كارفور - هايبر - سبينيس

ايهما تفضل كارفور - هايبر - سبينيس

المهم كلهم بيعملوا ايه بقى
ولاد الأيه بقى بيعملوا ايه

اولا بعض المنتجات تلقيها معدومه الهاويه
زى ماركه وان
او اى كلام وخلاص
متبقاش عارف عنها حاجة ويقولك متصنعه لحساب الماركت

يعملو عروض على بعض المنتجات اللى قربت تنتهى مده صلاحيتها خصوصا الجبنه

يرخصوا بعض المنتجات ويغلوا بعض منتجات تانيه واهو ده يعوض ده

بس برضوا ده مايمنعش انهم كويسين وبتلاقى عندهم كل حاجة وبيحاسبوك بالقروش فتعمل فرق برضوا لو بتشترى حاجات كتير

واهم حاجه انها بتعبر خروجه مفيده وبترحم شويه من طلبات البيت الى مابتخلصش هههه

اقتباس:

---

المشاركة الأصلية كتبت بواسطة compuland

واهم حاجه انها بتعبر خروجه مفيده وبترحم شويه من طلبات البيت الى مابتخلصش هههه

---

ازاي؟!
بالعكس، دي خروجة كلها غرامة وكلها طلبات للبيت!

ده الراجل بيبقى ماشي عايز يشتري حجات كتير مش محتاجها، ما بالك بالست؟!

إلا إذا كنت بتهزر:shyy:

ماركة وان فى كارفور معناها ان دى اول درجة فى المنتج اللى انت بتشتريه و بالتالى بيكون سعرها رخيص...... لانه توجد لنفس السلعة منتجات مختلفة تتراوح فى الجودة...... اكثرها جودة يكون اعلاها سعرا، لكن ماركة وان دى معناها اول درجة فى الجودة للسلعة اللى انت بتشتريها، ده اللى انا عرفته لما سألت على ماركة وان دى فى احد فروع كارفور فى فرنسا، لان مفيش حد هنا فهمنى حاجة طبعا......

و على فكرة منتجات وان دى مش وحشة وعن تجربة و لو بصيت على العلبة هتلاقى ان الشركات اللى بتنتج هذه المنتجات هى نفس الشركات التى تنتج نفس الماركات المختلفة لنفس السلعة......

اهه مكان فيه كل شئ تحت سقف واحد بس لازم يكون عندك علم بالاسعار بره لان فى حاجات رخيصه وحاجات غاليه
مثلا جيت اشتريت لمبه لقيتها اغلى من بره 2 جنيه

بمناسبة ماركة (وان) و اللمبات
من حوالي شهرين كان في عرض على اللمبات (الموفرة) ماركة (وان)
(2) بسعر (3)...ركبت واحدة إشتغلت , التانية أول ما نورت باظت التالتة تابتة ما نورتش أساساً
كده تبقى لمبة بسعر إتنين
:fdsa:

اقتباس:

---

المشاركة الأصلية كتبت بواسطة khaled lanos

بمناسبة ماركة (وان) و اللمبات
من حوالي شهرين كان في عرض على اللمبات (الموفرة) ماركة (وان)
(2) بسعر (3)...ركبت واحدة إشتغلت , التانية أول ما نورت باظت التالتة تابتة ما نورتش أساساً
كده تبقى لمبة بسعر إتنين
:fdsa:

---

اهو ده اللى بقول عليه

والاخ اللى بيقول سأل فى كارفور فرنسا
الكلام ده فى فرنسا مش هنا
ثانيا اى شركة معرف انها بتنتج عشان سمعتها والماركة اللى على المنتج
لما تيجى بقى تنتج بأسم ماركه تانيه ولا هتفرق معاها موضوع الجوده اساسا

:C_laugh[1]::C_laugh[1]::C_laugh[1]:

اقتباس:

---

المشاركة الأصلية كتبت بواسطة khaled lanos

بمناسبة ماركة (وان) و اللمبات
من حوالي شهرين كان في عرض على اللمبات (الموفرة) ماركة (وان)
(2) بسعر (3)...ركبت واحدة إشتغلت , التانية أول ما نورت باظت التالتة تابتة ما نورتش أساساً
كده تبقى لمبة بسعر إتنين
:fdsa:

---

:C_laugh[1]:
بجد انا لو منك كنت ارمي السليمة بالمرة ويبقي خيرها في غيرها

اقتباس:

---

المشاركة الأصلية كتبت بواسطة itsonlyme

ازاي؟!
بالعكس، دي خروجة كلها غرامة وكلها طلبات للبيت!

