عودة القراصنة !!!

**نور القمر** · 07-05-2009 07:41 PM

القصة دي نقلتها من موقع الي كاتبها قرصان صديق قصدي قبطان صديق
واليكم كلامه بالنص
:

:

:

النهاردة بقى هحكيلكم حكاية جميلة من تأليفى واخراجى لأ وبالعربى كمان
يعنى محدش محتاج أنيس عبيد بتاع ترجمة الافلام الاجنبى بتاعت زمان
المهم بعد ما تقروا الحكاية لازم تقولولى رايكم بصراحة ولاننا كابتن بحرية
زى ما انتو عارفين ( تحية كبيرة للقرصان الكبير هشام بك اللى مطنشنا من زمان )
حكاية النهاردة عن الكراصنة قصدى القراصنة وكفاح أسم الله عليها
الولايات المتحدة البرجوازية الموضع بقى بأختصار عن .... بقول أية متيجوا
نقرى الحكاية .....
عـــــــودة القراصنــــــــــة

أعلنت الولايات المتحدة البرجوازية عن صعوبة السيطرة على الكراصنة ( اللى هما القراصنة ) الصوماليين لأنهم ولاد جنية وقد صرح ناطق عسكرى تخين المستوى ان القراصنة الله يحرقهم فى ليلتهم التركواز ، ولاد جنية من كذا ناحية لأنهم عندهم امكانيات فززززيعة ( اللى هى فظيعة ) بيستخدومها ... خد مثلا القوارب الخشبية السريعة اووى اووى ( واو اتين اووى ) اللى مش موجود زيها فى الولايات المتحدة البرجوازية لأ ومش بس قوارب سريعة لأ كمان عندهم لاسلكى( لأ بتهرجوا ) !!! وأكد سعادة الناطق تخين المستوى انو رغم الصعوبات اللى بتوجها الولايات المتحدة البرجوازية فى السيطرة على القراصنة ولاد الجنية رغم ضعف الامكانيات بتاعت الولايات المتحدة البرجوزية من حاملات طائرات ومدمرات وبوارج بحرية دة غير الاقمار الصناعية اللى عندها يا عينى على الكام وكالة استخبارات زى "السى اى اية " و"دى فى دى" و" الدبليو سى"ومشاة البحرية والبرية ومشاة الطرق العادية الا ان ولاد الجنية مش بيابنو بالليل بالذات لان لونهم اسود دة غير حالة الرعب اللى بيسببو لجنود الولايات المتحدة البرجوازية لان القراصنة ولاد المفترية بيلبسو جلدة على عين واحدة ودة بيسبب حالة من الخوف لجنود البتاعة المتحدة البرجوازية وعشان كدة طالب الناطق تخين المستوى دعم حلف الناتو والدول الاوروبية ومنظمة التجارة العالمية والاتحاد الافرواسيوى ودول عدم الانحياز وبطاريق القطب الشمالى وشركة صيانكو لاصلاح العربات والدكو اللى ورا مصنع السكر اللى فى الحوامدية وانت مدى ضهرك للطريق ... وقال الناطق ان المفروض يدعموا الولايات المتحدة البرجوازية على الاقل بـ 2 مليون عسكرى او حتى 7 مليون عسكرى يدووووب عشان يقدروا يسيطروا على منطقة الكرن ( اللى هى القرن ) الافريقى ويرجعو السلام للمنطكة ( اللى هى برضو المنطقة ) زى ما نجحوا بالتلاتة قبل كدة فى العراق وافغانستان ولبنان كما طلب الناطق تخين المستوى الدول والشعوب العربية بدعم الولايات المتحدة البرجوازية فى حربها العادلة على القراصنة ولاد الجنية وانهم يدعو عليهم ولو ممكن يكنسو عليهم السيدة يبقى خير وبركة .. واهو كلو بثوبوا ... وختم الناطق تخين المستوى تصريحاتة للـ "بى بى من غير سى "ووجة رسالة شديدة اللهجة للكراصنة بعد ما كشف راسة وقال ... ربنا يهدكم يا بعدة يا وحشيييين هنرفع عليكم قضية خلع من المنطكة فى مجلس الامن
فيما رد قرصان بلاد بونت ( اللى هى الصومال ) على تصريحات الناطق التخين بتاع الولايات المتحدة البرجوازية ان اللى مربوهوش ابوة وامة القراصنة تربية .
سلامـــو عليكـــم

**SHNORY** · 07-05-2009 08:12 PM

نفهم من كده ان الاهلي والكفار حيلعبوا مع بعض في الدور النهائي؟

**SHNORY** · 07-05-2009 09:49 PM

المشاركة الأصلية كتبت بواسطة نور القمر

الحركة دي خطر على الصحة اليومين دول
متنساش ان في امراض خطيرة اليومين دول

معلش الجوع كافر

**ASKAFRAWY** · 08-07-2009 05:34 PM

المربهوش ابوه و امه القراصنة يربوه!
انا اول مرة اخد بالى من الموضوع دة بصراحة بس تقريبا كدة الموضوع بعيدا عن الهزار صعب جدا السيطرة عليه و للاس فيه سفن باكملها اتخطفت و تم تغيير اسمها و مةت كامل طاقمها على يد القراصنة..وربنا ستر علينا

**medo55** · 09-07-2009 11:16 PM

مممممممممممم المشكله اصلا مش عند اليمن بس دي كمان بعد ما تعدي اليمن بتتخطف في وسط المحيط

هول الحل دول العالم كلها تبعت سفن حربيه وتعمل طوق حولين الصومال وتمنع اي حد يخرج منها الا بعد التفتيش وبدون سلاح ,, اي نعم الموضوع مكلف لكن لازم يضمنو سلامة المنطقه في مقابل سلامة تجارتهم

شاطرين بس عاملين حظر على كوريا الشماليه ويقولك هنفتش السفن بتاعتها لما تخرج من عندها ,,, ما يتشطرو على بتوع الصومال شوية شباب ما بين 19 و 30 سنه والله اعلم

**النوبي** · 10-07-2009 03:56 PM

انا سمعت ان التونه هتغلي بسبب الموضوع ده الكلام ده صح ولا غلط ياريت التأكيد
لاني مش باكل تونه ونفسي الناس تبطلها ههههههههههههههههههههههههه هه
بس المعلومه بجد ياريت تاكيد