الموضوع: ليه اشتريت الجين تو؟؟؟؟؟؟

انا جبتها سنة 2007 يعني كانت تقريبا لسه جديدة وماكنش حد يعرفها_ انا نفسي ماكنتش اعرفها
كانت معايا إبيزا 94 وكنت بحبها جدا بس مشكلتها ان مكنش فيها تكييف وكننت عايز اغيرها قعدت ادور كتير مفيش عربية عجبتني
هيونداي ماعجبتنيش _ والانسر نفس الكلام ......إلخ
بالصدفة كنت في المصرية للسيارات مع اخويا وانا خارج لقيتها قدامي ماكنتش عارف ايه دي اتعلقت بيها اول ما شوفتها سألت اخويا عليها قالي دي عربية لسة جديدة اسمها Gen2
بعد انبهاري بشكلها دخلت طبعا على النت وعرفت مواصفتها وامكانيتها وقوة الأداء وكان طبعا nilemotors الفضل الرئيسي في اختياري ليها بالرغم من علمي بعيوب التقفيل الموجودة اللي بعضها حصل معايا فعلا

عربية شبابية جدا

المشاركة الأصلية كتبت بواسطة مصطفى_صديق

الله يخليك والعفو على ايه

بص ياباشا
العربيتين دول انا بحبهم جدا وبحمد ربنا انه وفقنى ليهم , وبصراحة الياريس كانت أختيار زوجتى والجين تو اختيارى انا...وعلى الرغم من انى مش أنا اللى أخترت الياريس لكنى بعد ماسوقتها غيرت رأى نهائى فيها ومن غير ماطول عليك ..الجين تو تختلف عن الياريس بالكامل

الياريس سيارة مريحة وسهلة القيادة ومخصصة للمدينة بمعنى ان قيادتها ناعمة جدا وسهلة التحكم والمناورة على سرعات منخفضة ونصف قطر الدوران بتاعها صغير جدا يمكنك من الركن او الدوران فى الاماكن والشوارع الضيقة , واسعة من جوة وشنطتها واسعة برده

العفشة بتاعتها ناعمة جدا ومريحة
هى طبعا موفرة فى البنزين جدا وفى نفس الوقت الموتور ال 1300 مايضايقش فى حاجة فى السحب والمشى والتسارع بتاعها ممتاز

صوت موتورها ناعم جدا

أما الجين تو... طبعا موتور أقوى ةتسارع أعلى وخصوصا على السرعات العالية وطابعها رياضى أكتر وفى المقابل سحب بنزين أكتر ...تصميم الجين تو من وجهة نظرى أفضل ( الياريس مش وحشة) بس كشكل رياضى الجين تو أحلى ....بالنسبة للوسع من جوة...الياريس اوسع ....
الياريس لو محملها ركاب وشايل شنط ومولع التكييف ....سحبها بيقل ....الجين تو لا

شنطة الجين تو مش وحشة بس شنطة الياريس اوسع

بالنسبة لقطع الغيار ....هما الاتنين فى نفس المستوى تقريبا

التقفيل وجودة الخامات....الياريس أفضل

كانت الناس بتقول على ثبات الياريس بعد 100 بس انا شايفه عادى لغاية 140 ...هى خفيفة شوية ...لكن مش للدرجة..ولو شايل فيها ناس ....بتبقى عادى وثابتة...والموضوع ده على السرعات العالية وانا محستش بيه بصراحة...بس بالمقارنة بالجين تو .....الجين تو أكثر ثباتا وبتديك ثقة واحساس بالامان

أنا طولت عليك
الخلاصة ان الياريس سيارة عائلية تنفع للمدينة أكتر موفرة فى البنزين ومريحة ...الجين تو سيارة رياضية أقوى واكثر ثباتا لو انت بتحب الجرى والسرعات..وأعتقد هما قريبين من بعض من ناحية السعر وقطع الغيار

ونسيت حاجة كمان
الاوبشنز فى الجين تو تتفوق بمراحل...mp3 abs epd parcking sensors والصاج انشف كتير

الباور فى الياريس أنعم كتير

موضوع التابلوه اللى فى النص فى ناس مش بتستريح فيه....انا كنت منهم...بس أخدت عليه وحاسس انه عادى وظريف

التكييف تقريبا زى بعض....فى الياريس صوته اوطى

توكيل الياريس أفضل من الجين تو

الياريس عاملة معايا 30000 كم أما الجين تو 9000 كم.....بالتأكيد انا ثقتى فى الياريس أكبر بحكم المعرفة والخبرة والوقت ....ان شاء الله الجين تو برده تبقى كويسة مع مرور والوقت واثق فيها

نيجى للسؤال

بصراحة لما باجى مسافر العائلة بترتاح فى الياريس لانها اوسع وشنطتها أكبر بس انا لو لوحدى بفضل الجين تو

معذرة لعدم الترتيب ....وارجو انى اكون أفدتك

بصراحه انا مش عارف اشكر حضرتك ازاي على توضيحك الاكتر من رائع ربنا يباركلك فيهم ويديك خيرهم

والله زي ما قال ايمن بالنسبه ليه برضوا بس اللى فعلا وقفنى جمال التصميم وبعد كده قوة الماتور اللى عرفته بعد كده لأن انا معايا موديل 2006 ما كنش حد يعرف عنها حاجه وكنت أول من استلم من الدفعه الأولى .... وبعدين عمله لى مشكله فعلا إن كنت بفكر أغير ومش عارف أركب بعيديها ايه بالسعر والجمال والقوة ديه

تحياتى