الحمد لله - الزجاج الامامي اتكسر

بداية الحمد لله على ما اصابنا
فما اصابنا من خير فمن الله وما اصابنا من شر فمن انفسنا

النهاردة الصبح كنت رايح العاشر للمصنع بتاعنا في مامورية عمل وسمعت نقرة على الزجاج الامامي غالبا بسبب زلطة صغيرة
قولت وانا راجع اعملها عند دكتور جريش او دكتور خالد
روحت العاشر 10:30 ومشيت بعد صلاة الضهر نزلت الجاج لقيت الازاز الامامي الشرخ بقي طولة 50 سم
الحمد لله قدر الله وما شاء فعل
روحت على مصنع دكتور جريش اغيره عشان عارف انه احسن واجود خامات الزجاج في مصر وكان في طريق للقاهرة
ثمن الزجاج 320 جنيها و10 جنيه اكرامية
ما دعاني للكتابة لكم هنا اني لاحظت دقة وجودة زي الفل في التركيب
انا في شارع جمال عبد الناصر حيث اسكن يوجد محل كبير للثلاثي بتاع زجاج السيارت لكن تركبيهم مشض قد كدة وبشوهو العربية بالسليكون
اهم ما لفت نظري نوعية السليكون اللي بيستعملوة للعربيات الغالية مش للنص نقل وغيرها
سليكون انجليزي في كيس بلاستيك بيتفضىى في مسدس كبير العبوة بتكفي عربية ونص فقط وتمن العبوة 90
طبعا انا مش بدفع حاجة بس لما الثلاثي بيركب للعربيات سليكون من اللي العلبة ب 7 جنية وده بيركب بسليكون ب 90 جنية يبقي في حاجة كويسة وايجابية لازم اقول عنها
نصيحتي لو قدر الله لك واتكسر الزجاج مشوار العاشر 40 كيلو بس لو خايف ويهمك شكل عربيتك لانهم بياخدو بالهم من تفاصيل فنية كتير وهما بيركبوا
----------
على الهامش واحد صاحبي بيكلمني وبيقولي مش لو كنت مامن كنت غيرتة في التوكيل
رديت قولت لله ما اعطى ولله ما اخذ
ماله واسترده بعدما اعطاياني من غير حول منى ولا قوة

فى ناس بتامن على عربياتها ولما تتخبط بتاخد التعويض ومبتخسرش فلوس

وناس بتامن عند ربنا وبيحفظهم

• قدر الله وما شاء فعل
  
  وقل ما يصيبنا الا ما كتب الله لنا
  
  وماتزعلش يا كريم انا لما غيرت الزجاج الراجل
  
  كان نضيف جداا فى تركيبه الحقيقة وماكنش فى نقطة
  
  سيلكون خارج بره الزجاج

نسيت اقول ان تمنه عند الثلاثي 460 جنيه

معلش يا كريم قدر الله وما شاء فعل

أنا ليا ملاحظة :-
إنت قلت إن ممكن زلطة هي اللي عملت كده ، لأ هو مش ممكن هو أكيد ، لأنا إمبارح راجع من السلام دائري والطريق كان مليان تريلات اللي ينرفز إني طول السكة سامع نقر زلط ورمل على الزجاج بس مش عارف أعمل إيه البهوات مش مغطيين الحمولة بتاعتهم ومشيين يلوشوا في خلق الله ، وبعدين أنا من كثرالخبط والنقر قمت راكن على جنب لمدة نص ساعة وبعدين مشيت تاني ، فعلا حاجة تحرق الدم .

الحمد لله يا كريم... قدر الله و ما شاء فعل.

ممكن عنوان المصنع والمكان المناسب للتركيب؟
ملاحظة أخرى ؛-
عند شرخ الزجاج ضع شريط سيلوتيب على الجزء المشروخ حتى لا تدخل الرمال والمياه بين شطرى الشرح فيعيق عملية الاصلاح ( عند مركز الدكتور خالد ) حيث ان الاصلاح عندهم يخفى الشرخ تماما وكأن شيئا لم يحدث !!!

