ايه الرقم القياسي لسيارة جديده بدون خدوش في شوارع المحروسه؟

طبعا الواحد لما بيكون معاه عربيه جديده و لسه بكر متخدشتش بيكون خايف عليها من الهوا الطاير. ، فما بالكم من تاكسيات و ميكروباصات و شباب مصر الروش اللي بيجري من غير ما يبص و عجل و موتسيكلات و عيال بامواس و مسامير و حراميه بيسرقو العلامات و الطاسات و ناس لازم تخبط فيك و هيا بتركن عشان تعرف انها ركنت كويس و طبعا ربنا يكفينا شر النقل و المقطورات و..و....و....و....:36_1_2[1]:

طبعا الموضوع ده نصيب بس حبيت أعرف ايه أطول مده حد فيكم قعدها بعربيته الجديده من غير ما تتخدش منه، سواء خطأ شخصي أو خطأ الغير.
انا شخصيا بقالي تلت أيام مع العلم اني سواقتي هاديه و بغطي العربيه باستمرار و ربنا يسترها علينا و عليكم من جنون الشارع المصري.

اسبوع واحد بالعافيه

حوالى 6 شهور
وطبعا اسباب الخدوش معروفه
القطط وخرابيشها - واحد حب يكتب مذكراته على عربيتك - حجر ماختش بالك منه وانت بتركن يقوم يكسرلك الاكصدام من تحت
بس اكتر غاظتنى
واقف فى البنزينه بأمون
وتاكسى عطلان فى الشارع والناس بيزقوه عشان يدخلوه البنزينه
الحماس اخدهم كلهم وهما بيزقوا يقوم هوب لابس فيا من ورا
انا كدا غلطان ؟؟؟؟؟؟؟؟ ده انا واقف بأمون !!! مش عارف المفروض الواحد يعمل ايه عشان ميتخبطش
انا مش عارف بجد اللى راكب عربيه غاليه بيستحمل يمشى بيها فى مصر ازاى

اقتباس:

---

المشاركة الأصلية كتبت بواسطة Hosam_Optrawy

واقف فى البنزينه بأمون
وتاكسى عطلان فى الشارع والناس بيزقوه عشان يدخلوه البنزينه
الحماس اخدهم كلهم وهما بيزقوا يقوم هوب لابس فيا من ورا
انا كدا غلطان ؟؟؟؟؟؟؟؟ ده انا واقف بأمون !!!

---

فكرتنى بالنكتة بتاع الراجل اللى كان قاعد فى الكشك

يوم واحد

كل واحد ونصيبه

بس لازم تاخد نصيبك فى مصر

12 ساعة وواحد رسملى قلب على الشنطة وكتبلى اسمة محمود واسم حببتة بسينة
طيب هو يحب وانا يتخرب بيتى

اقتباس:

---

12 ساعة وواحد رسملى قلب على الشنطة وكتبلى اسمة محمود واسم حببتة بسينة
طيب هو يحب وانا يتخرب بيتى

---

ههههههههههههه
طيب هو يحب وانا يتخرب بيتى

لازم هتتخربش وتاخد علامة الجودة واثبات انك فى مصر

10 ايام ودة كان رقم قياسى بالنسبالى وبعدها حجر مرمى فى الشارع جابلى عتبة العربية

اثناء الفحص الفنى للترخيص اول مرة !!!
من واحد بيمتحن سواقة فى المرور

شهرين وخدت بعديها علامه مسجله لا يمحيها الزمن

اقتباس:

---

المشاركة الأصلية كتبت بواسطة pro_samir

فكرتنى بالنكتة بتاع الراجل اللى كان قاعد فى الكشك

---

ودى بتقول ايه ؟ :D

انا كان عندى نوبيرا زيرو 2001 اول ما جبتها كنت خايف عليها جدااااااااا جبتلها غطاء وكل شوية ابص عليها المهم فى يوم من الايام نازل رايح مشوار وجاى ارفع الغطاء والاقى الصدمة الرهيبة الزجاج الامامى مكسور كله وخدوش معموله بمسمار على الكبوت والجنب اليمين كله من الرفرف قدام الى الرفرف ورا والغريب ان الى عمل كده غطاها تانى زى ما كنت انا مغطيها تمام شفتوا الذوق :fdsa::fdsa:

طبعا دا غير العرس ... أصلها ناقصه

يا إبنى ده ختم صلاحية السيارة للسير فى شوارع جمهورية مصر العربية ..
حاجة زى ختم النسر كده ..

5 ايام وخدت ختم الجوده المصريه

وسع ياعم انت وهو ...اطول رقم قياسي عندي انا ومفيش حد في المنتدى ولاحتى في مصر جابه او حتى قريب منه طبعا ..........اطول رقم قياسي كان ___________



30 دقيقه ......... ايون نص ساعه مش خطا في الكتابه ...عربيه اخويا فيرنا 2008 كان جايبها من المعرض وركنها تحت البيت وبعد لما ابن البواب غسلها من التراب اللي عليها وانا قاعد فيها وبتفرج عليها وفي عز فرحتنا بيها ........صوت خبطه رهييييييييب والعربه اترجت .....الواد ابن الجيران ابن ............* رمى من الدور العاشر حنه حديده نص متر (زي حديده المنشر ) ونزلت على العربيه من ورا عملت نقره وبينت الصاج وخدش كبير ....وقولنا الحمد لله وخدت العين ...وبعديها بكام يوم خبطت العربيه وعوجت الكبوت وحصل خرم في الاكصدام وكانت اول خبطه في حياتي ....

هما خمس ايام ووأخدت ختم النسر وختم الجودة وختم لعين
ومن ساعتها ... مش بتبطل ... غلطي .. وغلط غيري
مش عارفة ممكن اغيرها إزاي وأجيب عربية أحسن أو زيرو في يوم من الايام .... متهيألي لازم الغي الفكرة دي

انا الحمد لله شهرين بعد اول حادثة ليا عملت سمكرة و دوكو و قعدت شهرين لحد ما روحت المرور علشان ارخص و اتخبطت هناك من واحد معاه فيزبا

حوالى 6 أيام سعيدة ثم تم وضع قفص خضار على الكبوت وتحريكه وهزه واللعب به على مساحة كبيره

انا بقى عندى رقم قياسى 5 دقايق بكتير ابن خالتى وهو بيخرج عربيتى من المعرض حكها فى عربية زيرو ف المعرض بردة مع انة بيسوق من زمان وبيسوق حلو اوى وهو الى كان بيعلمنى السواقة و هو الى خرجها عشان ان كنت لسة مش بسوق كويس