جمال تصميم العربي دى سر من اسرار حب الناس ليها
واقبالهم عللى شرائها
عرض للطباعة
جمال تصميم العربي دى سر من اسرار حب الناس ليها
واقبالهم عللى شرائها
http://www.nilemotors.net/Nile/images/icons/icon7.gif تسجيل متابعه للموضوع .
كلامكم جميل جدا و حاسس كأنى مطرح كل واحد و هو بيشترى عربيته .
ربنا يباركلكم فى عربياتكم و يكفيكم شرها
:S_thum1[1]:
و الله نفس الاحساس و كأنك بتوصف احساسي الشخصي
العربيه دي تحفه فنيه بتبدء بالشكل الانسيابي القوي و لا تنتهي عند الاداء القوي الراقي في الموتور و الجير بوكس و العفشه بل تمتد لأحساسك من اول ما تقعد فيها و تدخل المفتاح و تدور العربيه
ساعتها بيبدء شعور بالقوه و الثبات
و بمجرد ما رجلك تنزل علي دواسه البنزين
بتحس كأنك راكب حاجه مميزه حاجه قويه حاجه خلرافيه غير معقوله
و كفايه بقي علشان الكلام مش بيخلص عنها
ربنا يباركلكو فيها و يوعدني بيها قريب
احساسك هو هو عند كل الناس وعندي انا كمان وان شاء الله ربنا يكرمني واجيبها قريب لاني فعلا بفكر فيها جامد اوي وربنا يبراك ليا فيها ويبارك لكل الاعضاء في عربيتهم قولو امين
صدقني أنا زيك بظبط وبقالي أكتر من سنة متابع المنتدى وكل أخبار العربية .
وإن شاء الله قررت اشتريها وحاروح أحجذها إنهردة .
بس إنت مؤلتش بعد ما جبتها ندمان ولا مبسوط وأخبار العيوب معك إيه ؟
الحمد لله العربية مفيهاش أى مشاكل من اللى بعض الناس بيشتكو منها , أنا دلوقتى داخل على 9000 كم وبفضل الله مظهرش معايا اى حاجة
ومش عايز اقعد اشعر فى العربية واقول كل المميزات اللى اتقالت قبل كده وكل الناس عارفينها , بس فعلا هى عربية كويسة جدا ومحترمة
هاحكى لحضرتك على موقف لسة حاصل من يومين
انا كان معايا شاهين وكنت بشيل فيها اوزان خرافية , وطبعا لما جبت الجين تو كنت مقلق شوية من موضوع انى اشيل فيها ، برده عربية جديدة مش زى الشاهين والله اعلم بالتحمل بتاعها...
اللى شجعنى بصراحة انها كانت حاجة لوجه الله ، مجموعة من زمايلى بيعملو شنطة رمضان وكنت بوزع معاهم الشنطة، قلت يالله على بركة الله ، قمت تانى الكنبة اللى ورا كلها ، الشنطة بقت ما شاء الله ،ربع نقل ، ومليتها على الاخر ، حوالى 37 شنطة ، الشنطة الواحدة تقريبا 13 الى 15 كجم مش متأكد بصراحة ، وسارت على بركة الله ، الاول كنت مقلق لان العربية هبطت جامد وقلت بس،،، هاتهرى مطبات ، وعلى الرغم انى رحت حتت ، مش عايز اقولك عايزة دبابة ، بس الحمد لله محكيتش فى ولا مطب ، وشوية شوية اتجرأت ومشيت عادى جدا ولا كأن فى حاجة .
العربية ما شاء الله ممتازة ، ولما هاتجيبها هاتحبها أكتر ، تخيل انى لما مابسوقهاش يومين ....والله بتوحشنى
احجز وتوكل على الله....ومبروك مقدما
ربنا يباركلك فيها يا استاذ مصطفى ,بس انا ليا سؤال ..انا لاحظت ان حضرتك عندك العربيتين اللي انا محتار بينهم ال جين 2 واليارس
ياريت تقولي انتى شايف مين افضل ولو قلت لي حضرتك لو هتستغنى عن واحده هتستغنى عن ميين ,طبعا ربنا يباركلك فيهم وماتستغناش عنهم بس انا بسال حضرتك عشان تكون الاجابه واضحه ليا ..