ده الراجل بيبقى ماشي عايز يشتري حجات كتير مش محتاجها، ما بالك بالست؟!

إلا إذا كنت بتهزر:shyy:

---

ما بهزرش طبعا
والست بتيقى مبسوطة ان جوزها معاها بيجيب طلبات البيت

واهى خبطة بالمرزبه ولا 100 بالشاكوش

واحسن متيجى كل شويه وتقلك هات وهات

وبعدين انت بتبقى تقريبا كبرت دماغك من مصاريف البيت بعد كده

واهى علقة تفوت ولا حد يموت

المحمل من وجهة نظرى افضل اسعار و منتجات ..

موضوع غلوا الاسعار و نقصانها فى بعض المنتجات ده مش بيبقى بارادة الهايبر ماركت فى بعض الاحيان لان فيه بعض المنتجات ممكن ميكونش معمول عليها servey كويس بره و بالتالى الشركات اللى منزلاها بتحاول تنزلها بالى تمن و ده دائما هاتلاقيه فى الnon food products زى اللمض و الاجهزه الكهربائيه و الحاجات دى لانها دائما ما تكون مشتريات من الهيبر مش امانات بمعنى ان الهيبر دفع فلوسها خلاص
كلامى على هايبر وان لانى كنت بنزل هناك مندوب عن شركتى و يا عالم ممكن ارجع تانى لو خلصت امتحانات و مالاقيتش شغلانه تانيه

اقتباس:

---

المحمل من وجهة نظرى افضل اسعار و منتجات

---

احنى برده من المحمل حاجته كويسه و سعرها معقول مشكلته فى الركنه بالنسبه لفرع المعادى

كارفور اعتقد انة جيد وعلي فكرة انا ممكن ارحو اشتري منة اي عايزة فقط ويكون علية عرض كويس وبعدين موضوع اللمبد دة انا بحب موضوع التخصص يعنة هو في الاول ماركت

يا جماعة ده شئ مفيد إن يكون عندنا محل واحد فيه كل حاجة .
تروح كمان واحد ........ تلاقي مكان تركن فيه و تشتري كل اللي أنت عاوزه من مكان واحد من غير ما تلف على محلات الدنيا .

بالنسبة لماركة وان .
إي ماركت كبير في الدنيا بيعمل ماركة بإسم المحل و بتكون هي أقل سعر و أقل جودة و الناس ما قالوش أنهم بيقدموا أحسن جودة بأرخص سعر .

الرف عليه أم قرش ........ و بجواره أبو قرشين .


بالنسبة للمبات .
أنا كل اللمبات اللي عندي في البيت من كارفور ( لمبات موفرة ) و الحمد لله كلهم شغالين .
و مفيش غير واحد بس مكنتش شغالة ........ و رجعتها و بصراحة خدمة العملاء أكثر من ممتازة و أخدت واحدة مكانها سليمة .
أدام معاك ايصال الشراء ........ ترجع باللمبات المعيبة و تقولهم عليها و إن شاء الله يرجعوها .

أنا بحب التعامل مع الشركات الكبيرة علشان لما بتشتري حاجة فيها عيب بتعرف ترجعها .
يا فرحتى أنا لما أنزل شارع عبد العزيز ......... و ينضحك عليا .......و أتعب قلبي في الفصال مع شوية حرامية ( مش كلهم طبعا ) ....... بس الأغلبية .
و بعدين أدور على واحد تاني علشان يوصلي السلعة لغاية البيت و برضه فصال ووجع قلب ......... و بعدين تروح بيتكم تلاقي مشكلة مثلا في الجهاز .......... و لو كان الجهاز مستورد ........ التاجر ميعرفكش ...... و لو رجعتله ........ بتبقى خناقة ووجع دماغ .