الحمد لله يا كريم انها جت على قد كده قدر الله وما شاء فعل معاش حصل خير ان شاء الله ديه حاجات بسيطة كلها و الحمد لله أن انت و عائلتك الكريمة بألف خير ربنا يعوضك خير ان شاء الله. أنا ان شاء الله لو حصلى حاجة كده هكلمك و نروح للعاشر من عندى كده يعملوا 80 كم بش مش مشكلة لأنى انت طالما قولت الناس ديه 10 على 10 يبقوا كده لأنى بثق فى كلامك :)

حصل خير يا كريم والحمدلله على كل حال, والحمدلله انها جت على قد كدة وشاكرين على النصيحة بس ممكن اعرف هو الراجل دة ليه فروع برة القاهرة ؟؟؟

لأ يا عبد الله.. ده اصلا مصنع زجاج كبير و موجود في العاشر.

قدر الله و ما شاء فعل كويس انها جت لحد كده و على فكره جريش ده انضف مركز زجاج في مصر كفايه انه واخد أيزو

قدر الله وماشاء فعل

ربنا يسترها علينا

ويا عبدالله مخزن الدكتور جريش عندي في شارع السنترال ده مخزن لهم بيطلعوا منه لكل المحلات اللي في الدقهليه وغيرها من المحافظات لو احتجت تسال عن حاجه قولي وانا اسألك وابقى عدي يا اخي

اقتباس:

---

لأنا إمبارح راجع من السلام دائري والطريق كان مليان تريلات اللي ينرفز إني طول السكة سامع نقر زلط ورمل على الزجاج بس مش عارف أعمل إيه البهوات مش مغطيين الحمولة بتاعتهم ومشيين يلوشوا في خلق الله

---

سبحان الله!
أنا امبارح برضه زجاج العربية اتنقر لنفس السبب و على الدائري كمان!
قدر الله و ما شاء فعل.

قدر الله و ماشاء فعل و الحمد لله إنها جت على أد كده

فداك يا باشا بس كنت سيبه كام يوم عشان العين

قدر الله وما شاء فعل

(الحمد لله) دى افضل كلمه بدأت بيها كلامك ياكريم متزعلش نفسك قدر الله وما شاء فعل فداك وفدا كنزى وبيدو

انت عارف العين عليك كتير فداكم ياباشا

:( :( :( :( :( :( :( :( :( :( :(
قريت العنوان اتنكدت و الله يا كريم و اتخيلت بقايا الزجاج و هو علي التابلوه و الدواسه و الفرش اتعكننت اكتر :( :( :(
الحمد لله انها جات علي قد الزجاج بس و لما بتيجي في حاجه زي دي مش في جسم العربيه بيبقي الواحد مبسوط.
الف حمد الله علي سلامتك

الحمد للـ لله أنها جت على قد كده

على فكره سعر الزجاج الأمامي للكوروللا بالنسبالي مفاجئة لانه كده يبقى رخيص جدا مقارنة بماركات تانيه كتير

وعلى فكره كان ممكن فعلا تصلح الشرخ عند الدكتور خالد وده ممتاز

أنا عن نفسي ماكنتش مقتنع أبدا أن أصلاح الشروخ بالحقن والكلام ده مفيد على الأطلاق وكنت بقول مش ممكن الشرخ يكون مش ظاهر أبدا لا زم يظهر ولو حتى خيط صغير جدا
لكن بصراحه بعد ما شوفت أصلاح الشرخ بتاع العربية الألنترا بتاعت أخونا شريف المصري ماصدقتش أبدا أنه ممكن توصل دقة الأصلاح للدرجه دي أبدا
ومن كتر أعجابي بعد ما شوفت زجاج شريف المصري بعد الأصلاح أتصلت بواحد صاحبي وحبيبي عنده عربيه "سوبارو" أمبريزا في شرخ في الزجاج الأمامي ولما جه يغيره فيالتوكيل لقى سعره ألافات مؤلفه (مش فاكر كام ألف جنيه) قلت له على طول على موضوع الدكتور وخالد ومدى فاعليته


المهم يا سيدي إللي يجي في الريش بقشيش زي ما بيقولوا

المهم يا سيدي إللي يجي في الريش بقشيش زي ما بيقولوا

حمدا لله على سلامتك يا باشمهندس كريم .

