انا حتى الآن مش مصدق اللي حصل الباب اتفتح والعربيه ماشيه و السنتر الاتوماتيك كان مقفول و الباب مقفول كويس و لمبه الباب اللي في التابلوه ماكانتش منوره ....
انا كنت ماشي على ٨٠ تقريبا و طالع على كوبري الملك الصالح و تقريبا السبب مفصلات الكوبري...!!!!

يا جماعه انا حتجنن و مش عارف اعمل ايه، انالما رحت استلم العربيه من التوكيل بابو رواش لفيت على العربيه كويس قبل ما استلم ولقيت فيها خربوش طويل في سن الاكصدام الخلفي و الموتور ماكانش مغسول تقريبا فقلتلهم انا مش هستلم العربيه بالمنظر ده ، قالولي مفيش عربيه غيرها ( انا كنت حاجز من اول ابريل و استلمت ٢١ ابريل ) و قالوا احنا ممكن نرش الاكصدام ...!!!

عربيه زيرو و حيرشوا الاكصدام

او انهم يكتبوا ان الاكصدام مخدوش في مستند استلام العربيه و ابقى اعمله بعدين ....!!

وبعد مهاترات استلمت العربيه و ده لاني كنت محتاجها جدا في شغلي و كنت بعت عربيتي بقالي اسبوعين و متبهدل خالص مع التاكسي........

وبعد استعمال ٩٥٠ كيلو حتى هذا اليوم حصل معايا الآتي

- العفشه عندي ناشفه جدا و الجنوط عندي 16 مع العلم اني اول ماركبت العربيه حسيت بده ورحت تاني يوم كشفت على الكاوتش لقيته كان معمول على 40 !! تخيييلوا و ظبطه على 32 بقت احسن لكن مازالت العفشه ناشفه.

- صوت الموتور بيعلى كل فتره عن اللي قبلها و بالذات لو كنت مشغل التكييف.

- مقبض الباب بتاع السائق مبيفتحش كويس فيه حاجه غلط ( انا حاسس ان هو ده سبب فتح الباب و العربيه ماشيه بس ما كنتش اتخيل ان ده يحصل ابدااااا).

انا رايح صيانه الالف كيلو بكره ان شاء الله و خايف انفجر فيهم هناك لو حد قابل الشكاوي بتاعتي برعونه او ببرود.....

ادعوا لي يا جماعه