وشكرا لي حضرتك
الله يخليك والعفو على ايه
بص ياباشا
العربيتين دول انا بحبهم جدا وبحمد ربنا انه وفقنى ليهم , وبصراحة الياريس كانت أختيار زوجتى والجين تو اختيارى انا...وعلى الرغم من انى مش أنا اللى أخترت الياريس لكنى بعد ماسوقتها غيرت رأى نهائى فيها ومن غير ماطول عليك ..الجين تو تختلف عن الياريس بالكامل
الياريس سيارة مريحة وسهلة القيادة ومخصصة للمدينة بمعنى ان قيادتها ناعمة جدا وسهلة التحكم والمناورة على سرعات منخفضة ونصف قطر الدوران بتاعها صغير جدا يمكنك من الركن او الدوران فى الاماكن والشوارع الضيقة , واسعة من جوة وشنطتها واسعة برده
العفشة بتاعتها ناعمة جدا ومريحة
هى طبعا موفرة فى البنزين جدا وفى نفس الوقت الموتور ال 1300 مايضايقش فى حاجة فى السحب والمشى والتسارع بتاعها ممتاز
صوت موتورها ناعم جدا
أما الجين تو... طبعا موتور أقوى ةتسارع أعلى وخصوصا على السرعات العالية وطابعها رياضى أكتر وفى المقابل سحب بنزين أكتر ...تصميم الجين تو من وجهة نظرى أفضل ( الياريس مش وحشة) بس كشكل رياضى الجين تو أحلى ....بالنسبة للوسع من جوة...الياريس اوسع ....
الياريس لو محملها ركاب وشايل شنط ومولع التكييف ....سحبها بيقل ....الجين تو لا
شنطة الجين تو مش وحشة بس شنطة الياريس اوسع
بالنسبة لقطع الغيار ....هما الاتنين فى نفس المستوى تقريبا
التقفيل وجودة الخامات....الياريس أفضل
كانت الناس بتقول على ثبات الياريس بعد 100 بس انا شايفه عادى لغاية 140 ...هى خفيفة شوية ...لكن مش للدرجة..ولو شايل فيها ناس ....بتبقى عادى وثابتة...والموضوع ده على السرعات العالية وانا محستش بيه بصراحة...بس بالمقارنة بالجين تو .....الجين تو أكثر ثباتا وبتديك ثقة واحساس بالامان
أنا طولت عليك
الخلاصة ان الياريس سيارة عائلية تنفع للمدينة أكتر موفرة فى البنزين ومريحة ...الجين تو سيارة رياضية أقوى واكثر ثباتا لو انت بتحب الجرى والسرعات..وأعتقد هما قريبين من بعض من ناحية السعر وقطع الغيار
ونسيت حاجة كمان
الاوبشنز فى الجين تو تتفوق بمراحل...MP3 ABS EPD Parcking Sensors والصاج انشف كتير
الباور فى الياريس أنعم كتير
موضوع التابلوه اللى فى النص فى ناس مش بتستريح فيه....انا كنت منهم...بس أخدت عليه وحاسس انه عادى وظريف
التكييف تقريبا زى بعض....فى الياريس صوته اوطى
توكيل الياريس أفضل من الجين تو
الياريس عاملة معايا 30000 كم أما الجين تو 9000 كم.....بالتأكيد انا ثقتى فى الياريس أكبر بحكم المعرفة والخبرة والوقت ....ان شاء الله الجين تو برده تبقى كويسة مع مرور والوقت واثق فيها
نيجى للسؤال
بصراحة لما باجى مسافر العائلة بترتاح فى الياريس لانها اوسع وشنطتها أكبر بس انا لو لوحدى بفضل الجين تو
معذرة لعدم الترتيب ....وارجو انى اكون أفدتك