الموضوع: عاجل و مهم بيكات الكاربراتير و السخان

اولا انا من غير ما تتعب نفسك ليه روح لاي حد قطع غيار سكودا قلة عايز بكات لعربية فليشيا كربيراتر موديل كذا وبدون ما تتعب نفسك

السخان او التشوك له وظيفة واحدة وهي تحمية وتسخين المتور عن طريق انه بيعلي البنزين ويقلل الهواء زي الشفاط اليدوي بس هو اتوماتيك

طريقة عملة
1-اول ما تيجي تدور العربية وهي باردة خالص طبعا بتحس ان العربية بترعش وزي ما تكون مش قادرة تاخد نفسها وحتي لو سبت دواسة البنزين اكيد ممكن تبطل
فبتسنده ببنزين مدة 5 ثواني لغاية ماتشد لو السخان شغال بيفتح اتوماتيك بعد اول دوسة بنزين او بعد ضخ نسبة معينة سواء انت دوست او دورت وسبت البنزين

2-اول ما السخان يفتح تحس ان صوت المتور عيلي حبتين ولو عندك عدادrpm بدل ما السلانسية علي 800 مثلا هتلاقية علي 1.5

3-يفضل الموضوع ده لمدة 5 الي 10 دقائق تبع حالة الجو الخارجي يعني في الصيف ممكن يشتغل 5 دقايق بس

4-طبعا بعد مرور 5 ال 10 دقايق بتكون العربية سخنت فبمجرد مدوس بنزين هتلاقي المؤشر بتاع rpm رجع الي مكانة الاولاني

فكرة عملة
ببساطة هو شغال علي حرارة المياة الي داخلة للمتور بجرد ما تسخن بيفصل بس زي ما قلت هو بيفصل لما تبدا تدوس بنزين وتتحرك وده تقريبا ميعتبرش عيب ولكن لضمان الحفاظ علي درجة حرارة المحرك

في حالة لو التشوك او السخان لو بايظ او بيعلق

عادي جدا افصلة بس لما تيجي تدور زود بنزين شوية لمدة 5 دقايق وبعد كدة توكل علي الله العربية سخنت

هي بس ميزة التشوك انه اتوماتيك عشان لو عايز تسخن العربية وانت بتعمل حاجة تانية

المشكلة ان علي حد علمي انه لو باظ مبيتصلحش ولازم تجيب كربيراتير تاني تمنة جديد حوالي 800 جنية بس الاستيراد حلو مش بيعمل اكتر من 300 جنية
بس نظرا لعدم جدية الميكانيكية في موضوع السخان هيقولك افصله وانت تسخنها
بس عادي نص عربيات البلد الكربيراتير بايظ السخان بتاعها
لكن انا معرفش اذا كان بوظانة ممكن يؤثر علي كفاءة التسخين او الكربيراتير الصراحة

ارجو ان اكون افدتك

المشاركة الأصلية كتبت بواسطة crazylambada

كل الكلام اللي اتقال مظبوط ماعدا بس عند التدوير
انا عندي بدوس سنه بنزين قبل ما ادور
علشان احضر العربيه
و بمجرد ما ادور العربيه الشفاط بيشتغل
بشكل تدريجي بيبتدي من1.1
وكل ما الموتور يسخن يزيد الrpm
و ممكن يوصل ل2
و بمجرد ما بتسخن بتدوس سنه بسيطه بيفصل علطول
السخان مفيد جدا للمكنه في التسخين علشان بيسخن صح
غير كده ملهوش تاثير لانه بيتفصل و انتا ماشي

تمام يا باشا هو ده المقصود بالظبط

طب هل ده بيأثر على التكييف ؟ يعني أنا لما أفتح التكييف ألاقي ال rpm وطي و العربية كانها هتبطل

شكر جزيل للسادة الأفاضل اللى ردوا على الموضوع لأنه فعلا موضوع مهم
اولا عرفت ان اى حد كان بيشترى عربيه سكودا و يزور الميكانيكى لأول مره بعد اى مشكله فيكون اول حاجه يقولهاله الميكانيكى يا بيه افصل السخان ده احسن و طبعا بيقوله أمين و يفصله
موضوع السخان ده مسبب مشاكل كتير جدا لكل عربيات سكودا و طبعا الزيارات المتكرره للميكانيكى لتصليح العيوب دى مكلفة و بتتصلح لفتره مؤقته ثم تظهر تانى بعد فتره و اهو رزق الهبل
كان فيه رأى بيقول يا جماعه السخان ده وظيفته فى البلاد البارده بس علشان يحمى الموتور فى السقعه و التلج و يمنع كمان تكون الثلج فى الكربراتير لدرجه انه بيمنع تجمد البنزين نفسه و طبعا الكلام ده ردت عليه ناس تانيه كتير و قالت ان الفابريقه هى افضل الحلول لداء سليم لأى عربيه و مافيش اى داعى للتدخل و فصل اى شىء بالسياره حتى لو سعادة الميكانيكى شايف ان مالهاش لازمه و الا ماكنش صانع السيارة كلف نفسه فلوس علشان يعمل قطعه مالهاش لازمه تزود تمن العربيه و لو دولار واحد على اعتبار ان السعر الأقل منافس
و الباقى قال ان السخان يمكن احنا مش شايفين له لازمه فى بلادنا الحر لكن هو ليه لازمه و 100% لان اولا بلدنا مش حر استوائى للدرجه و مش طول السنه الجو حار اوقات طويله من السنه بيكون الجو بارد و اقل من 10 درجات مؤيه و فتره الصيف فتره مش طويله غير ان السخان الفابقريه وطريقة عمله لا تتعارض ابدا مع الجو الحار بحيث ان بدل ماياخد السخان فتره 10 دقائق لتسخين السياره فى البلاد البارده هاياخد بس وقت اقل فى البلاد الحاره
غير ان عدم وجود السخان و طريقه التسخين المانيوال بتأثر جدا على اجزاء معينه فى الموتور و السيارة كالأتى
1- الضغط الغير متوازن للدواسة البنزين مع اختلاف نوعيه الأشخاص اللى بيسخنوا و درجه حساسيتهم لدوسة البنزين فى وضع بيكون فيه المحرك بارد بتأثر على كفائته و احتكاك اجزائه و هى بارده غير ما يفعله السخان من تسخين منتظم و له مقياس ثابت
ان وجود السخان الذى يعمل على درجه حرارة الموتور التى هى بطبيعه الحال أدق بكثير من تخمينات و مؤشرات ارتفاع درجة الحرارة بالنسبه للى بيسخن مانيوال بنفسه يعنى
العيب الأكثر خطورة و اللى تم اكتشافه بعد معاناه و فحص و تجربه هو عيب لم يخطر لأحد على بال