الحمد لله على كل ردودكم والله انا ماكنتش اقول عشان مؤمن ب
ما اصابكم من مصيبة فمن انفسكم (يعني من اعمالنا :oops: :oops: )
حازم الازاز اتشرخ شرخ طولي لكن ما اتفتفتش الحمد لله واتشال زي ما هو سليم لكن بالشرخ
هناك في المصنع بتاع جريش قالولي ما تصلحش اي شرخ زاد عن 10 سم
انا مجرب الحقن في الريو خدت زلطة اول يوم جت قبل ما تترخص حتى
لكن الشرخ نزل لتحت بسرعة ووصل لطرف الزجاج وانا بمشي بسرعة وضغط الهواء رهيب على الزجاج

مصنع جريش اكبر مصنع زجاج في مصر والشرق الاوسط وبيعمل جميع انواع زجاج السيارات والطلبيات والاسطبمات الخاصة
الثلاثي كتير قوي من افتراه مابيرضاش يجيب منه ويجب من مصانع تانية على قدها عشان يكسب اكتر
جريش باعلي الامامي بالتريكب بالسليكون الغالي ب 320 وهو بيبيعوه بالسليكون الرديء ب 460
يعني لو حطينا فرق السليكون وحساب الثمن التجاري يكون مكسبة مقرب على 80% او اكتر
ديدو ماينفعش اسيبة عشان ما يسرطنش
ربنا ما يخليكم تروحو لجريش ولا غيرة وتوصلو بيوتكم سالمين
استاذ ايمن جزااك الله خيرا على دعواتك
شكرا ليكم جميعا مرة تانية

حمداً لله على سلامتك ياكريم والحمد لله إنها جت على أد كده
أسف لتأخري في الرد بس والله لسه شابف الموضوع دلوقتي حالاً
يارب تكون آخر حاجة تضايقك إن شاء الله

الف سلامة غليك يا كريم و قضي اخف من قضاء

المهم فعلا ثمن الزجاج بتاع الكورولا وهمي

انا غيرت زجاج العربية عندي الاكورسا ب 450 جنيه

و اخر ما وصلت للسعر كان 420 جنيه
بتاع دكتور جريش

شكرا يا وائل على ذوقك وربا يكرمك
modux شكرا على السؤال بس تمنه هنا 460 جنية
ال 320 في المصنع هناك والتمن وجودة التركيب يغروا اي حد يروح يعملة هناك
ربنا ما يحوجوا تروحوا هناك

ألف حمد الله على السلامة , وإعتبر اللى حصل صدقة و زكاة عن صحتك و صحة عائلتك و ربنا يكفينا جميعا شر الطريق

قدر ولطف يا كريم
والحمد لله إنها جت على قد كدة.

الحمد لله يا كريم باشا على كل حال

و ربنا يجعلها في سجل حسناتك ان شاء الله

اقتباس:

---

على الهامش واحد صاحبي بيكلمني وبيقولي مش لو كنت مامن كنت غيرتة في التوكيل
رديت قولت لله ما اعطى ولله ما اخذ
ماله واسترده بعدما اعطاياني من غير حول منى ولا قوة

---

بجد الله ينور عليك

ربنا يعوضك خير إن شاء الله

فعلا مصنع جريش اسعارة ارخص و الزجاج جودنتة اعلى من اللي في السوق و تركيبة احسن و بيستعملوا خامة سيليكون انضف

انا مابرضاش اشتري اي زجاج من السوق و بانزل للعاشر لجريش اركب هناك و ارجع

اخر مرة نزلت جين برابريز الهوندا الامامي تريبلكس ب 265 بالتركيب تقريبا على ما أذكر بينما كنت سمعت من بتاع القزاز اللي جنب البيت من باب العلم بالشيء 390 جنية و علشان خاطري و الجيرة :lol:

معلهش يا كريم قدر الله و ما شاء فعل ....
فداك انت و الأسره

Alf Salama

Insha'Allah, Rabina Yikhlif aliek bi ahsan mino

el mohm en enta wil osra bi khier

Wi Rabina ydeem aliek ne'mit el Hamd

معلش با بشمهندس كريم انا عارف انى بقلب عليك المواجع بسؤالى فى الموضوع ده
انا العربيه الكليو بتاعتى الزجاج الامامى بتاعها مشروح شرح عامل زى الشمس فكنت عايز اغيره عندهم بس للاسف انا مش ضامن الاقى عندهم الزجاج ولا لأ فيارت لو حضرتك او اى حد من الاعضاء يعرف نمرتهم يكتبهالى

للاسف معرفش نمرة د جريش
بس ممكن تسال الدليل 140

بس اكيد عندهم لانهم عندهم موديلات 2008 كمان

د. جريش

المنطقة الصناعية الثالثة
العاشر من رمضان, القاهرة
الهاتف: 015 410013

د. جريش لصناعة الزجاج

المنطقة الصناعية الثالثة
العاشر من رمضان, القاهرة
الهاتف: 015 410004 - 015 410005 - 015 410003
تصنيفات مشابهة: زجاج بانواعه