أتعلمت لما أشتري أي حاجة أشتريها من معرض مضمون و له أسم تجاري ........ و بيعطيك ايصال مختوم و له بطاقة ضريبية ...... حتى لو كنت هادفع قرشين زيادة مقابل جودة الخدمة و جودة المعاملة ....... و نظافة المكان ........ و خدمة ما بعد البيع .

كلام توت مضبوط 100%
اللى احب انصح بيه هو
ان كل واحد يخلى باله كويس قوى من تاريخ انتهاء الصلاحيه للمنتجات
وكمان بأستمرار يكون عنده معرفة بسعر السلع فى السوق

انا عن نفسى بجيب معظم حاجاتى من كارفور

لو تسمحوا لى تعقيب طويل شوية على الموضوع ده

اولا كلام الأخ توت مضبوط و لكن فيه عليه تحفظات
تغيير الحاجات من هايبر وان او كارفور ممكن يكون فى حاجات بسيطة زى اللمبات ، و لكن يا سيدى العزيز فى الأجهزة الكهربائية أو الألكترونية منك للوكيل اللى الضمان عليه (يعنى زى ش عبد العزيز تماما) الا بعض الأجهزة اللى بيكون مشروط فى ضمانها اللى من عندهم التغيير فورا و لكن بشرط عيب صناعة و خلال شهر واحد فقط ، و حتة عيب صناعة دى انت و بختك حسب الوظف اللى واقف (عن تجربة شخصية) لو محترم بيغيرها فورا و لو رذل بيدخلك فى 1000 متاهة علشان تزهق و تقول حقى برقبتى ، فين الوكيل و انا اروح له

فيه حاجات من المعروضة هناك لما تشتريها تفاجأ بانها موديلات قديمة و لو شفت شهادة الضمان اللى مع الجهاز (مش اللى من عندهم) تصعق بأن الضمان لفترة بحد اقصى 14 شهر من تاريخ التصنيع (خاصة الموبايلات) و بعد كده غير سارى (و دى حقيقة و شوفوها فى معظم الموبايلات ن و اجهزة كتير غيرها) ، و لما تقول لهم كده يسمعوك قصيدة عصماء فى ان المهم هو ختم تاريخ الشراء ، و طبعا المفاجأة الغير سارة لو حصل حاجة و رحت للتوكيل ان فعلا كده الضمان خلص ، و سلم لى على الترماى

احذروا الفرص و العروض الخاصة ، يعنى لما تلاقيه عارض تليفزيون مع دش كامل و دى فى دى مثلا ، الحداية ما بتحدفش كتاكيت ، هم مش هبل علشان يخسروا فى السعر او حتى فى مكسبهم ، الفكرة ان عادة بتبقى حاجة من اللى فى العرض الخاص يا بايظة يا على وشك البوظان يا نوعها ردئ و ماحدش بيشتريه ، و لذلك انتبه و تأكد من مكونات العرض الخاص فتفوته فتفوته ، او ابعد عن الشر و غني له احسن

فيه لعية شهيرة فى هايبروان و كارفور ان يحط لك السلع اللى اسعارها معروفة للمستهلك عادة فى المدخل و عادة بتكون بسعر اقل من بره ، و ده علشان اول ما تدخل و طول مانت ماشى فى الأول تلاقى اسعار ارخص من السوق فتفرح و يحصل حاجتين :
1) تتشجع على الشراء و تحس انك كسبان فتبدأ تعبى المنتجات فى عربيتك
2) تشعر بأن كل الأسعار اقل من بره فيزول حرصك على مقارنة الأسعار بعد وقت قليل
و هنا تيجى الخدعة الكبيرة ، بعد شوية يبدأ يحط لك سلع سعرها اغلى وسط سلع رخبصة و تبدأ نسبة الغلو تزيد تدريجيا و طبعا الزبون اخد الأمان و فرحان بالمكسب و عمال يعبى و فاكر انه ناصح و بيوفر ، و الواقع غير كده

