الموضوع: تغيير شكل ونور العداد بالصور(تجربة في فيرنا 2009)

السلام عليكم..
أخيييييرا غيرنا نور وشكل العداد في فيرنا بتاعة صديق لي
غير مكلفة
محتاجة إتقان وقلب جااااااامد
وتقريبا ساعة
دي الصورة النهائية(شبه النهائية لأن لسة هنجيب لمض بس الساعة كانت 3)

ومعلش هارفع باقي الصور مع الشرح بكرة عشان بس مارضيتش أنام قبل ما أقول لكم
السلام عليكم وتصبحوا على خير
------------------

أولا عايز أوضح كام حاجة
أسف على حاجتين..إني ما صورتش خطوات فك العدادات نفسها(ملحوقة ماحنا هنفك تاني إن شاء الله) والحاجة التانية جودة التصوير عشان بعيد عنكم أنا كنت باصور ب windows mobile وطبعا الناس دي ماتعرفش حاجة إسمها كاميرا

نبدأ بسم الله

أولا الأدوات المستخدمة:-
1-عدد 2 قلم فلوماستر ب 6 جنيه
2-موس حلاقة(لورد) ربع جنيه
3-شوية تنر ببريزة ولا حاجة..قول نص جنيه عشان الراجل ميضربكش
4-عدد 4 مفك 1 عادة 2 صليبة وواحد سداسي(دول كانوا عندي)
يبقى التكلفة الإجمالية 7 جنيه إلا ربع..قول 10 عشان جبنا حاجة ساقعة وقهوة لزوم المخمخة!
ثانيا خطوات الفك:-
1-هتلاقي عدد 2 مسمار صليبة في لوحة العدادات من فوق(هبقى أصورهم)بتفكهم ويفضل مفك قصير قزعة عشان الطارة هتدايقك!

2-بعد متفكهم بتطلع الوش بالراحة لبرة من فوق..بعدين بتلاقي عدد 2 كليبس من تحت بتفكهم برضه!

3-بعد ماتطلع الوش دة هتلاقي طقم العدادات متثبت بالباغة بتاعته ب 4 مسامير..هتفكهم هتلاقي الطقم لوحده بيقول لك تحت أمرك يا معلم..وبيطلع بكل سهولة زي السكينة في الحلاوة!

4-هتميل العدادات على وشهم لتحت..هتلاقي عدد 2 سوكيت هتفكهم..هتلاقيهم ماسكين شوية بس دة العادي هيوحشهم التابلوه فحضنينه قوي!

كدة خلصت أول مرحلة داخل السيارة..تروح بقى تقعد في حتة هادية ومعاك الأدوات المذكورة سابقا

هتلاقي الباغة متثبت وراها غطاء أبيض كدة ب 6 مسامير بتفكه
بعدين بتلاقي حوالي 8 كليبسات بتفكهم بتلاقي الباغى طلعت وورقة العدادات قدامك بتقول لك شبيك لبيك..
بتلاقيها متثبتى ب 2 كليبس في الجناب وبتفك المؤشرات وبتطلع معاك كما ولدها المصنع!

وبكدة بقى تكون خلصت عملية الفك ودة الجزء الصعب مع إنه سهل جدا لو مشيت ورا الشرح

هانزل بقى عشان عندي شغل وبالليل إن شاء الله هاشرح إزاي إتعمل الشكل والإضاءة دول
(ملحوظة:لو عندك عربية غير الفيرنا ممكن تفك التابلوه بمعرفتك وتطلع الورقة بعدين تتبع الجزء التاني اللي هاشرحه بالليل إن شاء الله)
السلام عليكم وإلى لقاء ليلا بإذن الله

------------------
بسم الله الرحمن الرحيم

أولا أنا أسف على الـتأخير بس كان في ظروف..بربريز العربية إتكسر والرخصة ضاعت ومخنوق أخر خنقة..قدر الله وما شاء فعل..المهم نكمل موضوعنا عشان إتأخرت عليكم
(ملحوظة..اللي إحنا هنعمله هنا إن شاء الله هو هو بيتعمل في شارع دمشق ب 100 جنيه و في بنزينة وطنية العاشر ب 125 ودة أنا سألت عليه بنفسي النهاردة وكمان بيعملوه لون واحد وبيستخدموا أدواء سيئة عمليا مع إنها مكلفة أكتر إقتصاديا)

