و الله و رجعنا لأيام التاكسي أبو عداد

**OlaOsman** · 10-05-2009 01:43 PM

كنت في مشوار امبارح لمكان معايا عنوانه و وصفته بس، و في الحالة دي عادة مش باخد العربية.. لسه مش متعودة إني آخد العربية و ألف بيها أسأل ع المكان اللي رايحاه، ده غير انه معرفش ظروف الركنة ايه، فقلت أجرب التاكسي الجديد الأبيض أبو عداد.

المشوار اللي كنت رايحاه في الغالب التاكسيات العادية بيطلبوا فيه 20 جنيه مع الرأفة، انما ده بالعداد دفعت فيه 12 جنيه. طبعا فرق 8 جنيه على الأقل و توفير وجع دماغ كمان و فصال مع السواق و أخد ورد مش مستاهله أي مشوار. دلوقتي بأه الراكب يوصل المكان اللي هو عايزه، يبص في العداد و يدفع

لسه مش عارفة هل هو برضه زي التاكسي القديم ممكن السواق يقول لأ للمشاوير اللي هو مش عايز يروحها.. لسه مش عارفة بيعوز تيبس و لا لأ و باتساءل كمان السواق كده بيستفيد ايه طالما في المشاوير اللي زي دي بيتدفع له دلوقتي أقل من زمان لما كان معاه التاكسي الإسود في أبيض؟ حد يعرف؟

**Dr Zezo** · 10-05-2009 01:52 PM

يا سلاااااااام

خبر جميل جدا

يستاهل ان الواحد ينزل يجربه بنفسه

**bee** · 10-05-2009 01:56 PM

والله يا علا أكيد التعريفة بتقدر بحسابات البنزين والزيت وكده ..
ومعظمهم بيعملوا العربيات غاز والغاز رخيص جداااا في التكلفة ..
فطبعا المشاوير القصيرة بتوفر وتجمل معاه والكبيرة كسبان فيها
فهو كسبان كسبان بس بجد لو استمر الوضع كده هتبقى حاجه تفرح ومحترمة واعتقد ناس كتير هتركن وتاخد تاكسيات وده هيقلل الزحمة نسبياً
شكرا على الخبر الجميل وكويس انك قلتي عشان انا نازل بكره كايرو ومن غير عربية ندور ع التاكسي الابيض بقه