لعبة تانية و دى تخصص كارفور اصلا ، و هى ان فى العروض الخاصة تلاقى مثلا عرض جبنة بسعر رخيص جدا ، و تدخل تلاقى سهم عليه السعر نازل من السقف بيشاور على تلاجة ، تقوم واخد كذا عرض ، و ساعة الحساب تلاقى نفسك دافع سعر غالى جدا و لو انتبهت تلاقى ان فعلا سعر المنتج ده غالى ، امال فين العرض الخاص ، يقول لك لأ ده خلص يافندم ، او تلاقيهم حاطين قطعة او اثنين منه فى التلاجة و حواليه من كل ناحية منتج غالى بنفس التغليف و الشكل ، و لا عزاء للمغفلين اللى اعتمدوا على السهم و ماراجعوش السعر على كل عبوة ...

حيلة اخرى شهيرة لو بتجيب حاجة بالجملة (كرتونة لبن مثلا) ان الجملة عادة ليها سعر ارخص من القطاعى ، و لكن الكاشير الخبيث بدل ما يحط البار كود بتاع الكرتونة على السكانر تلاقيه راح مطلع عبوة من الكرتونة و ضرب البار كود بتاعها على السكانر و ضرب فى عدد العبوات اللى فى الكرتونة و لو سألته يقول لك "كله زى بعضه" و الحقيقة غير كده و انك كده اشتريت قطاعى و خسرت فرق مكسب الجملة !!!

بالنسبة للأخ اللى بيقول توفير فده مش سليم لأنهم بيعتمدوا على زغللة الزبون بسلع عديدة و اسلوب عرض مبهر و مغرى فتتشجع على الشراء و كتير منا بعد ما يرجع يلاقى انه اشترى حاجات مش محتاجها فعلا ، مثلا طقم مفكات او شنيور عليه عرض مغرى فى حين انك مش محتاجه اصلا ... امال الستات هايعملوا ايه بقى ؟؟؟

فى رأيى الأسلوب الوحيد للأستفادة من الأماكن دى هو كتابة قائمة بالطلبات مع معرفة اسعارها فى السوق العادة و الدخول مباشرة ليها صنف صنف بدون النظر الى اى شئ آخر ، و اللى تلاقيه فعلا اوفر و نفس الماركة يبقى اتكل على الله و اشتريه ، كده فعلا تبقى وفرت و استمتعت بالخروجة (مجازا).

و تحياتى

في هايبر وان عاملين مسابقة لأفضل اقتراح
انا قدمت اقتراح ان يتم تركيب جهاز باركود بشاشة في التروللي اللي بتتحرك بيه بحيث كل حاجة تشتريها تمررها على الباركود ودايما تبقى عارف حسابك يعني اجمالي المشتريات اللي في التروللي وبعد فترة اتصلوا بيا علشان اخد هدية
ومدير التسويق قالي فكرة ممتازة وهي موجودة بالخارج فعلا واحنا هانجهز الموضوع دا .. بس قالي الفكرة دي مش في مصلحتنا وهو بيضحك .. بس تقريبا كان بيتكلم جد لان الكلام دا بقالوا اكتر من سنتين ومعلموش حاجة :)

اقتباس:

---

المشاركة الأصلية كتبت بواسطة timtim

في هايبر وان عاملين مسابقة لأفضل اقتراح
انا قدمت اقتراح ان يتم تركيب جهاز باركود بشاشة في التروللي اللي بتتحرك بيه بحيث كل حاجة تشتريها تمررها على الباركود ودايما تبقى عارف حسابك يعني اجمالي المشتريات اللي في التروللي وبعد فترة اتصلوا بيا علشان اخد هدية
ومدير التسويق قالي فكرة ممتازة وهي موجودة بالخارج فعلا واحنا هانجهز الموضوع دا .. بس قالي الفكرة دي مش في مصلحتنا وهو بيضحك .. بس تقريبا كان بيتكلم جد لان الكلام دا بقالوا اكتر من سنتين ومعلموش حاجة :)