نبدأ بسم الله

بعد مانطلع ورقة العداد هتبقى بالشكل دة



طبعا زي ما إحنا شايفين العلامات لونها أبيض عادي جدا
أومال النور الأخضر بييجي منين؟
هاتقول لي من اللمض..هاقول لك لأ
في طبقة من ورا لونها أخضر هي اللي بتدي اللون دة..(للأسف نسيت أصورها)

نعمل إيه بقى؟
في ناس بتفضل تكحتها بموس..بتاخد وقت طويل طبعا غير إن ممكن تقطع الورقة أو تعمل فيها شرخ

هتجيب منديل ورق وتبله تنر..وتمسح المادة الخضراء اللي بالمناسبة نوع من أنواع الستيكر..
هيبدأ يبوش..إمشي عليها شوية بالموس بعدين إمسح بمنديل ورق نضيف هتلاقيها طلعت سهل جداااا!

ودي الصورة بتبين الفرق في اللون مابين جزء معمول بالطريقة دي وجزء لسة فيه اللون الأخضر




طبعا الفرق باين أوي!

كدة إحنا خلصنا مرحلة كبيييييييرة جدااا..وعلى فكرة لو حد عايز العدادات أبيض بس يبقى ستوب لحد هنا ركب وإنتهى الموضوع!

بالنسبة للألوان بقى
إحنا فكرنا نحط ستيكر برضه
بس لقينا إنه أولا مع الوقت ممكن يسيح
أو المادة اللاصقة تخف فيفك
أو مش هيعدي الإضاءة كافية

جبت قلمين فلوماستر واحد أزرق وواحد أحمر
هتشوف العلامات اللي عايزها أحمر وتعملها أحمر..واللي عايزها أزرق تعملها أزرق
بس خلي بالك..إنت بتلون من ورا مش قدام عشان متبوظوش الدنيا!
زي الصورة دي




ودة شكلها من قدام في الإضاءة






طبعا باين الشكل عامل إزاي..
إحنا بعد كدة عملنا حاجات أحمر وحاجات أزرق وإنت وذوقك وإفتح خيالك بقى!
الإحتمالات غير محدودة...ممكن تقسم لونين..3..4..شرطة وشرطة..إحتمالات وأشكال كتير زي ما إنت عايز وعينك ترتاح وتحب

ودة الشكل النهائي بعد ما ركب










ودة شكله وهو مطفي..عااااادي جدا مافيهوش أي لعب أبدا!



لسة كمان في حاجات وأفكار تانية..أول مانعملها هاقول لكم..بس نلاقي نوع اللمض اللي عايزينه..
حد يصدق إن نعمل كل دة في عربية موديل 2009؟مجانيييييين!
بكدة الموضوع إنتهى وأي حد عنده إستفسار يقول بدون أي كسوف

ياريت أكون قدرت أفيدكم وشرحت بشكل وافي
السلام عليكم

___________
تم دمج المشاركات مع المشاركة الاولى ليسهل تتبع الشرح ونشكرك على مجهودك وموضوعك المتميز والحصري...

تم تثبيت الموضوع لفترة...

إدارة المنتدى 2
(إ.م.2)

المشاركة الأصلية كتبت بواسطة BLACKVERNA

ماشاء الله شكلها حلو

بس انت قلبك جامد قوى

و يا ريت الطريقة و التكاليف

مش أنا بس اللي قلبي جامد..لما لقيت صاحبي قلبه جامد بقى قلبي أجمد

المشاركة الأصلية كتبت بواسطة bishoy02010

شكلها حلو :)

شكرا

المشاركة الأصلية كتبت بواسطة meshmesh78

مبرووووك

شكلها كويس

الله يبارك فيك

المشاركة الأصلية كتبت بواسطة sasatony

حبيب قلبي
ياريت تقولي عملتها ازاي لان انا معايا فيرنا وياريت الشرح بالتفصيل

بالتفصيل الممل إن شاء الله

المشاركة الأصلية كتبت بواسطة ehab4367

شديدة
ياريت الطريقة يا مان

حااااضر

المشاركة الأصلية كتبت بواسطة S M A R T M A N

مبروك وفي انتظار بقيه الصور

حالا بإذن الله