(((( ان عدم وجود السخان و عمله يؤدى الى تلف او خمول جزء ميكانيكى مرتبط ببوابة الكربراتير و بالتالى مع الوقت يحدث نوع من التحجر او بالبلدى البوابه بتنشف و بالتالى تطول فتره التسخين العاديه و العربيه تبطل و تدور بعد كذا محاوله و تحس انها عايزه تبطل لوحدها على السلانسيه او تترج و هى لسه بتدور و مشاكل كتير اخرى يظن صاحب السياراه انها لا علاقه لها بالسخان كما أوهمه الميكانيكى الشاطر و بالتالى تبدأ رحلة لا تتوقف فى البحث عن حل لمشكله السياره و طبعا ادفع يا حبيبى))))

الجزء الأخر المهم و الذى يتم الغاءه ايضا اوعدم الاهتمام به هو جزء ثرموثتات الكوع

اولا وظيفة هذا الجزء هو التحكم بكميه المياه التى تمر من الموتور الى قربه الرادياتير و بالتالى الى الرادياتير ليتم تبريدها
اى انه يحافظ على ثبات درجه حراره المتور فعندما تسخن المياه تفتح ثرموثتات الكوع بوابه تسمح بمرور المياه الساخنه و دخول بعض المياه المبرده فتنخفض درجه حراة الموتور لكن بشكل متناسب مع درجه الحراراه المفروض ان يكون عليها

الغاء هذا الجزء يتسبب فى ارتفاع مفاجىء فى حرارة الموتور أو انخفاض ايضا مفاجىء فى حرارته
و عند حدوث ارتفاع مفاجىء لدرجه حراره المياه لا تستطيع ثرموثتات الرادياتير المثبته اسفله من واجهة الموتور الاحساس جيدا بدرجه الحراره فلا تعمل مروحه التبريد و بذلك تزيد درجه الحراراه زياده عاليه تصل الى الأحمر و بالتالى وش سلندر راح
او اذا انخفضت يكون اداء الموتور غير جيد لانه غير مصمم للعمل جيدا فى درجات الحراراه المنخفضه عن 70


بالنسبه لموضوع البكات عزيزى لو الموضوع بمنتهى السهوله كده كانت اتحلت لكن المشكله ان معظم البكات اللى راكبه بلدى و مش معروف الاستاندرد بتاعه كام لكن مع البحث و السؤال توصلت الى ان مقاس البيك الصغير للبوابه الأولى هو 92.5 و البيك الثانى 120

شكرا مره اخرى لكل من ساهم

يعنى ايه البيكات بلدى؟
كل بك له مقاس و مكتوب عليه بغض النظر عن مكان صنعه
لما تحب تغير بيكات روح للطويل فى شامبليون و خد معاك البيكات القديمه

بص يا استاذ نيو
بلدى معناها انه موجود عند بتاع قطع الغيار فى علب و كل علبه مكتوب عليها رقم لكن البيك نفسه مش مختوم برقم ده معنى كلمة بلدى
و بلدى دى موجوده فى كل قطع الغيار اللى ممكن تتخليها و كلمة بلدى معناها (غير واضح المنشأ و لا التفاصيل)
و بعدين انا قولت لحضرتك ان بعد بحث و سؤال عرفنا ان البيكات مقاسها 92.5 و 120 و ده بعد طول بحث مش بالسهوله كده تروح تقوله عايز فيديلك لأن 90% من بتوع قطع الغيار ماعندهومش المعلومه الصح و لو عندهم المعلومه لكن السلعه مش موجوده طبيعى انه يقولك على اللى موجود عنده انه هو ده الأصلى و الصح علشان يبيع ..
و بعدين لو البيكات اللى كانت راكبه عندى اصلى و عليها ارقام كان انتهى الموضوع لكن اللى كانو راكبين بلدى يعنى مافيش عليهم رقم بالتالى كان لازم اسأل علشان أعرف الرقم علشان لما اروح اشترى و يقولى رقم غلط اقوله لا انت غلطان مش هو ده الرقم مش اخد اللى يديهولى و خلاص حتى لو قالى انه هو ده الصح و الأصلى
شكرا مره اخرى على اهتمام الجميع

متجيبش البلدى اللى بتقول عليه
روح للطويل و ان شاء الله هتلاقى طلبك (انا لسه شارى من عنده اول امبارح و كل بك مختوم رقمه عليه) و خد القديم معاك علشان يجيبلك نفس نوع السن و الحجم