شراء سيارة جديدة - هل انضم للعصابة الماليزية ؟؟؟ ؟ هل في Test Drive للجين ؟
السلام عليكم يا بروتوناوية :)
للاسف بفكر اخون المافيا الايطالية .. و بفكر حاليا في شراء سيارة جديدة علي اخر السنة ( شهر 11 كدة مثلا ) .
و حاليا اختياراتي محدودة جدا لسبب .
عايز سيارة :
- اكبر من سيارتي الحالية ( فيات باليو )
- شكل انييييييييييق
- اقوى كمحرك ( محرك الان 1242 سي سي)
- لازم لازم لازم لازم هاتشباك
- متزيدش عن 85 - 90 الف .
- توكيل محترم و قطع غيار متوفرة خارجه
بدون تحيز معين او ترتيب معين حددت لنفسي الاختيارات دي مبدئيا :
بروتون جين 2 ( مانوال )
بروتون جين 2 ( اوتوماتيك )
--
فيات جراند بونتو ( مانوال )
--
بريليانس FRV ( مانوال )
--
شيفورليه افيو 5 هاتشباك ( مانوال )
-----
اجي لتقييم السريع لكل واحدة من دول
البروتون مبدء " value for money " بيشتغل فيها جامد , بس في نفس الوقت موضوع الحظ و عيوب التقفيل العشوائية مقلقني جدا لاني حشتري سيارة تعد معايا 5-6 سنين كمان .. و غالبا حتكون تقسيط .. فمش عايز اتعكنن !
بس محققة نسبة كبيرة من مطالبي ان لم تكن كلها و كمان ممكن اركبها اوتوماتيك - بس سعر اعادة البيع ضعيف
فيات جراند بونتو - بدون تحيز لفيات بس اكيد تتفقوا معايا ان الجراند " انضف " الخيارات من ناحية الجودة و التصنيع و الخامات و الاعتمادية و لكنها ايضا " اضعف " الموجودين من ناحية المحرك 1400 سي سي - 77 حصان و ابسطهم في الكماليات و اغلاهم في قطع الغيار .. بس 5-6 سنين دي فترة تافهة بالنسبة لها بدون عيوب تقفيل او مشاكل مثل بروتون و انسى اعادة البيع
الFRV - السيارة الصينية الوحيدة الي بتخليني انسى تماما انها سيارة صينية .. تحقيييييق كاقة رغباتي تقريبا !
اكبر من سيارتي
شكل انييييق جدا
محرك 1600 سي سي معقول جدا
كماليات ممتازة - سعر عالي نوعا ما ( 82 الف )
هاتشباك !
توكيل BMW :)
مشكلتها معايا .. انها حتكون مثل بروتون في موضوع العيوب العشوائية ( تخمين يعني و من بعض شكاوي مالكيها ) بس الى حد الان لم ارى شكوى جوهرية في السيارة و بصراحة اكثر واحدة مشرحها اكتر من البروتون كمان بس خايف !!
شيفورليها AVEO 5 هاتشباك
اغرب سيارة كنت ممكن اتخيل اني حاعجب بيها .. صراحة - شكله هو الحاجة الوحيدة و انا اعني الوحييييييدة الي مخلياني ببص عليها .
محرك اي كلام 1500 سي سي - 83 حصان ( خرج سيارتي ال 1242 سي سي ) - كماليات قليلة - توكيل اختلف عليه الكثيرون و قطع غيار غالية بس اعتمادية و جودة جيدة جدا .. معتقدش اني حجيبها بس حطتها في الاختيارات .
انا عارف ان الموضوع وسع و بقى مش بروتون خالص .. بس بما ان مشتري بروتون في راي هم " اعقل ناس " و اقلهم تعصبا من الماركات المقدسة الاخرى مثل التويوتا و الرينو :P -مع احترامي الكامل ليهم طبعا
فقلت ان مناقشة لسيارات في هذه الشريحة حتكون اوقع مع ممتلكي سيارات هذه الشريحة .
و عن نفسي مش حرتاح الا لما اجرب جميع هذه السيارات
انا جربت الجراند بونتو و بصراحة مقتنع بيها جدا لولا اني لم اشعر بفرق شاسع بينها و بين سيارتي المتواضعة ( في القيادة و المتعة فقط .. الفرق شاسع في كل حاجة تانية ) .
الجين 2 ركبتها بس مسقتش غير مرة و ملحقتش احكم فعايز اروع عز العرب اجرب و الاوتو و المانوال !
الFRV انا حجزت TEST DRIVE في البافارية و ان شاء الله اوافيكم بيه .
ايه رايكم يا ناس ؟
خليني في المضمون و ارفع راس روما و اجيب جراند بونتو ؟ في مقابل تضحية للسرعة و الاداء
و لا اخليني " حظيظ " و اضرب ضربة معلم مع جين 2 تطلع يا رب من غير عيوب !
و لا اخليني مخاطر مع توكيل BMW و اثق فيه كمقدم لسيارة صينية تخطف عيني و تركيزي كل ماشوفها في الشارع ؟؟
و لا اخليني زي الشعب المصري و اركب الي موجود و منتشر زي الافيو و خلاص ؟
ولو في سيارة هاتشباك انا مش واخد بالي منها في السعر ده ياريت تفيدوني :)
معلش طولت عليكم !!