الموضوع: الحمد لله استلمت السيراتو اخيرا

كنت قلتلكم قبل كده ان انا حجزت السيراتو السيلفر تايتنيم sx وقالي العربيه موجوده و حستلمها خلال 10 ايام بالكتييييير وده كان اول 4 .........وخلاني ابيع عربيتي علشان اجهز الفلوس
المهم بعد مده اتصلت كان يوم 25\4 قالي اسف بعد شهر لان التوكيل معندوش العربيه......
واذا معجبنيش الوضع اروح اسحب فلوسي ...........
ساعتها قررت اني اشوف معارض تانيه غيره لاني كنت اضايقت منه جدا (ما كان يقولي بعد شهر ولا اتنين بس ميخلينيش ابيع العربيه واتشحطط)
او اشوف عربيه تانيه .وفعلا روحت شوفت المازدا 3 وتقريبا كنت خلاص قفلت من ناحيه التوكيل .........المهم جوزي هداني وقالي انا حكلمه تاني .........كلمه بعدها ب4 ايام بالصدفه فقله ان فيه عربيتين الsx عنده بس اللون فضي فاتح اما السيلفر فامش حييجي الا شهر 7 .قلت امري لله رحت عنده اشوفها لقيت واحده نبيتي واقفه قلتلو طب اخد دي قالي محجوزه.........ومفيش غير الفضي...وكمان قالي الافراج بتاعها كمان 10 ايام( يعني مش حعرف ارخصها)وانا اللي اروح مرور بين السرايات واخلص ورقها وانقله مرور شيراتون
بصراحه اول ما شفتها قفلت من ناحيتها وقررت انه لا مش حخدها(كنت كل يوم بصلي استخاره) واخدت فلوسي ومشيت ...طبعا جوزي كان حيجيلو شلل .......بس انا لاول مره من شهر احس براحه نفسيه..............
واحنا مروحين فيه معرض عربيات قبل البيت بشارع لقيته حاطط واحده لونها بتنجاني
وsx قلت يبقي ده خليجي المهم قلنا نسال.............
طلعت بضمان الوكيل وتسليم فوري والمعرض حيخلصلي كل الورق وافراجها الجمركي موجود
وبزياده 1000 جنيه .......قلت لما افكر........(معجبنيش فكره الاوفر برايس)
يوميها برضه باليل اتصل بيا واحد من عند ياسين (كنت اتصلت علشان احجز معاهم) وقالي انه فيه واحده sx لونها سيلفر تايتنيم وتسليم فوري بس باوفر برايس 3000 جنيه ...(اتصدمت في ياسين ..موزع معتمد ويبيع اوفر برايس ..ده ما طلعش حد بيحترم الناس في البلد دي خالص)
واتصل بيا موزع تاني وقعد يحلفلي انه حيسلمهالي يوم 20/5 بالكتيييير وان في مركب داخله مصر يوم 10\5 (بركات الاستخاره):k49: بس اللي اتلسع من الشوربه
صليت استخاره .........وقررت اني اجيب اللون البتنجاني (مع اني بموت في السيلفر تايتنيم) احلي حاجه انك تشوف العربيه قدامك تدفع فلوسها وتاخدها
والحمد لله استلمتها يوم الاربعاء وحرخصها بكره ان شاء الله
صحيح الواد ابني(5 سنين) لما شافها قالي ياماما حديركب عربيه بتنجانه كنت جيبتيها فلفلايه احسن متبقيش تقولي لصحابك احسن يضحكو عليكي
طولت عليكم معلش بس قلت يمكن حد يستفيد من تجربتي
1- متسمعش كلام حد ومتصدقهوش يقولك شهر اعمل حسابك علي شهرين
جت بدري يبقي خير وبركه
لو تقدر تستنس لما تبقي موجوده عند الكل وانت تنقي براحتك وتفاوض علي السعر يبقي احسن(لولا بيعي لعربيتي لكنت ولا عبرتها الا لما ترطرط في السوق)

اخيرا شكر كبيييير وخاص جدا للمهندس غازي علي مساعدته ليا :k10:
وشكر للاب الروحي للكيا سيراتو استاذ ahmed su::k10: