان يبيع وخلاص.......
حاجات أيه اللى ممكن تسيح ؟؟؟
و بعدين ما أحنا معانا زميل هنا معاه ال 110 حصان.....أستنى خد رأيه
و أنا لو من حضرتك بصراحة كنت و أنا واقف مع البياع ده قلتله " طب أستنى لما أكلم التوكيل عشان قالولى غير ده "..............بس و تقف تتفرج على منظره و أنت بتتكلم فى التليفون
هو قالى انهم توكيل لرينو
دة محمد ذكى ال على كورنيش المعادى
المصرية العالمية للسيارات (eim) وكيل رينو الوحيد بمصر
و الرقم 16202
غير كده موزعون
كلام عاري تماما من الصحة و كله تخريف من الناس بتوع المعرض
طبعا هما عاوزين يبيعوا العربيات اللي عندهم اللي هي 90 حصان بعد ما كل الناس بدأت تطلب ال 110 حصان عشان اقوي خصوصا و انها عربية 7 راكب
انا معايا اللوجان ال 110 حصان و ما فيهاش اي حاجة من الكلام دا
موتورها انا شفته راكب علي عربية ميجان بش معرفتش موديل كام بصراحة
بس الموتور بتاعها رينو و كويس جدا
الكلام الوحيد اللي ممكن يكون الناس دول صح هو ان كل الإضافات اللي عاملاها الموزعين زي شركة عربيات في المهندسين عاملة اضافات زي ( حساسات ركن + شاشة دي في دي + جنوط سبور + عوارض تحميل سقفية + كاسيت سي دي بدل من الشرايط العادي + سنتر ريموت + انذار + عتب جانبي + اكسسوار علي الرفارف ) ممكن اصدق ان الحاجات دي صيني و انا شايف ان دا مش عيب و لا حاجة في العربية طالما انهم زيادات و كماليات مش هتأثر علي اداء العربية و اي حد لو فكر يعملهم هيعملهم صيني لأن الصيني هو اللي موجود في السوق و متوفر و سعره معقول
خلاصةالكلام الناس دي مش صادقة و بالبلدي بتوع سوق و بيحلوا سلعتهم مش اكتر
اما العربية فالحمدلله ما فيش منها اي مشاكل خطيرة زي ما اتقال لحضرتك
و نصيحة لو عاوزة تشتريها يبقي خليكي مع التوكيل نفسة او شركة عريبات
و بصراحة انا لو ما كنتش اشتريت كنت رحت اشتريت من شركة عربيات لأنها عاملة شوية اضافات للعربية ملهاش حل مخليه شكل العربية رائع و مختلف تماما و مسمينها النسخة الرياضية
حضرتك ممكت تروحي تشوفيها في شركة عربيات في المهندسين بجوار مسجد الحامدية الشاذلية و البنك التجاري الدولي فرع المهندسين
و تحت امر حضرتك في اي استفسار بخصوص العربية
ده كلامه بياع
انت تعرضت لما يسمى بفتي البياعين
و لو البياع ده كان عنده 110 و مفيش 90 هيقول لك العكس
ده كلام فارع
الاتنين عايزين بنزين 92
مفيش حاجة اسمها حاجات تسيح و تصليحه اصعب
و كوميدي جدا على فكرة موضوع فايض اليونان ده
يا رب اي بياع فتاي كذاب يفتي عشان يخلص بيعه و هو مروح ماشي ياخد عمود نور بالحضن و الدنيا تمطر عليه !!!!
نسيت اقول لك ان الاوتوماتيك بدا حجزها من الوكيل
و هي هاف اوبشن ب 104 و فول اوبشن ب 109 تقريبا
و الاتنين هيكونوا 110 حصان
و الفول اوبشن هيكون ال interior بتاعها انضف و اشيك زي اللوجان او السيمبول السيدان
لو مكانك خليك في الاوتوماتيك
صراحة انا كنت هاحجزها خلاص و في اخر لحظة قررت اجيب الكارينز اوتوماتيك بدالها
ههههههه عشان الكهربا تمسك فيه ما تسيبهوش حتى لو بان له صحاب ههههههههههههه
الصراحة باتفقع جدا
تروح للبياع من دول تقول له عايز العربية X
يقول لك لا يا باشا X دي وحشة جدا و فيها العبر كلها
خليك في Y
و سبحان الله ممكن تروح له كمان شهر
و عشان زي ما قالوا في المثل .... الكذاب نساي
تقول له عايز العربية Y
يقول لك يا باشا X (أو حتى Z) تديها بالجزمة دي عربية زبالة
الناس دي بتجيب لي الضغط و انا باتكلم معاها
مفيش لا قلب و لا ضمير و لا اي حاجة
بيع و خلاص و لبس الزبون
و الموضوع ده بالذات منتشر في المعارض الصغيرة
يقول لك الخليجي برقبة الوكيل (عشان عنده خليجي)
بعد شهر يقول لك مفيش احسن من العربية بضمانها من الوكيل
و كله كوم و اللي يحاول يبيع لك Overpriced و يقنعك ان ده سعر الوكيل
تقول له انا كلمت الوكيل يقول لك كذابين
يخرب بيت ابو البجاحة بجد
زي ما زمان قالوا ....... عايز نوكيا روح لراية
تطبيقا لكده
عايز رينو روح EIM
عايز كيا روح EIT
عايز بيجو روح لاباظة
etc. etc. etc.
الأخوة الأعزاء هو فية logan mcv automatic
جديد والا أية انا أعرف ان مفيش لوجان اتوماتك خالص لا mcv ولا سيدان
والا دى حاجة جديدة هتنزل معرض اتوماك
وشكرا:verygood::verygood::verygood:
Logan MCV Automatic قيد الخحز دلوقتي و التسليم في اغسطس
بس عند الوكيل بس .... سور نادي الزمالك او المقطم .....
مش لازم تستنى اوتوماك
و فى فرع فى المعادى الجديدة فى شارع اللاسلكى عند القمر الصناعى على الناحية التانية من محطة شل و سوبر ماركت مترو