---

طبعا مش فى مصلحتهم
بس بجد فكرة جامده
ياريت فعلا تتعمل
بدل ما الواحد مرة وهوا بيحاسب تجيله سكته ولا حاجه

كارفور دا بعتبره خروجة لذيذة جدا بس لو مغرمتش كتير :d

باعتباى احد مدمنى كارفور وصارف كل دخلى هناك اتعلمت اكتر من حاجة:
1- بروح كارفور لوحدى، ومش معايا حد تانى منعا من الحاجات اللى مالهاش لازمة اللى بتتحدف جوة التروللى بدون اى داعى
2- لازم تكون معايا لستة بالطلبات تحديدا
3- باخد اللفة بتاعتى جوة كارفور بترتيب واحد كل مرة لان ده بيساعدنى على حفظ ما التقطه من كل قسم وعدم الزغللة
4- قبل البدء فى اللفة ابص على كل العروض الخاصة واشوف لو فيه منها بند ضمن القائمة بتاعتى او بند عليه سعر مذهل وانا هحتاجه قريبا،
5- كل ما التقطه من اشياء لازم اتأكد من حاجتين، 1- تاريخ الصلاحية لو كانت من الأشياء التى لها صلاحية، 2-سلامة العبوة تماما
6- مع الوقت وكثرة المقارنات استقريت على ماركات بعينها فى كل بند من البنود، ولذلك فى معظم الوقت بلتقط الماركة اللى انا متعود عليها بدون مقارنات ، فقط اقوم بالمقارنة وتجديد معلوماتى حول الماركات المختلفة لنفس المنتج لما السعر بتاع الماركة اللى انا بشتريها يتغير
7- فى حالة اننى اقوم بشراء منتج انا مش متعود اجيب منه ماركة معينة فانا دائما اقوم بحسبة معقده احسب فيها الكمية المستفاد منها من المنتج مقابل السعر، يعنى مثلا فويل الومنيوم، طول 20 متر عرض 40 سم بسعر 9.5 جنيه ، ونوع آخر طول 16 متر عرض 60 سم بسعر 10جنيه، هنا انا لازم احسب سعر المتر المربع فى كل حالة، يعنى مثلا فى الحالة الأولى المساحة 20*0.4 =8 متر مربع بيقى المتر المربع سعره 9.5/8= 120 قرش تقريبا، وفى الحالة الثانية المساحة =16*0.6=9.6 متر مربع بسعر 10جنيه يبقى سعر المتر 105 قرش تقربيا، يبقى ال16 متر اللى ب10 جنيه ارخص رغم انه للوهلة الأولى يبدو اغلى
8- لازم اتاكد مرة واتنين من ان الباركود اللى على العبوة اللى انا بلتقطها عليه نفس ارقام الباركود اللى على الرف وعليه السعر لأن كتير جدا تلاقى على الرف باركود وعليه سعر رخيص وساعة الحساب تفاجأ بسعر تانى ولو راجعت بار كود العبوه اللى فىايدك على بار كود الرف تلاقيهم مش زى بعض
9-بالنسبة لماركة (1) فانا بشتريها لما يكون فرق السعر بينها وبين المنتجات الأخرى واضح ، وبعد تجربة استقريت على منتجات بعينها مش بجيبها غير (1) زى مسحوق الغسيل مثلا لأن سعره اقل من ارخص منتج آخر بحوالى 25% ، الى جانب انه بنص سعر الماركات البراقة بتاعه الاعلانات والجوايز، واداؤه مقبول، وبرضه بشترى 1 لما اكون عارف المصنع اللى عامل المنتج، يعنى مثلا لما الاقى صلصة وان من انتاج امريكانا 6 اكتوبر فبشتريها وهكذا

10-بالنسبة للأجهزة الكهربية فانا احرص تماما على تجربتها قبل الخروج من المحل لو كان ذلك ممكنا، اما لو لم يكن ممكنا فاحرص على فتح العبوة ومراجعة مكوناتها فى المحل ثم تجربتها اول ما اوصل البيت لأن مقالب الأجهزة الكهربائية اللى انا جبتها من كارفور متعددة ومتنوعة وكل مرة فيها افكار جديدة، يعنى مثلا اشتريت مرة دى فى دي بلاير ومنطقش نهائيا ورحت رجعته وغيرته، ماشى ده عادى، لكن المقالب اللطيفة كانت من نوعية ان مرة اشتريت جهاز ناقل اشارة ريموت من كارفو ولما فتحه لقيت ان الوحدتين اللى موجودين جوة العلبة وحدتين استقبال(الجهاز مكون من وحدة ارسال ووحدة استقبال) امهم انى رحت قلبت الرف كله لحد ما لقيت علبة فيها وحدتين ارسال واشتريتها وبقى عندى جهازين ناقل اشارة :) ، اما الموقف السخيف جدا انى مرة اشتريت مكنسة كهربائية من كارفور وكانت هدية لقريب هيتجوز، المهم ان قبل ما اوديهالك شيطانى وزنى انى ابص عليهان فتحت العلبة لقيت الحشو بتاع التعبئة ناقصن وفرشاة المكنسة متوسخة كأنها مستعمله والمكنسة مبتشتغلشن فتحتها لقيت الكيس بتاعها مليان حتى آخره تراب، لما فكيتها لقيت ان القطعة المسئولة عن جمع سلك المكنسة محروقة ومش موصلة كهرباء لمحرك المكنسة، الأمر اللى استنتجت منه ان حد اشتراها وباظت منه ورجعها ، راح البهوات حاطينها فى العرض تانى على امل ان ييجى مغفل اخر(اللى حصل انه كان انا) ويشتريها، فده علمنى انى اى جهاز كهربائى لازم افتحه واشوفه قبل ما اخرج من المحل

احييك استاذ سبعاوى , تقريباً بعمل 90% من اللى حضرتك ذكرتة بالاضافة الى انى ابقى مصحصح للعربية اللى بحط فيها المشتريات لان قبل كدة وانا بحاسب لقيت 3 اغلفة شيكولاتة و 2 اغلفة ايس كريم - واضح ان كان فية عيلة محترمة ونظيفة وبعد ما اكلوا الحاجة محبوش يرموا الورق فى الارض ورموة فى الياسكت بتاعى - وطبعا حاولت افهم الكاشير انى مش ممكن هكون كلت كل الحاجات دى لوحدى والحمد لله الموضوع عدى.

اقتباس:

---

المشاركة الأصلية كتبت بواسطة dr.sherif mansy

فى رأيى الأسلوب الوحيد للأستفادة من الأماكن دى هو كتابة قائمة بالطلبات مع معرفة اسعارها فى السوق العادة و الدخول مباشرة ليها صنف صنف بدون النظر الى اى شئ آخر ، و اللى تلاقيه فعلا اوفر و نفس الماركة يبقى اتكل على الله و اشتريه ، كده فعلا تبقى وفرت و استمتعت بالخروجة (مجازا).

و تحياتى

---

دي أهم حاجة في شراء احتياجات الشهر

قائمة الطلبات

و الله انا بشوف أزواج كتير مشيين يشتروا الحاجات من الماركت و هما فى منتهى السعاده و لما بتصادف و بشفهم عند الكاشير الوضع بيكون مختلف و الملامح و علامات الغضب بتظهر بوضوح زى الوقفة طولت ، الكاشير غلس ، الولد المساعد مش كويس :fdsa:
و ساعات ده بيحصل مع أخوكم أيضاً :36_1_2[1]:

بص احلى ميزة فيهم
1- كلة فى مكان واحد فى جو مكيف (مش حر وتشغل العربية وتدور على ماكن للركن ووو)
2-الاسعار قدامك الغالى والرخيص خد الى يريحك
3- بتتحاسب بالسحتوت (بس بجد انا باسمع عن السحتوت بس ماعرفش اية هوة )
4- بتلاقى متعة فى الشراء وبتحس انك عملت عمل مفيد
5- وانت خارج منهم بتكون متاكد انك دفعت كل الى فى جيبك ههههههه